କନକ ବ୍ୟୁରୋ: ଦିନେ ବଡ ବଡ ଶିଳ୍ପପତି ଏବଂ କର୍ପୋରେଟ ଜଗତର ଜଣାଶୁଣା ଚେହେରାଙ୍କ ସହ କାମ କରୁଥିଲେ । ଆଉ ଏବେ ରାଜନୀତିରେ ପାଦ ଥାପିଛନ୍ତି ସଂତୃପ୍ତ ମିଶ୍ର । ୨୮ ବର୍ଷ ଧରି କର୍ପୋରେଟ ଜଗତରେ କାମ କରିବା ପରେ ଏବେ ରାଜନୀତିରେ ଯୋଗ ଦେଇଛନ୍ତି ସଂତୃପ୍ତ ମିଶ୍ର । ଉଦ୍ଦେଶ୍ୟ ରାଜ୍ୟବାସୀଙ୍କ ପାଇଁ କାମ କରିବେ । ତେବେ ଆଗକୁ ରାଜ୍ୟସଭା ନିର୍ବାଚନ ରହିଛି । ଏହାପୂର୍ବରୁ ଏହି ଚର୍ଚ୍ଚିତ ବ୍ୟକ୍ତି ବିଜେଡିରେ ସାମିଲ ହେବାକୁ ନେଇ ଭିନ୍ନ ଚର୍ଚ୍ଚା ଧରିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଖାଲି ହେବାକୁ ଯାଉଥିବା ରାଜ୍ୟସଭା ସାଂସଦ ପଦ ପାଇଁ ସାହିତ୍ୟକ, ଶିଳ୍ପପତିଙ୍କୁ ନବୀନ ଚୟନ କରିପାରନ୍ତି ଚର୍ଚ୍ଚା ଭିତରେ ବିଜେଡିରେ ସାମିଲ ହୋଇଛନ୍ତି କର୍ପୋରେଟ୍ ଲିର୍ଡର ସଂତୃପ୍ତ ମିଶ୍ର । ନବୀନ ନିବାସରେ ବିଜେଡି ସୁପ୍ରିମୋଙ୍କ ଉପସ୍ଥିତିରେ ଦଳରେ ସାମିଲ ହୋଇଛନ୍ତି ସଂତୃପ୍ତ । ଆଉ ଯୋଗ ଦେବା ପରେ ଦଳ ତାଙ୍କୁ ଯେଉଁ ଦାୟିତ୍ୱ ଦେବ ତାକୁ ନିଷ୍ଠାର ସହ ତୁଲାଇବେ ବୋଲି କହିଛନ୍ତି ।
ଦଳରେ ସାମିଲ ହେବାର ପ୍ରଥମ ଦିନରେ ସଂତୃପ୍ତଙ୍କୁ ବଡ ଦାୟିତ୍ୱ ଦେଇଛନ୍ତି ନବୀନ । ସଂତୃପ୍ତଙ୍କୁ ଜାତୀୟ ମୁଖପାତ୍ର କରିଛନ୍ତି । ଦାୟିତ୍ୱ ମିଳିବା ପରେ ସେ ବିଜେଡି ଓ ରାଜ୍ୟର ପ୍ରସଙ୍ଗକୁ ଜାତୀୟସ୍ତରରେ ଉଠାଇବେ ବୋଲି କହିଛନ୍ତି ।
ରାଜ୍ୟସଭାକୁ କିଏ ଯିବ ଚର୍ଚ୍ଚା ଭିତରେ ସଂତୃପ୍ତ ମିଶ୍ର ବିଜେଡିରେ ଯୋଗ ଦେବା ନୂଆ ଚର୍ଚ୍ଚାକୁ ଖୋରାକ୍ ଯୋଗାଇଛି । ବିଜୁ ଜନତା ଦଳ ପକ୍ଷରୁ କିଛି ସ୍ପଷ୍ଟ କରାଯାଇନଥିଲେ ବି ତାଙ୍କୁ ନବୀନ ରାଜ୍ୟସଭାକୁ ପଠାଇପାରନ୍ତି ବୋଲି ଚର୍ଚ୍ଚା ଜୋର ଧରିଛି ।
ଆଦିତ୍ୟ ବିର୍ଲା ଗ୍ରୁପ୍ର ଡାଇରେକ୍ଟର ଅଫ ଗ୍ରୁପ୍ ଏଚ୍ଆର୍ ଭାବେ କାମ କରୁଥିଲେ ସଂତୃପ୍ତ ମିଶ୍ର । ଗତବର୍ଷ ଡିସେମ୍ବର ମାସରେ ଚାକିରିରୁ ସ୍ୱେଚ୍ଛାକୃତ ଅବସର ନେଇଥିଲେ । ୨୮ ବର୍ଷ ଧରି ଗ୍ରୁପ୍ର ବିଭିନ୍ନ ଗୁରୁତ୍ୱପୂର୍ଣ୍ଣ ପଦପଦବୀରେ ସୁଚାରୁପେ କାର୍ଯ୍ୟ ସଂପାଦନ କରି ଆସିଛନ୍ତି । କୁମାର ମଙ୍ଗଲମ୍ ବିର୍ଲାଙ୍କର ମୁଖ୍ୟ କୋର୍ ଟିମ୍ରେ ଦୀର୍ଘଦିନ ଧରି ସେ କାମ କରିଛନ୍ତି । ରାଜ୍ୟ ସରକାରଙ୍କ ଏକାମ୍ର କ୍ଷେତ୍ର ଯୋଜନାର ପରାମର୍ଶଦାତା କମିଟି ଅଧ୍ୟକ୍ଷ ଥିଲେ ।