ଖେଳାଳୀଙ୍କ ସୁରକ୍ଷାକୁ ନେଇ ଚିନ୍ତାରେ ସଚିନ୍ । ହେଲମେଟ୍ ବାଧ୍ୟତାମୂଳକ କରିବାକୁ ଆଇସିସିକୁ କଲେ ଅପିଲ୍ ।
କନକ ବ୍ୟୁରୋ : ସ୍ପିନର ବୋଲର ହୋଇଥାନ୍ତୁ, କିମ୍ବା ଫାଷ୍ଟ ବୋଲର, ବ୍ୟାଟ୍ସମ୍ୟାନ ମାନେ ହେଲମେଟ୍ ପିନ୍ଧିବା ଜରୁରୀ । କୌଣସି ବି ଖେଳାଳୀ ମୈଦାନକୁ ବ୍ୟାଟିଂ ପାଇଁ ଗଲେ ମୁଣ୍ଡରେ ହେଲମେଟ୍ ପିନ୍ଧିବା ନିୟମକୁ ବାଧ୍ୟତାମୂଳକ କରାଯାଉ । ଅନ୍ତରାଷ୍ଟ୍ରୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ ବା ଆଇସିସିକୁ କିଛି ଏମିତି ଅପିଲ୍ କରିଛନ୍ତି ମାଷ୍ଟରବ୍ଲାଷ୍ଟର ସଚିନ୍ ତେନ୍ଦୁଲକର ।
Kanak News is now on WhatsApp
Join and get latest news updates delivered to you via WhatsApp
ବେଳେ ବେଳେ ଆମେ ଦେଖିଥାଉ ଯେ, ମ୍ୟାଚ ଚାଲିଥିବା ସମୟରେ ଯେତେବେଳେ, ସ୍ପିନର ବୋଲର ବୋଲିଂ କରିବାକୁ ଆସିଥାନ୍ତି, ସେତେବେଳେ ବ୍ୟାଟ୍ସମ୍ୟାନମାନେ ହେଲମେଟ୍ କାଢି ଟୋପି ପିନ୍ଧିଥାନ୍ତି । ତେବେ ମଙ୍ଗଳବାର ମୁମ୍ବାଇ ଇଣ୍ଡିଆନ୍ସ ଏବଂ ସନରାଇଜର୍ସ ହାଇଦ୍ରାବାଦ ମଧ୍ୟରେ ଖେଳାଯାଇଥିବା ମ୍ୟାଚରେ ହେଲମେଟର ଗୁରୁତ୍ୱପୂର୍ଣ୍ଣ ଭୂମିକା ଦେଖିବାକୁ ମିଳିଥିଲା ।
ମୁମ୍ବାଇ ଇନିଂସର ଶେଷ ଓଭରରେ କିରଣ ପୋଲାର୍ଡ ଆଉଟ୍ ହେବା ପରେ ବ୍ୟାଟିଂ କରିବାକୁ ଆସିଥିଲେ ଧବଲ କୁଲକର୍ଣ୍ଣୀ । ଶେଷ ବଲରେ ରନ୍ ପାଇଁ ଦୌଡୁଥିବା ବେଳେ ବଲ୍ ଆସି ସିଧା ତାଙ୍କ ହେଲମେଟର ସେଫ୍ଟି ଗିୟରରେ ବାଜିଥିଲା, ଯାହାକୁ ଭାଙ୍ଗିଯାଇ ମାଟିରେ ପଡିଥିଲା । ଯଦି ସେ ହେଲମେଟ୍ ପିନ୍ଧିନଥାନ୍ତେ, ତେବେ ହୁଏତ କିଛି ଗୋଟେ ବଡ ଅଘଟଣ ଘଟିବାର ଆଶଙ୍କା ରହିଥିଲା । ତେବେ ମ୍ୟାଚର ସେହି ସମୟର ଦୃଶ୍ୟ ନିଜ ଟ୍ୱିଟର ପେଜରେ ଅପଲୋଡ୍ କରିବା ସହ ମ୍ୟାଚରେ ବ୍ୟାଟ୍ସମ୍ୟାନମାନେ ହେଲମେଟ୍ ପିନ୍ଧିବାକୁ ବାଧ୍ୟତାମୂଳକ କରିବାକୁ ଆଇସିସିକୁ ଅପିଲ୍ କରିଛନ୍ତି ।