୪ ଦିନରେ ବିଧାନସଭା ଚାଲିଛି ମୋଟ୍ ୫୨ ମିନିଟ୍ : ବିରୋଧୀଙ୍କ ମମିତା ଓ ଶାସକ ଦଳର ଦରଦାମ ବୃଦ୍ଧି ପ୍ରସଙ୍ଗରେ ଜାରି ରହିଛି ହଙ୍ଗାମା

ମନ୍ତ୍ରୀଙ୍କ ବହିଷ୍କାର ଦାବି ମହାବାତ୍ୟା ରୂପ ନେବ ବୋଲି ବିରୋଧୀଦଳ ଉପନେତା କହିଥିବାରୁ ଆଜି ବି ଗୃହରେ ଦେଖାଦେଇପାରେ ଅଚଳାବସ୍ଥା

59

କନକ ବ୍ୟୁରୋ : ଆଗୁଆ ବନ୍ଦ ହୋଇପାରେ ବିଧାନସଭା ଅଧିବେଶନ । ଗୃହରେ ହଟୁନି ଅଚଳାବସ୍ଥା । ନିଜ ନିଜ ଜିଦ୍ରେ ଅଟଳ ଅଛନ୍ତି ଉଭୟ ବିରୋଧୀ ଓ ଶାସକ ଦଳ । ୪ ଦିନରେ ମାତ୍ର ୫୨ ମିନିଟ୍ ଚାଲିଛି ଗୃହ କାର୍ଯ୍ୟ । ଗୃହ କାର୍ଯ୍ୟ ସ୍ୱଭାବିକ ସ୍ଥିତିକୁ ଫେରାଇ ଆଣିବା ପାଇଁ କୌଣସି ସ୍ତରରେ ଉଦ୍ୟମ କରାଯାଇନାହିଁ । ମମିତା ମେହେର ହତ୍ୟାକାଣ୍ଡ ପ୍ରସଙ୍ଗରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବିରେ ବିରୋଧୀ ଅଟଳ ଅଛନ୍ତି ।

ମୁଖ୍ୟମନ୍ତ୍ରୀ ଏହି ପ୍ରସଙ୍ଗରେ ବିବୃତି ରଖିଥିଲେ ମଧ୍ୟ ବିରୋଧୀ ଶାନ୍ତ ହେବା ବଦଳରେ ନିଜ ପ୍ରତିବାଦକୁ ନୂଆ ନୂଆ ତରିକାରେ ଆହୁରି ଜୋରଦାର କରୁଛନ୍ତି । ଆଜି ବିଧାନସଭାରେ ପ୍ରତିବାଦ ତୀବ୍ର ହେବ ଓ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ପ୍ରସଙ୍ଗ ମହାବାତ୍ୟା ରୂପ ନେବ ବୋଲି ବିରୋଧୀ ଦଳ ଉପନେତା ଚେତାବନୀ ଦେଇଛନ୍ତି । କଂଗ୍ରେସ ମଧ୍ୟ ଆନ୍ଦୋଳନକୁ ଆହୁରି ଜୋରଦାର କରିବ ବୋଲି କହିଛି । ସେପଟେ ଶାସକ ଦଳ ଦର ଦାମ ବୃଦ୍ଧି ପ୍ରସଙ୍ଗରେ ବିକ୍ଷୋଭ ପ୍ରଦର୍ଶନ କରୁଛି । ତେଣୁ ଆଜି ବି ଗୃହରେ ଅଚଳାବସ୍ଥା ଲାଗି ରହିପାରେ ।

– ପ୍ରଥମ ଦିନ ଦ୍ୱିତୀୟାର୍ଦ୍ଧରେ ହୋହଲ୍ଲା ଭିତରେ ଅତିରିକ୍ତ ବଜେଟ୍ ଉପସ୍ଥାପନ ହୋଇଛି
– ଦିନକୁ ୫ ଘଂଟା ଲେଖାଏଁ ଗୃହ କାର୍ଯ୍ୟ କରିବାକୁ ସର୍ବଦଳୀୟ ବୈଠକରେ ହୋଇଥିଲା ନିଷ୍ପତି
– ତିନି ଦିନରେ ୧୫ ଘଂଟା ଗୃହ କାର୍ଯ୍ୟ ହେବା କଥା
– ହେଲେ ତିନି ଦିନରେ ମାତ୍ର ୨୭ ମିନିଟ୍ ଚାଲିଛି ଗୃହ କାର୍ଯ୍ୟ
– ୪ ଦିନରେ ମୋଟ୍ ୫୨ ମିନିଟ୍ ଚାଲିଛି ଗୃହ କାର୍ଯ୍ୟ
– ଏପର୍ଯ୍ୟନ୍ତ ସର୍ବଦଳୀୟ ବୈଠକ ଡାକୁନାହାନ୍ତି ବାଚସ୍ପତି
– ପରସ୍ପର ଜିଦ୍ରେ ଅଡି ବସିଛନ୍ତି ବିରୋଧୀ ଓ ଶାସକ ଦଳ
– ମମିତା ପ୍ରସଙ୍ଗରେ ମନ୍ତ୍ରୀ ଦିବ୍ୟଶଙ୍କରଙ୍କ ବହିଷ୍କାର ଦାବି କରୁଛନ୍ତି ବିରୋଧୀ
– ଆଲୋଚନା ପାଇଁ ପ୍ରସ୍ତୁତ ଥିବା କହି ଦର ବୃଦ୍ଧି ପ୍ରସଙ୍ଗରେ ଗୃହକୁ ଅଚଳ କରୁଛି ବିଜେଡି
– ଅଚଳାବସ୍ଥା ଦୂର ପାଇଁ ମୁଖ୍ୟମନ୍ତ୍ରୀ ହସ୍ତକ୍ଷେପ କରି ସର୍ବଦଳୀୟ ବୈଠକ ଡାକି ନାହାନ୍ତି
– ହୋହଲ୍ଲା ଯୋଗୁ ଶେଷ ପର୍ଯ୍ୟନ୍ତ ବିଧାନସଭା ଚାଲିବାକୁ ନେଇ ସନ୍ଦେହ
– ଅତିରକ୍ତ ବ୍ୟୟ ମଞ୍ଜୁରୀ ବିଲ୍ ପାରିତ ପରେ ଯେକୌଣସି ସମୟରେ ବନ୍ଦ ହୋଇପାରେ ବିଧାନସଭା