ସିରିଏଲରେ ହିରୋଇନଙ୍କ ହାତରେ ସାପକୁ ନେଇ ଆରମ୍ଭ ହେଲା ବିବାଦ! ପଶୁ କଲ୍ୟାଣ ବୋର୍ଡକୁ ଚିଠି ଲେଖିଲେ ସ୍ନେକ ହେଲପ୍ ଲାଇନ୍ ସଦସ୍ୟ
କନକ ବ୍ୟୁରୋ : ସିରିଏଲ୍ ହିରୋଇନଙ୍କ ହାତରେ ସାପ । ପ୍ଲାଷ୍ଟିକ୍ କିମ୍ବା ଖେଳନାର ସାପ ନୁହେଁ, ବରଂ ସତ ସତିକା ନାଗ ସାପ । ଜୀ-ସାର୍ଥକ ଚ୍ୟାନେଲରେ ପ୍ରସାରିତ ହେଉଥିବା ‘ତୋ ପାଇଁ ମୁଁ’ ଧାରାବାହିକରେ ଦେଖିବାକୁ ମିଳିଛି ଏଭଳି ଏକ ଦୃଶ୍ୟ । ଯାହାକୁ ନେଇ ଉଠିଛି ଆପତି । ଏହି ଦୃଶ୍ୟକୁ ନେଇ ଭାରତୀୟ ପଶୁ କଲ୍ୟାଣ ବୋର୍ଡକୁ ଚିଠି ଲେଖି ଅଭିଯୋଗ କରିଛନ୍ତି ସ୍ନେକ୍ ହେଲ୍ପଲାଇନର ସଦସ୍ୟ ଶୁଭେନ୍ଦୁ ମଲ୍ଲିକ । ଅନ୍ୟପଟେ ଜୀ-ସାର୍ଥକ କର୍ତୃପକ୍ଷଙ୍କୁ ଏନେଇ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ପ୍ରତିକ୍ରିୟା ମିଳିପାରି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଦର୍ଶକଙ୍କୁ ମନୋରଂଜନର ଖୋରାକ୍ ଯୋଗାଇ ଦେବା ନାଁରେ ସରୀସୃପ ଜନ୍ତୁଙ୍କ ଜୀବନ ସହ କେଉଁ ଭଳି ଭାବରେ ଖେଳ ଖେଳାଯାଇପାରେ ଟିଭି ସିରିଏଲ୍ର ଏହି ଦୃଶ୍ୟ ହିଁ ପ୍ରମାଣ କରୁଛି । କେବଳ ସାପର ଜୀବନ ସହ ଖେଳ ଖେଳାଯାଉ ନାହିଁ, ବରଂ ଅଭିନୟ କରୁଥିବା ଅଭିନେତ୍ରୀଙ୍କ ଜୀବନକୁ ବି ବାଜି ଲାଗାଯାଉଛି ।
ଜୀ-ସାର୍ଥକରେ ପ୍ରସାରିତ ହେଉଥିବା ଧାରାବାହିକ- ‘ତୋ ପାଇଁ ମୁଁ’ର କିଛି ଦୃଶ୍ୟକୁ ନେଇ ଏବେ ଆରମ୍ଭ ହୋଇଛି ଚର୍ଚ୍ଚା । ଯେଉଁଥିରେ ଅଭିନେତ୍ରୀ ଜଣକ ଶିବ ମନ୍ଦିର ଯାଇଥିବା ବେଳେ ହାତରେ ଗୁଡେଇ ହୋଇ ଯାଉଛି ଏକ ନାଗ ସାପ । ଯାହାକୁ ଜୋରରେ ଛାଟି ଦେବାର ପ୍ରୟାସ ବି କରୁଛନ୍ତି ଅଭିନେତ୍ରୀ । ଇଏ କୌଣସି ଖେଳନା ବା ପ୍ଲାଷ୍ଟିକ୍ ସାପ ନୁହେଁ ବରଂ ସତ ସତିକା ସାପ ।ଟିଭି ସିରିଏଲରେ ଏଭଳି ଜୀବନ୍ତ ସାପର ବ୍ୟବହାର ନେଇ ଆପତି ଉଠାଇଛନ୍ତି ସ୍ନେକ୍ ହେଲ୍ପଲାଇନର ସଦସ୍ୟ ଶୁଭେନ୍ଦୁ ମଲ୍ଲକି ।
ଟିଭି ସିରିଏଲରେ ଦେଖାଯାଇଥିବା ଏହି ଦୃଶ୍ୟକୁ ନେଇ ଭାରତୀୟ ପଶୁ କଲ୍ୟାଣ ବୋର୍ଡକୁ ଚିଠି ଲେଖି ଅଭିଯୋଗ କରିଛନ୍ତି ଶୁଭେନ୍ଦୁ ମଲ୍ଲିକ । ସାପକୁ ଢ଼ାଳ ଭାବରେ ବ୍ୟବହାର କରିବା ବନ୍ୟଜନ୍ତୁ ସୁରକ୍ଷା ଆଇନ ୧୯୭୨ର ଉଲଂଘନ ବୋଲି ଦର୍ଶାଇଛନ୍ତି । ଏହା ସହ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ଶୁଭେନ୍ଦୁ ମଲ୍ଲିକ ।
ଏବେ ପ୍ରଶ୍ନ ଉଠିଛି-
-ସତ ସତିକା ସାପ ବଦଳରେ ପ୍ଲାଷ୍ଟିକ୍ ସାପର ବ୍ୟବହାର ହୋଇ ପାରିଥାନ୍ତା ନା ନାହିଁ ?
-ଏହି ଦୃଶ୍ୟ ଉଭୟ ସାପ ଏବଂ ଅଭିନେତ୍ରୀଙ୍କ ଜୀବନକୁ ସଂକଟରେ ପକାଉଛି ନା ନାହିଁ ?