କନକ ବ୍ୟୁରୋ : ପୁଣି ଭଗବାନ ବନିଲେ ବଦନାମ ବାବା । ଜେଲରେ ଥିବା ସାରଥୀଙ୍କ ନାଁରେ ସତସଙ୍ଗ । ଚୌଦ୍ୱାର ଜେଲରେ ସନ୍ତୋଷ ରାଉଳ ଓରଫ୍ ସାରଥୀ ବନ୍ଦୀ ଜୀବନ କାଟୁଥିବା ବେଳେ ଏପଟେ ବାଙ୍କୀରେ ଚାଲିଛି ସତସଙ୍ଗ । ଯୌନ ନିର୍ଯାତନା ଏବଂ ଠକେଇ ଭଳି ସଂଗୀନ ମାମଲାରେ ଛନ୍ଦି ହୋଇଥିଲେ ସୁଦ୍ଧା ଲୋକଙ୍କ ମନରୁ ଯାଇନି ବାବା ମୋହ । ସାରଥୀଙ୍କୁ ଭଗବାନ ମାନି ବାଙ୍କୀରେ ଅନୁଷ୍ଠିତ ହୋଇଛି ସତସଙ୍ଗ । ସତେ ଯେମିତି ଲୋକଙ୍କ ଆଖିରେ ଅନ୍ଧପୁଟୁଳି ବାନ୍ଧି ଦେଇଛନ୍ତି ସାରଥୀ । ବାଙ୍କୀରେ ହୋଇଥିବା ସାରଥୀ ସତସଙ୍ଗର ଚିତ୍ର ଦେଖିଲେ ଯେକେହି ବି ଦ୍ୱନ୍ଦ୍ୱରେ ପଡ଼ିଯିବ ଯେ, ଏହି ସାରଥୀ ଓରଫ୍ ସନ୍ତୋଷ ରାଉଳଙ୍କୁ ନେଇ ସାରା ଓଡ଼ିଶା ଦୋହଲି ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ବିଭିନ୍ନ ଅଭିଯୋଗରେ ଛନ୍ଦି ହୋଇ ଚୌଦ୍ୱାର ଜେଲର ଚାରିକାନ୍ଥ ଭିତରେ ବନ୍ଦି ହୋଇରହିଛନ୍ତି ସାରଥୀ, ଆଉ ଏପେଟ ବାଙ୍କୀରେ ଜମିଛି ବାରିମୁଳା ଆଶ୍ରମର ଆସର । ଠିକ୍ ସାରଥୀଙ୍କ ଶୈଳରେ ଚାଲିଛି ସତସଙ୍ଗ । ଉପସ୍ଥିିତ ଲୋକଙ୍କୁ ନୀତିବାଣୀ ଶୁଣାଉଛନ୍ତି ସାରଥୀଙ୍କ ଅନୁଗତ । ଏମିତିକି ଏବେବି ଲୋକଙ୍କ ଘରେ ପୂଜା ପାଉଛନ୍ତି ସାରଥୀ ଓରଫ୍ ସନ୍ତୋଷ ରାଉଳ ।
ଏକାଧିକ ମାମଲାରେ ଫଶି ରହିଥିବା ସାରଥୀଙ୍କୁ ୨ଟି ମାମଲାରେ ମିଳିଛି ସର୍ତ୍ତମୂଳକ ଜାମିନ ।
ସର୍ତ୍ତ ରହିଛି-
– କେନ୍ଦ୍ରାପଡ଼ା ବାରିମୂଳ ଆଶ୍ରମକୁ ପ୍ରବେଶ କରି ପାରିବେ ନାହିଁ ସାରଥୀ
– ଧାର୍ମିକ ସଭା-ସମିତି କରିପାରିବେ ନାହିଁ
-ଶୋଭାଯାତ୍ରା ଆଦି କରିପାରିବେ ନାହିଁ
ଏହି ସବୁ କଟକଣାରେ ସର୍ତ୍ତମୁଳକ ଜାମିନ୍ ମିଳିଛି । ଜେଲରୁ ବି ବାହାରି ନାହାଁନ୍ତି । କିନ୍ତୁ ତାଙ୍କରି ଇଙ୍ଗିତରେ ବାଙ୍କୀରେ ଅନୁଷ୍ଠିତ ହୋଇଛି ସାରଥୀ ସତସଙ୍ଗ । ଅଗଷ୍ଟ ୮, ୨୦୧୫ ସାରଥୀଙ୍କ ହାତରେ ପଡ଼ିଥିଲା ହାତକଡ଼ି । ଠକେଇ ଏବଂ ଯୌନ ନିର୍ଯାତନା ମାମଲାରେ ସନ୍ତୋଷ ରାଉଳ ଗିରଫ ହୋଇଥିଲେ । ଆସନ୍ତାକାଲି ଏହି ଘଟଣାକୁ ଦୁଇବର୍ଷ ପୁରିବ । ଏହି ଦୁଇବର୍ଷ ଭିତରେ ବଦଳି ଯାଇଛି ଚିତ୍ର । ପୁଣି ଥରେ ଶ୍ରଦ୍ଧାଳୁଙ୍କ ମନରେ ସାରଥୀଙ୍କ ପ୍ରତି ପୁରୁଣା ଭାବ ଜାଗ୍ରତ ହୋଇଛି ।