ନବୀନ ନିବାସରେ ବାବା ! ଟିକେଟ ପାଇଁ ନୁହେଁ ବରଂ ୨୦୧୯ ପାଇଁ ବିଜେଡି ସୁପ୍ରିମୋଙ୍କୁ ଦେଲେ ଆଶୀର୍ବାଦ
କନକ ବ୍ୟୁରୋ : ନେତା ନୁହେଁ ନବୀନ ନିବାସରେ ବାବା । ଟିକେଟ ପାଇଁ ନୁହେଁ ବରଂ ବିଜୟ ପାଇଁ ଦେଇଛନ୍ତି ଆଶୀର୍ବାଦ। ଗତ କିଛି ଦିନ ଧରି ନବୀନ ନିବାସରେ ନେତାଙ୍କ ଭିଡ ଦେଖିବାକୁ ମିଳୁଥିଲା । କିନ୍ତୁ ଏହି ଭିଡ ଭିତରେ ଆଜି ବାରି ହୋଇପଡିଥିଲେ ଗେରୁଆ ବସ୍ତ୍ରଧାରୀ ବାବା । ଆଜି ନବୀନ ନିବାସରେ ଏଭଳି ଏକ ନିଆରା ଦୃଶ୍ୟ ଦେଖିବାକୁ ମିଳିଥିଲା । ପ୍ରଥମେ ବାବାଙ୍କୁ ଦେଖି ନେତା ମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ । ଏପରିକି ବାବା ମାନେ କେଉଁ ନେତାଙ୍କ ପାଇଁ ବୋଧହୁଏ ଟିକେଟ ଲବି କରିବାକୁ ଆସିଥିବା ନେଇ ନବୀନ ନିବାସରେ ଡେରା ପକାଇଥିବା ନେତା ଟୁପୁର ଟାପୁର ହୋଇଥିଲେ । କିନ୍ତୁ ନବୀନଙ୍କ ସହ ଭେଟ ହେବା ପରେ ପ୍ରକୃତ ଘଟଣା ସାମ୍ନାକୁ ଆସିଥିଲା ।
Kanak News is now on WhatsApp
Join and get latest news updates delivered to you via WhatsApp
ଉତ୍କଳୀୟ ସନାତନ ଧର୍ମ ପରିଷଦର ସାଧୁସନ୍ଥଗଣ ନବୀନଙ୍କୁ ଭେଟିବା ପରେ ୨୦୧୯ ନିର୍ବାଚନ ପାଇଁ ଆଶୀର୍ବାଦ ଦେଇଥିଲେ । ଦୀର୍ଘ ୨୦ ବର୍ଷ ଧରି ନବୀନ ଓଡିଶାରେ ଯେଉଁ ଜନହିତକର କାମ କରିଛନ୍ତି ସେଥିପାଇଁ ରାଜ୍ୟର ପୁରପଲ୍ଲୀରେ ନବୀନଙ୍କ କଥା ଚାଲିଛି । ଆଗାମୀ ଦିନରେ ଉତ୍କଳୀୟ ସନାତଦ ଧର୍ମ ପରିଷଦ ପକ୍ଷରୁ ରାଜ୍ୟରେ ଏକ ବିଶାଳ କାର୍ଯ୍ୟକ୍ରମର ଆୟୋଜନ କରାଯିବ । ସେଥିପାଇଁ ନବୀନଙ୍କୁ ନିମନ୍ତ୍ରଣ କରିବା ସହ ୨୦୧୯ ନିର୍ବାଚନ ପାଇଁ ଶୁଭ ଆଶୀର୍ବାଦ ପ୍ରଦାନ କରିଥିବା କହିଛନ୍ତି ସାଧୁସନ୍ଥଗଣ । ନିର୍ବାଚନ ପୂର୍ବରୁ ସାଧୁ ସନ୍ଥଙ୍କର ଏଭଳି ଆଶୀର୍ବାଦ ବିଜେଡି ଶିବିରକୁ ଉତ୍ସାହିତ କରିଛି । ଖାସକରି ସାଧୁ ସନ୍ଥ ମାନଙ୍କୁ ଭେଟୁଥିବା ବେଳେ ନବୀନ ମଧ୍ୟ ବେଶ ଖୁସି ଥିଲେ ।
୨୦୧୯ ନିର୍ବାଚନ ଜିତିବା ପାଇଁ ପ୍ରତ୍ୟେକ ଦଳ ଭିନ୍ନ ଭିନ୍ନ ରଣନୀତି ଆପଣାଉଛନ୍ତି । କିଏ ଅନ୍ୟ ଶିବିରର ସିପାହୀଙ୍କୁ ନିଜ ଶିବିରକୁ ଆଣି ବିଜୟ ପାଇଁ ପଥ ପରିଷ୍କାର କରୁଛି ତ ପୁଣି କେଉଁ ଦଳ ମେଣ୍ଟ କରି ବିଜୟ ବାନା ଉଡାଇବାକୁ ପ୍ରୟାସ ଚଳାଇଛି । ଆଉ ଏସବୁ ଭିତରେ ବିଜେଡି ସୁପ୍ରିମୋଙ୍କୁ ସାଧୁସନ୍ଥ ମାନଙ୍କ ଆଶୀର୍ବାଦ ଦଳୀୟ ନେତାଙ୍କ ମନୋବଳ ବୃଦ୍ଧି କରିଛି ।