କନକ ବ୍ୟୁରୋ : ପିଲାଦିନେ ଆପଣ ଆକବର-ବୀରବଲଙ୍କର କାହାଣୀ ପଢ଼ିଥିବେ । କିଭଳି ବୀରବଲ ନିଜ ବୁଦ୍ଧି ମାଧ୍ୟମରେ ସମସ୍ୟାର ସମାଧାନ କରୁଥିଲେ, ସେହି କାହାଣୀ ଆପଣଙ୍କୁ ଆନନ୍ଦ ଦେଇଥିବ । ଝାଡ଼ଖଣ୍ଡର ଗଢୱାରେ ଏଭଳି ଏକ ନିଆରା ଘଟଣା ସାମ୍ନାକୁ ଆସିଛି । ଯେଉଁଠାରେ ଗ୍ରାମ ପଞ୍ଚାୟତ ପକ୍ଷରୁ ବୀରବଲଙ୍କ ବୁଦ୍ଧି ପ୍ରୟୋଗ କରି ଅସଲି ମାଲିକକୁ ଖୋଜି ପାଇଛନ୍ତି । ମିଳିଥିବା ସୂଚନା ମୁତାବକ ଗଢୱା ଜିଲ୍ଲାର ସୁଅରଜଂଘାରେ ରହୁଥିବା ମଙ୍ଗଳଙ୍କୁ ଦୁଇ ମାସ ତଳେ ଜଙ୍ଗଲରୁ ଏକ ଘୋଡା ମିଳିଥିଲା । ମଙ୍ଗଳ ଘୋଡ଼ାକୁ ନେଇ ଘରକୁ ଆସିଥିବାବେଳେ ତାହାର ନାମ ତୋଫାନ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
କିଛି ଦିନ ପରେ ଦୁଇ ଜଣ ବ୍ୟକ୍ତି ସୁଅରଜଂଘା ଗାଁକୁ ଆସି ଘୋଡ଼ାଟି ସେମାନଙ୍କର ବୋଲି ଦାବି କରିଥିଲେ । ସମସ୍ୟା ଏତିକିରେ ତୁଟିନଥିଲା । ୫ ଦିନ ତଳେ ସୁଅରଜଂଘା ଗାଁର ପଡୋଶୀ ଗାଁ ପଚୋରରୁ ପ୍ରହ୍ଲାଦ ନାମକ ବ୍ୟକ୍ତି ଆସି ଘୋଡାଟି ତାଙ୍କର ବୋଲି ଦାବି କରିଥିଲେ । ଏହା ପରେ ଘଟଣାଟି ଗ୍ରାମପଞ୍ଚାୟତରେ ପହଞ୍ଚିଥିଲା । ଗୋଟିଏ ଘୋଡାକୁ ଚାରି ଜଣ ମାଲିକ ଥିବାବେଳେ କିଭଳି ଠିକ ମାଲିକକୁ ଘୋଡ଼ାଟି ଦିଆଯାଇପାରିବ ସେ ନେଇ ସରପଂଚ ଅଜୟ ସିଂହ ଉପାୟ ପାଞ୍ଚିଥିଲେ ।
ଗ୍ରାମପଂଚାୟତ କାର୍ଯ୍ୟାଳୟ ବାହାରେ ଘୋଡ଼ାଟିକୁ ବାନ୍ଧି ଦେଇ ଚାରି ଜଣଙ୍କୁ ଘୋଡା ପାଖକୁ ପଠାଯାଇଥିଲା । ଆଉ ଘୋଡ଼ାଟି ଯେଉଁ ବ୍ୟକ୍ତିମାନଙ୍କୁ ଦେଖି ଚିହିଁକି ଥିଲା ଓ ଯେଉଁ ବ୍ୟକ୍ତିଙ୍କ ପାଖରେ ଶାନ୍ତ ଭାବେ ରହୁଥିଲା, ସେମାନଙ୍କୁ ଅଲଗା ଅଲଗା ଛିଡା କରାଯାଇଥିଲା ।ଶେଷରେ ପଚୋର ଗାଁର ପ୍ରହ୍ଲାଦ ହିଁ ପ୍ରକୃତ ମାଲିକ ବୋଲି ଜଣାପଡିଥିଲା ।