ମୁହାଁମୁହିଁ ହେଲେ ସନା ମହାକୁଡ ଓ ମିନାକ୍ଷୀ ମହାନ୍ତ ସମର୍ଥକ । ଆକ୍ରମଣ ନେଇ ଅଭିଯୋଗ ଭିତରେ କାଲି ବଡ ନେତାଙ୍କ ଭାଗ୍ୟ ପରୀକ୍ଷା
କନକ ବ୍ୟୁରୋ: ଚତୁର୍ଥ ପର୍ଯ୍ୟାୟ ପଞ୍ଚାୟତ ଭୋଟ୍ ପୂର୍ବରୁ କେନ୍ଦୁଝର ଚମ୍ପୁଆରେ ହିଂସା । କୁହାଯାଉଛି ଚମ୍ପୁଆ ରାଜନୀତିର ଦୁଇ ପ୍ରଭାବଶାଳୀ ଗୋଷ୍ଠୀ ଏବେ ପ୍ରତିଶୋଧ ପରାୟଣ ହୋଇ ପଡିଛନ୍ତି । ପୂର୍ବତନ ବିଧାୟକ ସନା ମହାକୁଡ଼ ଓ ବର୍ତ୍ତମାନର ବିଧାୟିକା ମିନାକ୍ଷୀ ମହନ୍ତଙ୍କ ସମର୍ଥକଙ୍କ ମଧ୍ୟରେ ଚାଲିଛି ଖଣ୍ଡଯୁଦ୍ଧ । ଗତ ୧୪ ତାରିଖରେ ମିନାକ୍ଷୀଙ୍କ ସମର୍ଥକଙ୍କ ଉପରେ ସନା ସମର୍ଥକଙ୍କ ଆକ୍ରମଣ ପରେ ଏବେ ପ୍ରତିଶୋଧ ନେଇଛନ୍ତି ମିନାକ୍ଷୀଙ୍କ ସମର୍ଥକ । ଯୋଡାର ବଳଦା ପଞ୍ଚାୟତର ଗୁରୁଡ଼ା ଗାଁରେ ରବିବାର ମଧ୍ୟ ରାତ୍ରିରେ ଏହି ଘଟଣା ଘଟିଛି ।
Kanak News is now on WhatsApp
Join and get latest news updates delivered to you via WhatsApp
ଅଭିଯୋଗ ଅନୁସାରେ ୭୦ରୁ ୮୦ ଜଣ ମିନାକ୍ଷୀଙ୍କ ସମର୍ଥକ ଏହି ଗାଁରେ ପଶି ସନା ସମର୍ଥକଙ୍କ ଉପରେ ଆକ୍ରମଣ କରିଛନ୍ତି । ପ୍ରାୟ ୧୦ରୁ ଅଧିକ ଗାଡ଼ି ଭାଙ୍ଗି ଦେଇଛନ୍ତି । ଆକ୍ରମଣରେ ୪ ଜଣ ଆହତ ହୋଇଛନ୍ତି ।
ଗତ ୧୪ ତାରିଖରେ ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତଙ୍କ ସମର୍ଥକଙ୍କୁ ଆକ୍ରମଣ ଅଭିଯୋଗ ହୋଇଥିଲା । ଯୋଡା ବ୍ଲକ ପାଳାସା ପଞ୍ଚାୟତରେ ଏହି ଘଟଣା ଘଟିଥିଲା । ଉଭୟ ସନା ଓ ମିନାକ୍ଷୀଙ୍କ ସମର୍ଥକ ନିଜକୁ ବିଜେଡି ସମର୍ଥିତ ପ୍ରାର୍ଥୀ ବୋଲି ଦାବି କରୁଥିବାରୁ ବିବାଦ ରହିଥିଲା । ଯାହା ଉଗ୍ରରୂପ ନେଇ ସଂଘର୍ଷରେ ପରିଣତ ହୋଥିଲା । ଗୋଟିଏ ଗୋଷ୍ଠୀର ପ୍ରଚାର ଗାଡିକୁ ଆଉ ଏକ ଗୋଷ୍ଠୀ ଆକ୍ରମଣ କରିବାରୁ ୩ ଜଣ ଗୁରୁତର ଆହତ ହୋଇଥିଲେ ।
ତେବେ କେନ୍ଦୁଝର ରାଜନୀତିରେ ସନାତନ ମହାକୁଡଙ୍କ ରହିଛି ଅଖଣ୍ଡ ପ୍ରଭାବ । ତାଙ୍କ ସମର୍ଥନ ପାଇବାକୁ ୨୦୧୯ରେ ସାଂସଦ ଓ ଚମ୍ପୁଆ ବିଧାୟକ ପଦ ଟେକି ଦେଇଥିଲା ବିଜେଡି । ସନାଙ୍କ ପ୍ରାର୍ଥୀ ଭାବେ ମିନାକ୍ଷୀ ମହାନ୍ତ ବିଜେଡି ଟିକେଟରେ ଚମ୍ପୁଆରୁ ବିଧାୟିକା ହୋଇଥିଲେ । ହେଲେ ସନାଙ୍କଠାରୁ ମିନାକ୍ଷୀଙ୍କ ଦୂରତା ବଢିଥିବା କୁହାଯାଉଛି । ପଞ୍ଚାୟତ ନିର୍ବାଚନ ମହାପର୍ବର ୩ୟ ପର୍ଯ୍ୟାୟ ମତଦାନ ଶେଷ ହୋଇଥିବାବେଳେ ମଙ୍ଗଳବାର ପଡୁଛି ଚତୁର୍ଥ ପର୍ଯ୍ୟାୟ ଭୋଟ୍ । ଏହି ପର୍ଯ୍ୟାୟରେ ଅନେକ ପ୍ରଭାବଶାଳୀ ନେତାଙ୍କ ପଞ୍ଚାୟତ ପରୀକ୍ଷା ହେବାକୁ ଯାଉଛି । ବଲାଙ୍ଗିର ବିଧାନସଭା କ୍ଷେତ୍ରରେ ଭୋଟ୍ ପଡିବାକୁ ଯାଉଥିବାବେଳେ ଏୟୁ ସିଂଦେଓଙ୍କ ପରିବାର ଓ ସାଂସଦ ସଂଗୀତା ସିଂଦେଓଙ୍କ ନେତୃତ୍ୱର ପ୍ରଦର୍ଶନ ଉପରେ ନଜର ରହିବ । କଳିକେଶ ସିଂଦେଓଙ୍କୁ ଆଦିବାସୀ ସଂଗଠନ ପକ୍ଷରୁ ବିରୋଧ ହୋଇଥିଲା । ପଞ୍ଚାୟତ ଫଳାଫଳ ଅର୍କେଶ ସିଂଦେଓଙ୍କ ଆଗାମୀ ରାଜନୈତିକ ଭବିଷ୍ୟତ ସ୍ଥିର କରିବ । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ଜିଲ୍ଲା ରାଜନୀତିରେ ପ୍ରଭାବର ହେବ ପରୀକ୍ଷା ।
ଆସନ୍ତାକାଲି ବାଲେଶ୍ୱର ନୀଳଗିରିରେ ପୂର୍ବତନ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀଙ୍କ ପତିଆରାର ପରୀକ୍ଷା ହେବାକୁ ଯାଉଛି । କେନ୍ଦ୍ରମନ୍ତ୍ରୀ ମଣ୍ଡଳରୁ ବାଦ ପଡିବା ପରେ ନିଜ ନିର୍ବାଚନୀ କ୍ଷେତ୍ରରେ ବେଶ ସକ୍ରିୟ ଅଛନ୍ତି ବାଲେଶ୍ୱର ସାଂସଦ । ମଣ୍ଡି ସମସ୍ୟାକୁ ନେଇ ଯୋଗାଣ ମନ୍ତ୍ରୀଙ୍କ ବିରୋଧରେ ଅସନ୍ତୋଷର ପ୍ରଭାବ ପଞ୍ଚାୟତ ଭୋଟରେ କଣ ରହିବ ତାର ମୂଲ୍ୟାୟନ ହେବାକୁ ଯାଉଛି ।ସେହିପରି ଆଠଗଡରେ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ନେତୃତ୍ୱରେ ଲଢେଇ କରୁଛନ୍ତି ବିଜେଡି ଜିଲ୍ଲା ପରିଷଦ ପ୍ରାର୍ଥୀ । ପାରାଦୀପ କୁଜଙ୍ଗରେ ବିଧାୟକ ସମ୍ବିତ ରାଉତରାୟ, ଯାଜପୁର ସୁକିନ୍ଦାରେ ପ୍ରୀତିରଞ୍ଜନ ଘଡେଇ, ପିପିଲିରେ ନୂଆ ବିଧାୟକ ରୁଦ୍ର ମହାରଥୀଙ୍କ ହେବ ପଞ୍ଚାୟତ ପରୀକ୍ଷା ।
ତେବେ ବିରୋଧୀ ଦଳ ନେତା ପ୍ରଦୀପ୍ତ ନାୟକଙ୍କ ଅସୁସ୍ଥତା କାରଣରୁ ଅନୁପସ୍ଥିତିର କଣ ରହିବ ପ୍ରଭାବ ? କେନ୍ଦ୍ରାପଡାରେ ଶଶୀ ବେହେରା ବନାମ ଗଣେଶ୍ୱର ବେହେରା ନିର୍ଣ୍ଣାୟକ ରୂପ ନେବ କି ? ସେପଟେ ରାୟଗଡରେ ରାଜ୍ୟସଭା ସାଂସଦ ଭାସ୍କର ରାଓଙ୍କ ପତିଆରର ହେବ ପଞ୍ଚାୟତ ପରୀକ୍ଷା । ଖାଲି ସେତିକି ନୁହେଁ, ବିଧାୟକ ମକରନ୍ଦ ମୁଦୁଲିଙ୍କ ସମର୍ଥନ ମିଳିବା ପରେ ବିଜେଡିର ପ୍ରଦର୍ଶନ ଉପରେ ନଜର ରହିବ ।