ସଚିବଙ୍କୁ ପ୍ରଶ୍ନ କରିବାରୁ ପ୍ରତିଶୋଧ ପରାୟଣ ଛାୟା ସରକାର । ସମ୍ବାଦ ଗ୍ରୁପର ମାନବ ସମ୍ବଳ ମୁଖ୍ୟଙ୍କୁ ଦ୍ୱିତୀୟ ଦିନରେ ପଚରାଉଚୁରା

କନକ ବ୍ୟୁରୋ : ଗୋଟିଏ ପଟେ ଗଣମାଧ୍ୟମର କଣ୍ଠରୋଧ କରିବା ପାଇଁ ଛାୟା ସରକାର ନୂଆ ନୂଆ ଚାଲ ଚଳାଇଛନ୍ତି । ମିଛ ଓ ପ୍ରାୟୋଜିତ ଅଭିଯୋଗ ଯୋଗାଡ କରିବାରେ ଲାଗିଛନ୍ତି । ଆଉ ସେହି ଅଭିଯୋଗକୁ ଆଧାର କରି ସାଧାରଣ ଜନତାଙ୍କ ସ୍ୱର ସାଜିଥିବା ସୌମ୍ୟ ରଞ୍ଜନଙ୍କ ସ୍ୱରକୁ ଚାପି ଦେବାକୁ ଉଦ୍ୟମ କରୁଛନ୍ତି । ଯାହାକୁ ତୀବ୍ର ବିରୋଧ କରିଛନ୍ତି ଛାତ୍ର ସଂଗଠନ । ଛାତ୍ର ସଂଗଠନର ସଦସ୍ୟମାନେ ଇଓଡବ୍ଲ୍ୟୁ ରେଡକୁ ବିରୋଧ କରିବା ସହ, ପୋଷ୍ଟର ମାରି ସୌମ୍ୟ ରଞ୍ଜନଙ୍କୁ ସମର୍ଥନ ଜଣାଇଛନ୍ତି ।

ରାଜ୍ୟରେ ଚାଲିଥିବା ଛାୟା ସରକାର, ଗଣମାଧ୍ୟମର କଣ୍ଠରୋଧ କରିବାକୁ ଉଦ୍ୟମ କରିବା ପରେ, ସ୍ୱାଭିମାନୀ ଓଡିଆ ସରକାରଙ୍କ ଏହି ଚାଲକୁ ବୁଝିବା ଆରମ୍ଭ କଲେଣି । ଗଣତନ୍ତ୍ର ଉପରେ ବିଶ୍ୱାସ ରଖୁଥିବା ପ୍ରତ୍ୟକ ନାଗରିକ, ସୌମ୍ୟ ରଞ୍ଜନଙ୍କୁ ସମର୍ଥନ କରିବା ସହ, ସତ କଥାର ଉତର ନଦେଇ ସରକାର କାହିଁକି ପ୍ରତିଶୋଧ ପରାୟଣ ହୋଇପଡିଛନ୍ତି, ସେ ନେଇ ପ୍ରଶ୍ନ କରିଛନ୍ତି । ଯାଜପୁର ଦାନଗଦିରେ ବୁଦ୍ଧୀଜୀବୀ ମାନେ ଶୋଭାଯାତ୍ରା କରିଛନ୍ତି । ଗୋପରେ ବିପ୍ଳବୀ ସଂଗଠନ ପକ୍ଷରୁ ସଚିବଙ୍କ କୁଶ ପୁତଳିକା ଦାହ କରାଯାଇଛି ।

ଗଣତନ୍ତ୍ରକୁ ପାଦରେ ଦଳି ମକଚି ଏକଛତ୍ରବାଦୀ ଶାସନ ଚଳାଇଥିବା ସରକାର, ଗଣମାଧ୍ୟମ ସ୍ୱରକୁ ଚାପିବା ନିଶାରେ ମଦମତ ହୋଇପଡିଥିବାବେଳେ, ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ବିରୋଧୀ । ସରକାରଙ୍କୁ କଡା ସମାଲୋଚନା କରିଛନ୍ତି ।

୧୯୭୫ ମସିହା ଜରୁରୀକାଳିନ ପରିସ୍ଥିତିକୁ ଆମ ମାନଙ୍କ ଭିତରୁ ହୁଏତ ଅନେକ ଦେଖିନଥିଲେ କି ଅନୁଭବ କରିନଥିଲେ । କିନ୍ତୁ ଆଜି ଓଡିଶାରେ ପ୍ରାୟୋଜିତ ଅଭିଯୋଗ ନାଁରେ ଛାୟା ସରକାର, ଇଓଡବ୍ଲ୍ୟୁକୁ ଢ଼ାଲ କରି ଯେଉଁଭଳି ଚଢ଼ାଉ କରୁଛି, ତାହା ହିଁ ଜରୁରୀକାଳୀନ ପରିସ୍ଥିତି ବୋଲି ଚର୍ଚ୍ଚା ହେଉଛି ।