ଇଡି ଓ ସିବିଆଇ ଭୟରେ ବିଜେପି ପାଖରେ ବିଜେଡି ନିଜକୁ ସମର୍ପିତ କରିଛି । ଲୋକଙ୍କ ଆଶୀର୍ବାଦ ଅଛି, କଂଗ୍ରେସର ୯ରୁ ୯୦ ମିଶନ ସଫଳ ହେବ : ପିସିସି ସଭାପତି

କନକ ବ୍ୟୁରୋ : ରାଜ୍ୟରେ ବିଜେଡି-ବିଜେପି ମେଣ୍ଟ ଚର୍ଚ୍ଚା ଭିତରେ ପିସିସି ସଭାପତିଙ୍କ ପ୍ରେସମିଟ । ରାଜ୍ୟ ସ୍ୱାର୍ଥରେ ନୁହେଁ, ନିଜ ସ୍ୱାର୍ଥ ପାଇଁ ବିଜେପି ସହ ବିଜେଡି ମେଣ୍ଟ କରୁଥିବା କହିଲେ ଶରତ ପଟ୍ଟନାୟକ । ଇଡି ଓ ସିବିଆଇ ଭୟରେ ଏହି ମେଣ୍ଟ ହେଉଥିବା ଲୋକେ ଜାଣିଲେଣି । ମେଣ୍ଟ ହେଲେ ବି ନିର୍ବାଚନରେ କୌଣସି ଫରକ ପଡ଼ିବନି ।

୨୫ବର୍ଷ ଶାସନକାଳ ମଧ୍ୟରେ ବିଜେଡି ଦୁର୍ନୀତିରେ ବୁଡି ରହିଛି । ଲୋକଙ୍କ ହିତ ପାଇଁ କୌଣସି କାର୍ଯ୍ୟ କରାଯାଇନି । ଚିଟ୍ ଫଣ୍ଡ ଦୁର୍ନୀତିଠୁ ଆରମ୍ଭ କରି ଖଣି ପାଣି ସବୁଥିରେ ଦୁର୍ନୀତି କରିଆସିଛି ବିଜେଡି । ତେଣୁ ଇଡି ଓ ସିବିଆଇ ଭୟ ବିଜେଡିକୁ ଘାରିଛି । ସେଥିପାଇଁ ବିଜେଡି ବିଜେପି ପାଖରେ ନିଜକୁ ସମର୍ପିତ କରିଛି । ଜଣେ ଦୋଷି ଯେପରି ଆତ୍ମସମର୍ପଣ କରେ ଠିକ୍ ସେହିଭଳି ଆଜି ମୋଦୀଙ୍କ ପାଖରେ ଆତ୍ମସମର୍ପଣ କରିଛି ବିଜେଡି । ନିଜ ସ୍ୱାର୍ଥ ପାଇଁ ଏଠି ରାଜନୀତି ଚାଲିଛି ।

ଆଗାମୀ ଦିନରେ ଲୋକଙ୍କ ଆଶୀର୍ବାଦରୁ କଂଗ୍ରେସର ୯ରୁ ୯୦ ମିଶନ ସଫଳ ହେବ । ଏବଂ ଓଡିଶାରେ କଂଗ୍ରେସ ସରକାର ଗଢିବ ବୋଲି ଦମ୍ଭୋକ୍ତି ପ୍ରକାଶ କରିଛନ୍ତି ପିସିସି ସଭାପତି । ସେପଟେ ବହୁ ବିଜେପି ଓ ବିଜେଡି ନେତା କଂଗ୍ରେସ ଟଚରେ ଥିବା ସେ କହିଛନ୍ତି ।