ୟୁକ୍ରେନରେ ରୁଷିଆ ସେନାର ନରସଂହାର: ୟୁକ୍ରେନ ରାଷ୍ଟ୍ରପତିଙ୍କ ଦାବି, ଇଜିୟୁମ ସହରରେ ମିଳିଛି ୪୪୦ଜଣଙ୍କ କବର
କନକ ବ୍ୟୁରୋ: ୟୁକ୍ରେନରେ ରୁଷିଆ ସେନାର ନରସଂହାର । ଇଜିୟୁମ ସହରେ ପୁଣି ଦେଖିବାକୁ ମିଳିଛି ବୁଚା ଓ ମାରିୟୁପୋଲ ପରି ନରସଂହାର । ୟୁକ୍ରେନ ରାଷ୍ଟ୍ରପତି ଭୋଲଦୋମିର ଜେଲେନସ୍କି ଦାବି କରିଛନ୍ତି ଯେ, ଇଜିୟୁମ ସହରରେ ୪୪୦ଜଣଙ୍କ କବର ମିଳିଛି । ଆଉ ଏହି ନରସଂହାର ଘଟାଇଛି ପୁଟିନ ବାହୀନି । ଏମାନଙ୍କୁ ନିର୍ଯାତନା ଦେଇ ହତ୍ୟା କରାଯାଇଥିବା କହିଛି ୟୁକ୍ରେନ । ଏହି ଶବ ଗୁଡିକର ହାତ, ଗୋଡ ହାଡ ଭାଙ୍ଗିଥିବା ବେଳେ କେତେକଙ୍କ ବେକରେ ରଶି ଲାଗିଥିବା ଦେଖିବାକୁ ମିଳିଛି । ୟୁକ୍ରେନ ଉତର-ପୂର୍ବ ଅଂଚଳର ଏହି ସହର ଦୀର୍ଘ ଦିନ ପର୍ଯ୍ୟନ୍ତ ରୁଷି ସେନା କବଜାରେ ଥିବା ବେଳେ ଏଇ କିଛି ଦିନ ହେଲା ୟୁକ୍ରେନ ସେନା ହାତକୁ ପୁଣି ଫେରିଛି ।
Kanak News is now on WhatsApp
Join and get latest news updates delivered to you via WhatsApp
ଜେଲେନସ୍କି କହିଛନ୍ତି, ରୁଷିଆ ସେନା ଯେଉଁ ସ୍ଥାନ ଛାଡି ଯାଇଛନ୍ତି ସେହିସବୁ ସ୍ଥାନରେ ବର୍ବରତାର ସବୁ ସୀମା ଟପିଯାଇଛନ୍ତି । ନରସଂହାର ଘଟାଇ ଚାଲିଛନ୍ତି ରୁଷିଆ ସେନା । ଆଉ ପ୍ରାଣ ହରାଇଛନ୍ତି ଶତାଧିକ ନୀରିହ ଜନସାଧାରଣ । ଦୀର୍ଘ ଦିନର ଲଢେଇ ପରେ ଇଜିୟୁମ ସହର ରୁଷିଆ ସେନା କବଜାକୁ ଯାଇଥିଲା । କିନ୍ତୁ ଘମାଘୋଟ ଆକ୍ରମଣ କରି ସେପ୍ଟେମ୍ବର ପ୍ରଥମ ସପ୍ତାହରେ ପୁଣି ଥରେ ଇଜିୟୁମ ସହରକୁ ନିଜ ଅକ୍ତିଆରକୁ ନେଇଛି ୟୁକ୍ରେନ ସେନା । ଇଜିୟୁମର ଏକ ଜଙ୍ଗଲ କବରସ୍ଥଳୀରେ ପରିଣତ ହୋଇଥିବା ଦେଖିବାକୁ ମିଳିଛି । ଏହା ଦେଖିବା ପରେ ୟୁକ୍ରେନ ଅଧିକାରୀ ଏହି ଶବଗୁଡିକ ବାହାର କରିଛନ୍ତି । ଏହି ନରସଂହାର ଘଟଣାକୁ ସାରା ବିଶ୍ୱରେ ସମାଲୋଚନା କରାଯାଇଛି । ଅପରପକ୍ଷରେ ୟୁକ୍ରେନ ରାଷ୍ଟ୍ରପତି ଭୋଲଦୋମିର ଜେଲେନସ୍କିଙ୍କ ଏପରି ଅଭିଯୋଗକୁ ଖଣ୍ଡନ କରିଛି ରୁଷିଆ । ଗତ ୭ମାସ ଧରି ୟୁକ୍ରେନ ଓ ରୁଷିଆ ମଧ୍ୟରେ ଲଢେଇ ଜାରି ରହିଛି ।