କନକ ବ୍ୟୁରୋ : ଭାରତ-ଦକ୍ଷିଣ ଆଫ୍ରିକା ତୃତୀୟ ଟେଷ୍ଟ ମ୍ୟାଚରେ ଭାରତ ଏବେ ସଙ୍କଟଜନକ ସ୍ଥିତିରେ ରହିଛି । ତୃତୀୟ ଦିନର ଖେଳ ଆରମ୍ଭରୁ ଟିମ୍ ଇଣ୍ଡିଆକୁ ଡବଲ ଝଟକା ଲାଗିଛି । ତୃତୀୟ ଦିନ ଖେଳ ଆରମ୍ଭର ପ୍ରଥମ ଓଭରରେ ହିଁ ଭାରତ ପୂଜାରାଙ୍କ ୱିକେଟ ହରାଇଥିଲା । ଆଉ ଏହି ୱିକେଟ ଦକ୍ଷିଣ ଆଫ୍ରିକା ପାଇଁ ବେଶ ଗୁରୁତ୍ୱପୂର୍ଣ୍ଣ ଥିଲା । କାରଣ ଥରେ ପୂଜାରା କ୍ରିଜରେ ଜମିଥିଲେ ତାଙ୍କୁ ପ୍ୟାଭିଲିୟନ ପଠାଇବା ଏତେ ସହଜ ହୋଇନଥାନ୍ତା । ତେଣୁ ପୂଜାରାଙ୍କୁ ସହଳ ଆଉଟ କରିବାକୁ ସ୍ୱତନ୍ତ୍ର ରଣନୀତି ସହ ମୈଦାନକୁ ଓହ୍ଲାଇଥିଲା ଦକ୍ଷିଣ ଆଫ୍ରିକା ଦଳ ।

Advertisment

ତୃତୀୟ ଦିନର ଖେଳ ଆରମ୍ଭରୁ ପୂଜାରାଙ୍କୁ ଆଉଟ କରିବାକୁ ଦକ୍ଷିଣ ଆଫ୍ରିକାର ଅଧିନାୟକ ଡିନ୍ ଏଲଗାର ଦ୍ରୁତ ବୋଲର ଜେନସେନଙ୍କୁ ବୋଲିଂ ଦେଇଥିଲେ । ଆଉ ରଣନୀତି ଅନୁଯାୟୀ, ପୂଜାରାଙ୍କ ବିପକ୍ଷରେ ଲେଗ ଗଲିରେ ଜଣେ ଫିଲଡର ରଖିଥିଲେ । ତୃତୀୟ ଦିନ ଖେଳ ଆରମ୍ଭର ଦ୍ୱିତୀୟ ବଲଟି ସଟ୍ ବାଉନ୍ସର ପକାଇଥିଲେ ଜେନସେନ । ଆଉ ଏହି ବଲକୁ ଡିଫେନ୍ସ କରିବାକୁ ଚେଷ୍ଟା କରିଥିଲେ ପୂଜାରା । କିନ୍ତୁ ବଲଟି ଗ୍ଲୋଭସରେ ବାଜି ଲେଗ ଗଲି ଅଞ୍ଚଳକୁ ଯାଉଥିଲା । ଆଉ ଏହି ସମୟରେ ସତେ ସୁପରମ୍ୟାନ୍ ସାଜି ଉଭା ହୋଇଥିଲେ କିଗାନ ପିଟରସନ । ଲେଗ ଗଲିରେ ଡ୍ରାଇଭ ମାରି ଶାନଦାର କ୍ୟାଚ୍ ଧରିଥିଲେ ପିଟରସନ । ଆଉ ପିଟରସନଙ୍କ ଏଭଳି କ୍ୟାଚ୍ ଦେଖି ସମସ୍ତେ ସ୍ତମ୍ଭୀଭୂତ ହୋଇଯାଇଥିଲେ । ଆଉ ପିଟରସନଙ୍କ ଏଭଳି ପ୍ରୟାସକୁ ଏବେ ଚାରିଆଡୁ ପ୍ରଂଶସା କରାଯାଉଛି ।

ପୂଜାରା ମାତ୍ର ୯ ରନ କରି ପ୍ୟାଭିଲିୟନ ଫେରିଥିବା ବେଳେ ରାହାଣେ ମଧ୍ୟ ବେଶୀ ସମୟ କ୍ରିଜରେ ତିଷ୍ଠି ପାରିନଥିଲେ । ରାହାଣେ ମାତ୍ର ୧ ରନ୍ କରି ରବାଡାଙ୍କ ଶିକାର ହୋଇଥିଲେ । ଆଉ ଏହି ଦୁଇ ବରିଷ୍ଠ ଖେଳାଳୀ ବାରମ୍ବାର ବିଫଳ ହେବା ପରେ ସୋସିଆଲ ମିଡ଼ିଆରେ ଉଭୟଙ୍କୁ ସମାଲୋଚନା କରାଯାଉଛି । ଉଭୟଙ୍କର ଏହା ଶେଷ ସିରିଜ ବୋଲି କହୁଛନ୍ତି ସୋସିଆଲ ମିଡ଼ିଆ ୟୁଜର୍ସ । ଏପରିକି ରାହାଣେଙ୍କ ସ୍ଥାନରେ ହନୁମା ବିହାରୀଙ୍କୁ ସ୍ଥାନ ଦିଆଯାଉ ବୋଲି କ୍ରିକେଟପ୍ରେମୀ ଦାବି କରିଛନ୍ତି ।