କନକ ବ୍ୟୁରୋ : ଋଶରେ ସେପ୍ଟେମ୍ବର ୧୭ ତାରିଖରୁ ଆରମ୍ଭ ହୋଇଥିବା ୩ ଦିନିଆ ସଂସଦ ନିର୍ବାଚନ ପାଇଁ ଆଜି ଭୋଟ ଦାନର ଶେଷ ତାରିଖ । ହେଲେ ସବୁଠାରୁ ବଡକଥା ପ୍ରଥମଥର ପାଇଁ ଦୁଇଜଣ ମହାକାଶଚାରୀ ମହାକାଶରେ ଥାଇ ବି ଭୋଟ ପ୍ରଦାନ କରିଛନ୍ତି । ସେ ମହାକାଶରୁ ନିଜ ପଶନ୍ଦର ପ୍ରାର୍ଥୀଙ୍କ ପାଇଁ ଭୋଟ ଦେଇଛନ୍ତି । ମହାକାଶରେ ଥାଇ ମତଦାନ କରିଥିବା ଏହି ଦୁଇଜଣ ମହାକାଶଚାରୀ ହେଉଛନ୍ତି ଓଲେଗ ନୋବିସ୍ତକି ଓ ୟୋତ୍ର ଦୁବେବ । ଏହି ଦୁଇଜଣ ଶୁକ୍ରବାର ଦିନ ଅନଲାଇନ ଭୋଟିଂରେ ଭାଗ ନେଇଥିଲେ । ଏନେଇ ଅନ୍ତରୀକ୍ଷ ଏଜେନ୍ସି Roscosmos ଏକ ଭିଡିଓ ଜାରି କରି ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମହାକାଶଚାରୀ ଓଲେଗ ନୋବିସ୍ତକି କହିଛନ୍ତି କି ମହାକାଶରେ ତାଙ୍କ ପାଖରେ ଇଲେକ୍ଟ୍ରୋନିକ୍ସ ଭୋଟିଂ ପାଇଁ ବ୍ୟାଲେଟ ପେପର ମହଜୁଦ ରହିଛି । ତେଣୁ ଏହାମାଧ୍ୟମରେ ଆମେ ବି ଆମର ମତଦାନ କରିପାରିଛୁ । କହିରଖୁ କି ସଂସଦୀୟ ନିର୍ବାଚନରେ ଋଷ ଲୋକଙ୍କ ଅର୍ଥ ବ୍ୟବସ୍ଥା, ଅସହଯୋଗ ଉପରେ କାର୍ଯ୍ୟାନୁଷ୍ଟାନ ଓ କରୋନା ମହାମାରୀ ପରିଚାଳନାରେ ସରକାରଙ୍କ ବିଫଳତାକୁ ନେଇ ଲୋକଙ୍କ ପକ୍ଷ ରଖିବାକୁ ଏହା ଏକ ମଂଚ ପ୍ରସ୍ତୁତ କରିପାରେ । ଆଗକୁ ଅନୁଷ୍ଠିତ ହେବାକୁ ଥିବା ରାଷ୍ଟ୍ରପତି ନିର୍ବାଚନ ପୂର୍ବରୁ ଏହି ସଂସଦୀୟ ନିର୍ବାଚନ ଆମେରିକା ରାଜନୀତିରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ ବୋଲି କୁହାଯାଉଛି ।
ନିର୍ବାଚନର ପ୍ରଥମ ଦିନରେ ଋଷ ରାଷ୍ଟ୍ରପତି ପୁତିନ ଭୋଟ ଦେଇଥିଲେ । ଜେଲରେ ବନ୍ଦ ଥିବା ପୁତିନଙ୍କ ମୁଖ୍ୟ ବିରୋଧୀ ନବେଲନୀ ବି ନିଜ ପକ୍ଷରୁ ପ୍ରାର୍ଥୀଙ୍କୁ ଭୋଟ ଦେବାକୁ ଭୋଟରଙ୍କୁ ଅନୁରୋଧ କରିଛନ୍ତି । ନବେଲନୀଙ୍କ ସହଯୋଗୀମାନେ ‘ସ୍ମାର୍ଟ ଭୋଟିଂ ’ ନାମରେ ଏକ ଆପ୍ ବି ବିକଶିତ କରିଛନ୍ତି । ମତଦାନ ପୂର୍ବରୁ ଗୁରୁବାର ଦିନ ଆପେଲ ଓ ଗୁଗୁଲ ପ୍ଲେ ଷ୍ଟେରରୁ ଏହି ଆପକୁ ହଟାଇ ଦିଆଯାଇଛି । ଏହାସହ ଋଷ କମ୍ୟୁନିଷ୍ଟ ପାର୍ଟି ବି ଗତଥର ତୁଳନାରେ ଏଥର ୧୯ ପ୍ରତିଶତ ଅଧିକ ଭୋଟ ପାଇବ ବୋଲି ଆଶା କରିଛି ।