ସ୍ୱାଭିମାନ କି ସମ୍ମାନର କଥା ନୁହେଁ, କର୍ମର ହେଲା ବିଜୟ। ପାଟକୁରାରେ ବାଜି ମାରିବା ପରେ ପ୍ରତିକ୍ରିୟା ରଖିଲେ ସାବିତ୍ରୀ ଅଗ୍ରୱାଲ
କନକ ବ୍ୟୁରୋ: ଶେଷରେ ଶେଷ ହୋଇଛି ବହୁ ଚର୍ଚ୍ଚିତ ପାଟକୁରା ଲଢେଇ । ଗତ ୨୦ ତାରିଖରେ ପାଟକୁରା ବିଧାନସଭା ଆସନରେ ପରୀକ୍ଷା ଦେଇଥିବା ପ୍ରାର୍ଥୀଙ୍କର ଆଜି ଆସିଛି ଫଳାଫଳ । ପ୍ରାୟ ୧୭ ହଜାର ୬ ଶହରୁ ଅଧିକ ଭୋଟ୍ ବ୍ୟବଧାନରେ ବିଜେପି ପ୍ରାର୍ଥୀ ବିଜୟ ମହାପାତ୍ରାଙ୍କୁ ହରାଇ ବାଜି ମାରିଛନ୍ତି ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲ । ଆଉ ଏହାସହ ବିଜେପିର ଭେଟରାନ ନେତା ବିଜୟଙ୍କର ବିଧାନସଭା ଫେରିବା ସ୍ୱପ୍ନ ଏକପ୍ରକାର ଧୂଳିସାତ୍ ହୋଇଛି । ତେବେ ପାଟକୁରା ଗଡ ହାତେଇବା ପରେ ବିଜେଡି ଶିବିରରେ ଆରମ୍ଭ ହୋଇଛି ସେଲିବ୍ରେସନ ।
Kanak News is now on WhatsApp
Join and get latest news updates delivered to you via WhatsApp
ତେବେ ବିରୋଧୀଙ୍କଠାରୁ ବିପୁଳ ଭୋଟ୍ ବ୍ୟବଧାନରେ ଆଗୁଆ ରହିଥିବା ତଥା ବିଜୟର ଦ୍ୱାରଦେଶରେ ଉପନୀତ ଥିବା ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲ ପାଟକୁରା ବିଜୟୀ ପାଇଁ ଦଳର ସୁପ୍ରିମୋ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇବା ସହ ଜିତିବାର ଶ୍ରେୟ ପାଟକୁରାବାସୀଙ୍କୁ ଦେଇଛନ୍ତି । ଏଥିସହିତ ସାବିତ୍ରୀ କହିଛନ୍ତି କି, ଦଳର ସୁପ୍ରିମୋ ମୋ ଉପରେ ଯେଉଁ ଆସ୍ଥା ଆଉ ଭରସା ରଖି ଟିକେଟ୍ ଦେଇଥିଲେ ସେହି ଭରସା ଆଉ ବିଶ୍ୱାସକୁ ମୁଁ ଅତୁଟ ରଖିବାକୁ ଚେଷ୍ଟା କରିଛି । ଏବେ ପାଟକୁରାରେ ନିଶ୍ଚୟ ଜିତିବି ବୋଲି ମୋର ପୂରା ଭରସା ଥିଲା । ପାଟକୁରାରେ କୌଣସି ସ୍ୱାଭିମାନ କି ସମ୍ମାନର ଜିତ୍ ହୋଇନି ବରଂ ଏଠି କର୍ମର ବିଜୟ ହୋଇଛି । ଯାହାକୁ ମୁଁ ଦୀର୍ଘ ୧୦ ବର୍ଷ ହେଲା ପାଟକୁରା ପାଇଁ କରିଆସିଥିଲି । ଲୋକେ ଚାହାଁନ୍ତି ତାଙ୍କର ଯିଏ ନେତା ହେବେ ସେ ତାଙ୍କ ସୁଖ ଦୁଃଖରେ ଠିଆ ହେବେ ।
ଏଥିସହିତ ବିଜୟ ପରେ ପାଟକୁରା ବାସୀଙ୍କ ସନ୍ଦେଶ ଦେଇ ସାବିତ୍ରୀ କହିଛନ୍ତି, ମୁଁ ସଂପୂର୍ଣ୍ଣ ରୂପେ ପାଟକୁରାବାସୀଙ୍କର । ଆଉ ପାଟକୁରାବାସୀ ହେଉଛନ୍ତି ମୋର । ତେବେ ପାଟକୁରାରେ ବିଜୟର ବାନା ଉଡାଇବାର ଶ୍ରେୟ ସେ ପାଟକୁରାବାସୀଙ୍କୁ ଦେବା ସହ ମାନ୍ୟବର ମୁଖ୍ୟମନ୍ତ୍ରୀଙ୍କୁ ଜଣାଇଛନ୍ତି ସାବିତ୍ରୀ ଅଗ୍ରୱାଲ ।