ଲକଡାଉନ ପାଇଁ ଘଟଗାଁ ପହଞ୍ଚି ପାରୁନଥିଲା ମାନସିକ ନଡିଆ । ରାସ୍ତାରେ ଗଡୁଥିଲା, ବସଷ୍ଟାଣ୍ଡରେ ପଚୁଥିଲା । ତାରିଣୀଙ୍କ ପାଖେ ନଡିଆ ଗାଡି ପହଞ୍ଚାଇଲେ ସବ୍ୟସାଚୀ ।
କନକ ବ୍ୟୁରୋ: ଯୁଆଡେ ଯାଉଛୁ ଯାଆ ଗାଡି ବାଲା ନଡିଆ ମୋ ନେଇଯିବୁ… ତାରିଣୀ ପାଖକୁ ନଡିଆଟିଏ ପଠାଇଲେ ଭକ୍ତଙ୍କ ମନରେ ଏ ଗୀତଟି ଆପଣାଛାଏଁ ଚାଲିଆସେ । ଛକ ଛକରେ, ବସଷ୍ଟାଣ୍ଡରେ ଭକ୍ତଙ୍କ ଭଳି ଘଟଗାଁ ଯିବାକୁ ଅପେକ୍ଷା କରିଥିବା ନଡିଆକୁ ଦେଖିଲେ ମନକୁ ଛୁଇଁଯାଏ ଏହି ଗୀତଟି । ଆଉ ଗାଡିବାଲାକୁ ଭକ୍ତଟିଏ ନଡିଆ ଦେଇ ମାଆ ତାରିଣୀକୁ କରେ ଦୂରରୁ ଦଣ୍ଡବତ…
Kanak News is now on WhatsApp
Join and get latest news updates delivered to you via WhatsApp
ମାଆଙ୍କ ପାଖକୁ ଯାଉଥିବା ସବୁ ନଡିଆ ପଛରେ ଥାଏ ଗୋଟେ ପରିବାରର ଆଶା, ଲୋକଙ୍କ ଭରସା । ସାରା ଓଡିଶାରୁ ମାଆଙ୍କ ପାଖକୁ ନଡିଆ ନେବାରେ ମାଧ୍ୟମ ସାଜନ୍ତି ଗାଡିବାଲା । କିନ୍ତୁ କରୋନା କଟକଣା ପାଇଁ ଯେତେବେଳେ ସବୁକିଛି ବନ୍ଦ ହୋଇଗଲା, ସାରା ରାଜ୍ୟରେ ତାଲା ପଡିଲା । ସେତେବେଳେ ଭକ୍ତ-ଭଗବାନ ମଝିରେ ଗାର ଟଣାହେଲା । ଭକ୍ତଟିଏ ନା ମାଆଙ୍କ ପାଖକୁ ଯାଇପାରିଲା ନା ତାର ନଡିଆ ପହଞ୍ଚିପାରିଲା । ଗାଡିଘୋଡା ବନ୍ଦ ଥିବାରୁ ସବୁ ଛକରେ ମାଆଙ୍କ ନଡିଆ ଲକଡାଉନ ସରିବାକୁ ଅପେକ୍ଷା କରି ରହିଲା ।
କିନ୍ତୁ ଏବେ ଆଉ ଆପଣଙ୍କ ଭାବର ନଡିଆ ଏଣେତେଣେ ପଡିବନି କି ବସଷ୍ଟାଣ୍ଡରେ ଗଡିବନି । ମାଆକୁ ହାତଟେକି ବଢେଇ ଦେଇଥିବା ନଡିଆ ଘଟଗାଁରେ ପହଞ୍ଚିବ, ମାଆ ପାଖରେ ଲାଗିବ । କାରଣ ଭକ୍ତ-ଭଗବାନ ମଝିରେ ଏବେ ସୂତ୍ରଧର ସାଜିଛନ୍ତି ଓଡିଶାର ସୁନାପୁଅ ସବ୍ୟସାଚୀ । ଭକ୍ତଙ୍କ ଭାବାବେଗକୁ ବୁଝି ସେମାନେ ଦେଇଥିବା ନଡିଆକୁ ଘଟଗାଁ ପଠାଇବାର ବ୍ୟବସ୍ଥା କରିଛନ୍ତି ଆଉ ତାଲାବନ୍ଦରେ ପଡି ରହିଥିବା ଭାବର ଶ୍ରୀଫଳକୁ ଟ୍ରକ ଯୋଗେ ତାରିଣୀ ପାଖକୁ ପଠାଇଛନ୍ତି ସବ୍ୟ ।
କଟକଣା ପାଇଁ ଦୀର୍ଘ ୮ ମାସରୁ ଅଧିକ ଦିନ ଧରି ମାନସିକ ନଡିଆ ପଡି ରହିଥିବାରୁ ଅନେକ ନଷ୍ଟ ହୋଇଯାଇଥିବା ବେଳେ ଅନେକ ଗଜା ହୋଇ ଗଛ ପାଲଟି ଗଲାଣି । କିଛି ପଚିଯାଇଥିବାରୁ ଦୁର୍ଗନ୍ଧ ହୋଇ ପରିବେଶ ଦୂଷିତ କରୁଥିଲା । ଯାହା ଦରଦୀ ବନ୍ଧୁ ସବ୍ୟସାଚୀଙ୍କୁ ବ୍ୟଥିତ କରିଥିଲା ଆଉ ସେ କାର୍ତ୍ତିକ ପୂର୍ଣ୍ଣମୀରେ ଏ ସମସ୍ତ ନଡିଆକୁ ଠିକଣା ଜାଗାରେ ପହଞ୍ଚାଇବାକୁ ବ୍ୟବସ୍ଥା କରିଥିଲେ । ଭୁବନେଶ୍ୱରରୁ ଭଗବାନଙ୍କ କାମର ଶୁଭାରମ୍ଭ ହୋଇଥିବା ବେଳେ ବରମୁଣ୍ଡା, ଫାୟାର ଷ୍ଟେସନ, ସିଆରପି ଛକ, ଆଚାର୍ଯ୍ୟବିହାର, ବାଣୀବିହାର ଓ ରସୁଲଗଡରୁ ନଡିଆ ଉଠାଯାଇଥିଲା । ଏମିତିକି କଟକ, ଚଣ୍ଡିଖୋଲ, ପାଣିକୋଇଲି ଛକରୁ ବି ଆଜି ନଡିଆ ଉଠିଥିଲା । ପ୍ରାୟ ୩୦୦ ବସ୍ତା ନଡିଆ ଟ୍ରକ ଯୋଗେ ଘଟଗାଁକୁ ପଠାଯାଇଛି ।
ଲକଡାଉନ ବେଳେ ପ୍ରବାସୀ ଶ୍ରମିକଙ୍କୁ ବିଦେଶରୁ ଆଣି ଜନ୍ମମାଟିରେ ଛାଡିବା ପରେ ଅନେକ ଗରିବ ଗୁରୁବା ଅସହାୟଙ୍କୁ ଅନେକ ସମୟରେ ସାହାଯ୍ୟ କରିଛନ୍ତି ସବ୍ୟ । ଆଉ ଏବେ ଲକଡାଉନ ପରେ ଭକ୍ତଙ୍କ ଭାବ ବୁଝି ଭକ୍ତ-ଭଗବାନ ମଝିରେ ଗୁଣ୍ଡୁଚି ମୁଷାଟିଏ ପରି ସମ୍ପର୍କର ଅଦୃଶ୍ୟ ସେତୁ ବାନ୍ଧିଛନ୍ତି ସବ୍ୟସାଚୀ । ଯାହା ପୁଣି ଥରେ ତାଙ୍କୁ ସାଲ୍ୟୁଟ୍ ମାରିବାକୁ ସୁଯୋଗଟିଏ ଦେଇଛି ।