ପ୍ରାର୍ଥୀ ବଦଳାଇଲା କଂଗ୍ରେସ । ଦିଗପହଣ୍ଡିରୁ କଂଗ୍ରେସ ପ୍ରାର୍ଥୀ ହେଲେ ସାକା ସୁଜିତ୍ କୁମାର । 

457
କନକ ବ୍ୟୁରୋ: ପ୍ରାର୍ଥୀ ବଦଳାଇଲା କଂଗ୍ରେସ । ଦିଗପହଣ୍ଡି ବିଧାନସଭା ଆସନ ପାଇଁ ପ୍ରାର୍ଥୀ ବଦଳାଇଛି ଭାରତୀୟ ଜାତୀୟ କଂଗ୍ରେସ । ଶ୍ରୀଧର ଦେବଙ୍କ ସ୍ଥାନରେ ସାକା ସୁଜିତ କୁମାରଙ୍କୁ ଏଠାରୁ ପ୍ରାର୍ଥୀ କରିଛି ଦଳ । ଏନେଇ ଟୁଇଟ୍ କରି ଓଡିଶା କଂଗ୍ରେସ ପକ୍ଷରୁ ସୂଚନା ଦିଆଯାଇଛି । ତେବେ ଶ୍ରୀଧର ଦେବ ଆଜି ନାମାଙ୍କନ ମଧ୍ୟ ଭରିସାରିଥିଲେ, ହେଲେ ଏହାପରେ ମଧ୍ୟ ତାଙ୍କୁ ହଟେଇ ସାକା ସୁଜିତ୍ କୁମାରଙ୍କୁ ଟିକେଟ୍ ଦେଇଛି ଦଳ ।

ସୂଚନାଯୋଗ୍ୟ ଯେ, ଗଞ୍ଜାମ ଜିଲ୍ଲାର ଦିଗପହଣ୍ଡି ଆସନ ଏକ ଗୁରୁତ୍ୱପୂର୍ଣ୍ଣ ସିଟ୍ । ବିଜେଡି ଏଠାରୁ ପୂର୍ବତନ ବାଚସ୍ପତି ସୂର୍ଯ୍ୟର୍ ପାତ୍ରଙ୍କ ପୁଅ ବିପ୍ଲବ ପାତ୍ରଙ୍କୁ ପ୍ରାର୍ଥୀ କରିଥିବାବେଳେ, ବିଜେପି ଲୋକପ୍ରିୟ ସିନେ ଅଭିନେତା ସିଦ୍ଧାନ୍ତ ମହାପାତ୍ରଙ୍କୁ ଟିକେଟ୍ ଦେଇଛି । ତେବେ ଏହି ଦୁଇ ନେତାଙ୍କୁ ହରାଇବାକୁ ଏବେ କଂଗ୍ରେସ ମୈଦାନକୁ ଓହ୍ଲାଇଛି ସାକା ସୁଜିତ୍ କୁମାରଙ୍କୁ । ତେଣୁ ଏବେ ଦେଖିବା ବାକି ରହିଲା, ଦିଗପହଣ୍ଡି ଆସନରେ କିଏ ମାରୁଛି ବାଜି?