ବିଧାନସଭା ପ୍ରଶ୍ନ କାଳରେ ବାଲି ତାତି : ସରକାରଙ୍କୁ ଘେରିଲେ ବିରୋଧୀ; କହିଲେ, ରାଜ୍ୟରେ ହେଉଛି ବ୍ୟାପକ ବାଲି ଚୋରି, ନାହିଁ ବାଲି ନୀତି
ବାଚସ୍ପତି କହିଲେ ଆନ୍ଧ୍ରକୁ ହେଉଛି ବାଲି ଚୋରା ଚାଲାଣ; ଉତ୍ତର ରଖି ମନ୍ତ୍ରୀ କହିଲେ ୧୪୪ ତହସିଲ ସମ୍ବେଦନଶୀଳ ଚିହ୍ନଟ
କନକ ବ୍ୟୁରୋ : ବିଧାନସଭାରେ ବାଲିନୀତିକୁ ନେଇ ସରଗରମ ଆଲୋଚନା । ବାଲି ନୀତି କରିବାକୁ ଗୃହରେ ବିରୋଧୀ ଦାବି କରିଛନ୍ତି । ବିରୋଧୀଙ୍କ କହିବା କଥା ବାଲି ନୀତି ନହେବା ଯୋଗୁଁ ଓଡିଶା ବାଲି ରାଜ୍ୟ ବାହାରକୁ ଚୋରା ଚାଲାଣ ହେଉଛି । ବାଲି ଚୋରା ଚାଲଣା ପାଇଁ ରାଜ୍ୟ ବର୍ଷକୁ ପ୍ରାୟ ୫ ହଜାର କୋଟି ରାଜସ୍ୱ ହରାଉଛନ୍ତି ବୋଲି ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଛନ୍ତି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ।
Kanak News is now on WhatsApp
Join and get latest news updates delivered to you via WhatsApp
ଗରିବ ଲୋକ ଜଣେ ଟ୍ରାକ୍ଟରରେ ବାଲି ଆଣିଲେ ତାଙ୍କୁ ୫୦ ହଜାର ଟଙ୍କା ଜରିମାନା କରାଯାଉଛି କିନ୍ତୁ ଦଲାଲ ଟ୍ରକ ଟ୍ରକ ବାଲି ବୋହି ନେଉଛନ୍ତି ବୋଲି ବିରୋଧୀ ଅଭିଯୋଗ କରିଛନ୍ତି । ତେବେ ଖେଶଦ ବାଚସ୍ପତି କହିଛନ୍ତି ତାଙ୍କ ନିର୍ବାଚନ ମଣ୍ଡଳୀରୁ ଆନ୍ଧ୍ରକୁ ବାଲି ଚୋରା ଚାଲାଣ ହେଉଛି । ସେପଟେ ରାଜସ୍ୱ ମନ୍ତ୍ରୀ ସୁଦାମ ମାର୍ଣ୍ଡି କହିଛନ୍ତି, ବାଲି ନୀତି ଚିଠା ପ୍ରସ୍ତାବ ଏବେ ଚୂଡାନ୍ତ ପର୍ଯ୍ୟାୟରେ ଅଛି । ୨୦୧୮ରେ ତତ୍କାଳୀନ ମୁଖ୍ୟ ଶାସନ ସଚିବ ଅଧ୍ୟକ୍ଷତାରେ ଏକ ବୈଠକ ବସିଥିଲା । କରୋନା ଯୋଗୁଁ ବାଲି ନୀତିରେ ବିଳମ୍ବ ହେଉଥିବା ରାଜସ୍ୱ ମନ୍ତ୍ରୀ କହିଛନ୍ତି । ରାଜ୍ୟରେ ୧୪୪ଟି ତହସିଲ ସମ୍ବେଦନଶୀଳ ଭାବେ ଚିହ୍ନଟ ହୋଇଥିବା ମନ୍ତ୍ରୀ ଗୃହରେ ଉତର ରଖିଛନ୍ତି ।