ଥମୁନି ବିବାଦ । ହିଜାବକୁ ନେଇ ଏପରି କିଛି କହିଲେ ସାଧ୍ୱୀ ପ୍ରଜ୍ଞା ।

କନକ ବ୍ୟୁରୋ: ହିଜାବକୁ ନେଇ ବିବାଦ ତୁଟୁନଥିବାବେଳେ ଏହାକୁ ନେଇ ନେତା ମନ୍ତ୍ରୀ ମନ୍ତବ୍ୟ ପରେ ମନ୍ତବ୍ୟ ଦେବାରେ ଲାଗିଛନ୍ତି । ଏପରି ଏକ ସମ୍ବେଦନଶୀଳ ମନ୍ତବ୍ୟ ଦେଇଛନ୍ତି ବିଜେପି ନେତ୍ରୀ ତଥା ସାଂସଦ ପ୍ରଜ୍ଞା ସିଂ ଠାକୁର । ଯେଉଁମାନେ ନିଜ ଘରେ ଅସୁରକ୍ଷିତ ସେମାନେ ସେଠାରେ ହିଜାବ ପିନ୍ଧିବା ଉଚିତ୍, ବିଦ୍ୟାଳୟ ଏବଂ ମହାବିଦ୍ୟାଳୟରେ ଆବଶ୍ୟକ ନୁହେଁ ବୋଲି ଏକ ଜନସଭାକୁ ସମ୍ବୋଧନ କରିବା ସମୟରେ କହିଛନ୍ତି ସାଧ୍ୱୀ ପ୍ରଜ୍ଞା ।

ବିଜେପି ସାଂସଦ ପ୍ରଜ୍ଞା ସିଂ ଠାକୁର ଶିକ୍ଷାନୁଷ୍ଠାନରେ ଛାତ୍ରୀମାନେ ପିନ୍ଦୁଥିବା ହିଜାବକୁ ନେଇ ଆପତ୍ତି ଉଠାଇଛନ୍ତି । ବୁଧବାର ଭୋପାଳରେ ଏକ କାର୍ୟ୍ୟକ୍ରମରେ ଲୋକଙ୍କୁ ସମ୍ବୋଧିତ କରି  କହିଛନ୍ତି, "ଭାରତରେ ହିଜାବ ପିନ୍ଧିବାର ଆବଶ୍ୟକତା ନାହିଁ। ତୁମେ ତୁମ ଘରେ ହିଜାବ ପିନ୍ଧିବା ଉଚିତ୍। " ହିଜାବ ବିବାଦ ଉପରେ ପ୍ରତିକ୍ରିୟା ପ୍ରକାଶ କରି ସାଧ୍ୱୀ ପ୍ରଜ୍ଞା କହିଛନ୍ତି, ଯେତେବେଳେ ଛାତ୍ରମାନେ ବିଦ୍ୟାଳୟକୁ ଯାଆନ୍ତି, ସେମାନେ ବିଦ୍ୟାଳୟ ୟୁନିଫର୍ମ ପିନ୍ଧନ୍ତି ଏବଂ ଶିକ୍ଷାନୁଷ୍ଠାନର ଅନୁଶାସନ ଅନୁସରଣ କରିବା ଉଚିତ । ହିନ୍ଦୁ ଧର୍ମ ଶ୍ରେଷ୍ଠ ଧର୍ମର୍ । ଏହି ଧର୍ମରେ ମହିଳାଙ୍କୁ ପୂଜା କରାଯାଏ । ଏହି ଧର୍ମ ଏତେ ଉଚ୍ଚ ଓ ସଂସ୍କାରୀ ବିଚାର ଧାରାର ଯେ ହିନ୍ଦୁ ମହିଳାଙ୍କୁ ହିଜାବ ପିନ୍ଧିବାର କିଛି ଆବଶ୍ୟକତା ହିଁ ନାହିଁ । ବରଂ ହିଜାବ ସେହିମାନଙ୍କୁ ପିନ୍ଧିବା କଥା ଯେଉଁମାନଙ୍କର ଘରେ ହିଁ ବିପଦ ଅଛି । ଯେଉଁମାନଙ୍କ ଘରେ ହିଁ ସେମାନେ ଅସୁରକ୍ଷିତ ସେହିମାନେ ହିଜାବ ପିନ୍ଧନ୍ତୁ । କିନ୍ତୁ ବାହାରେ ଯେଉଁଠି ହିନ୍ଦୁମାନେ ଚଳପ୍ରଚଳ ହେଉଛନ୍ତି, ସେଠାରେ ସେମାନଙ୍କୁ ହିଜାବ ପିନ୍ଧିବାର କୌଣସି ଆବଶ୍ୟକତା ନାହିଁ । ଜ୍ଞାନର ମନ୍ଦିର ଶିକ୍ଷାନଷ୍ଠାନରେ ତ ହିଜାବର କିଛି ବି ଆବଶ୍ୟକତା ନାହିଁ’ ବୋଲି ପ୍ରଜ୍ଞା କହିଛନ୍ତି ।

କର୍ଣ୍ଣାଟକର କିଛି ଅଂଶରେ ବିଦ୍ୟାଳୟ ଏବଂ ମହାବିଦ୍ୟାଳୟରେ ଝିଅମାନେ ହିଜାବ ପିନ୍ଧିଥିବା ନେଇ ଉତ୍ତେଜନା ପୂର୍ଣ୍ଣ ବିବାଦ ମଧ୍ୟରେ ପ୍ରଜ୍ଞା ସିଂ ଠାକୁରଙ୍କ ମନ୍ତବ୍ୟ ଆସିଛି। ଗତ ମାସରୁ ଏହି ପ୍ରସଙ୍ଗରେ ସାରା ରାଜ୍ୟରେ ବ୍ୟାପକ ବିକ୍ଷୋଭ ପ୍ରଦର୍ଶନ କରାଯାଇଛି।