କିବରେ ଥିବା ଭାରତୀୟଙ୍କ ପାଇଁ ଆଲର୍ଟ ଜାରି : କେତେବେଳେ କିଛି ବି ଘଟିପାରେ; ଆଜି ହିଁ ତୁରନ୍ତ କିବ୍ ଛାଡିବାକୁ ନିର୍ଦ୍ଦେଶ

କନକ ବ୍ୟୁରୋ : ୟୁକ୍ରେନ୍ ଯୁଦ୍ଧକୁ ନେଇ ଭାରତ ସରକାର ବଡ ନିଷ୍ପତ୍ତି ନେଇଛନ୍ତି । କିବରେ ଥିବା ଭାରତୀୟଙ୍କ ପାଇଁ ଆଲର୍ଟ ଜାରି କରାଯାଇଛି । କେତେବେଳେ କିଛି ବି ଘଟିପାରେ । ଆଜି ହିଁ ତୁରନ୍ତ କିବ୍ ଛାଡିବାକୁ ନିର୍ଦ୍ଦେଶ ଦିଆଯାଇଛି । ଟ୍ରେନ୍ ହେଉ କି ବସ୍ ଯେ କୌଣସି ପ୍ରକାର ବାହାରି ଆସିବାକୁ ଭାରତ ସରକାରଙ୍କ ପକ୍ଷରୁ ନିର୍ଦ୍ଦେଶ ହୋଇଛି । ଏହି ନିର୍ଦ୍ଦେଶ ବାବଦରେ ଦୂତାବାସ ଅବଗତ କରିଛି ।

ସେପଟେ, ୟୁକ୍ରେନରୁ ଏୟାରଲିଫ୍ଟ ହେବେ ଭାରତୀୟ । ଏଥିପାଇଁ ଭାରତୀୟ ବାୟୁସେନାକୁ ନିର୍ଦ୍ଦେଶ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏୟାରଲିଫ୍ଟ କରିବା ପାଇଁ ଅପରେସନ ଗଙ୍ଗାରେ ସାମିଲ ହେବ ହେବ ସି-୧୭ ବିମାନ । ୟୁକ୍ରେନରେ ପରିସ୍ଥିତି ଧିରେଧିରେ ଗମ୍ଭୀର ହେବାରେ ଲାଗିଥିବାବେଳେ ସେଠାରେ ଫସିଥିବା ନାଗରିକଙ୍କୁ ନେଇ ଚିନ୍ତିତ ହୋଇପଡିଛନ୍ତି ଭାରତ ସରକାର ।

ଆଜି ଏକ ଗୁରୁତ୍ୱପୂର୍ଣ୍ଣ ଘଟଣାକ୍ରମରେ ରାଷ୍ଟ୍ରପତି ରାମନାଧ କୋବିନ୍ଦଙ୍କୁ ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ୟୁକ୍ରେନର ସ୍ଥିତି ସଂପର୍କରେ ରାଷ୍ଟ୍ରପତିଙ୍କୁ ଅବଗତ କରିଛନ୍ତି ମୋଦୀ । ଏପରିକି ୟୁକ୍ରେନରେ ଫସିଥିବା ଭାରତୀୟଙ୍କୁ ଫେରାଇ ଆଣିବା ପାଇଁ ସରକାର କଣସବୁ ପଦକ୍ଷେପ ନେଇଛନ୍ତି, ସେ ବାବଦରେ ଅବଗତ କରାଇଥିବା ଜଣାପଡିଛି ।