ରାଉରକେଲା ଜିଏସଟି ଠକେଇ ମାମଲା : ବାସନ୍ତୀ କଲୋନୀ ଅଂଚଳରୁ ସନ୍ତୋଷ ଗୁପ୍ତା ଗିରଫ

ଜାଲ କାଗଜପତ୍ରରେ କାରବାର ଦର୍ଶାଇ ଜିଏସଟି ଠକେଇରେ ଥିଲା ସଂପୃକ୍ତି; ୧୪ ଦିନିଆ ରିମାଣ୍ଡରେ ନେଲା ଜିଏସଟି ଗୁଇନ୍ଦା ଟିମ୍

68

କନକ ବ୍ୟୁରୋ : ରାଉରକେଲା ଜିଏସଟି ଠକେଇ ମାମଲାରେ ତଦନ୍ତକାରୀ ଟିମକୁ ମିଳିଛି ସଫଳତା । ବହୁକୋଟି ଟଙ୍କା ଠକେଇ ମାମଲାରେ ଜଣକୁ ଗିରଫ କରିଛି କେନ୍ଦ୍ରୀୟ ଜିଏସଟି ଗୁଇନ୍ଦା ବିଭାଗ । ଗିରଫ ଅଭିଯୁକ୍ତ ରାଉରକେଲା ବାସନ୍ତୀ କଲୋନୀ ଅଂଚଳର ସନ୍ତୋଷ କୁମାର ଗୁପ୍ତା । ୨୬୨ କୋଟି ଟଙ୍କାର ଜିଏସଟି ଠକେଇ ଘଟଣାରେ ତାଙ୍କର ସଂପୃକ୍ତି ଥିବା ଜଣାପଡିଛି ।

ସନ୍ତୋଷ ନକଲି ବ୍ୟବସାୟିକ ସଂସ୍ଥା, ଜାଲି ଜିଏସଟି ନଂବର, ଜାଲ ଇନଭଏସ ଓ ଜାଲ ବ୍ୟାଙ୍କ ଆକାଉଂଟ ମାଧ୍ୟମରେ ୨୬୨ କୋଟିର କାରବାର ଦର୍ଶାଇ ଇନପୁଟ୍ ଟାକ୍ସ ବାବଦକୁ ୪୦ କୋଟି ୬୬ ଲକ୍ଷ ଟଙ୍କା ହଡପ୍ କରିଥିବା ଜଣାପଡିଛି । ସନ୍ତୋଷଙ୍କୁ ଗିରଫ ପରେ ରାଉରକେଲା ଏସଡିଜେଏମ କୋର୍ଟରେ ହାଜର କରାଯାଇ ୧୪ ଦିନିଆ ରିମାଣ୍ଡରେ ନେଇଛି ତଦନ୍ତକାରୀ ଟିମ୍ । ବର୍ତମାନ ସୁଦ୍ଧା ରାଉରକେଲା ବହୁ କୋଟି ଟଙ୍କାର ଜିଏସଟି ଠକେଇ ଘଟଣାରେ ୯ ଜଣଙ୍କୁ ଗିରଫ କରାଗଲାଣି ।

ଗତ କିଛି ଦିନ ହେଲା ଅଭିଯୁକ୍ତ ସନ୍ତୋଷଙ୍କୁ ପଚରାଉଚରା ଜାରି ରହିଥିଲା। ସନ୍ତୋଷଙ୍କ ଲିଙ୍କ୍‌ରେ ଆଉ କିଛି ଠକ ସାମିଲଥିବା ଜଣାପଡ଼ିଛି। ସନ୍ତୋଷ ଗ୍ୟାଙ୍ଗ୍‌ର ଅନ୍ୟ ଅଭିଯୁକ୍ତମାନଙ୍କୁ ଗିରଫ କରିବାକୁ ବିଭାଗ ପ୍ରକ୍ରିୟା ଆରମ୍ଭ କରିଦେଇଛି। ପୂର୍ବରୁ ଗୁପଚୁପ ବିକାଳୀ, ଅଟୋ ଡ୍ରାଇଭର, ଦିନମଜୁରିଆ, ଜଳଖିଆ ଦୋକାନୀ, କଲେଜ ପଢୁଆ ଛାତ୍ରଛାତ୍ରୀ, ଗୃହିଣୀଙ୍କ ନାଁରେ ଜାଲ୍‌ ଆକାଉଣ୍ଟ୍‌ ଖୋଲି ଆଇଟିସି ଅର୍ଥ ହଡ଼ପ କରାଯାଇଛି। ‘ଜାଲ କାଗଜପତ୍ରରେ ଅଭିଯୁକ୍ତ ୨୬୧ କୋଟିର ବେପାର ଦର୍ଶାଇ ୪୪.୬୬ କୋଟି ଟଙ୍କା ଜିଏସ୍‌ଟି ଆଇଟିସି ଠକିଛନ୍ତି। ଏହି ମାମଲାରେ ଆଉ କିଏ କିଏ ସାମିଲ ହୋଇଛନ୍ତି, ତା’ର ତଦନ୍ତ ଜାରି ରହିଛି। ଅଭିଯୁକ୍ତକୁ ୧୪ ଦିନିଆ ରିମାଣ୍ଡ୍‌ରେ ନିଆଯାଇଥିବା କେନ୍ଦ୍ରୀୟ ଜିଏସ୍‌ଟି ଡେପୁଟି ଡିରେକ୍ଟର କୁନାଲ କୁମାର ସୂଚନା ଦେଇଛନ୍ତି।
୨୦୧୭ ଜୁଲାଇ ମାସରୁ ଜିଏସ୍‌ଟି ଲାଗୁ ହୋଇଥିଲା। ଜିଏସ୍‌ଟି ଲାଗୁ ହେବାର ମାତ୍ର ୩/୪ ମାସ ପରେ ଇସ୍ପାତସହରରେ ଜିଏସ୍‌ଟି ଆଇଟିସି ଅର୍ଥ ଲୁଟ୍‌ ପ୍ରକ୍ରିୟା ଆରମ୍ଭ ହୋଇଯାଇଥିଲା। ପୂର୍ବରୁ ଟ୍ୟାକ୍ସ ଠକିବାରେ ସିଦ୍ଧହସ୍ତ କିଛି ଅସାଧୁ ବ୍ୟବସାୟୀ ଏଥିରେ ସାମିଲ ହୋଇଯାଇଥିଲେ। ଏଭଳି ଜିଏସ୍‌ଟି ଠକି ଏବେସୁଦ୍ଧା‌ ୯ ଜଣ ଅଭିଯୁକ୍ତ ହୋଇସାରିଛନ୍ତି। ଏଭଳି ଚଞ୍ଚକତା କରି ୨୦୧୮ ମସିହା ଅକ୍ଟୋବର ୧୨ ତାରିଖରେ ରାଉରକେଲାରୁ ପ୍ରଥମଥର ପାଇଁ ୨ ଜଣ ଗିରଫ ହୋଇଥିଲେ। ପ୍ରାୟ ୨୦ କୋଟି ଠକିଥିବା ଅଭିଯୋଗରେ ନାରାୟଣ ଖୈତାନ ଓ ସଞ୍ଜୀବ ସିଂହ ଗିରଫ ହୋଇଥିଲେ। ଏହାପରେ କମଳ ପସାରୀ, ମାନସ ବରାଳ, ରାଜେଶ ମିଶ୍ର, ଅମିତ ବେରିୱାଲ, ସୁବାଷ ସ୍ବାଇଁ, କାଶ୍ମୀରା ଅଗ୍ରୱାଲ ଗିରଫ ହୋଇଥିଲେ। ଏହାସହ ପ୍ରାୟ ୬/୭ ଜଣ ଠକ ଫେରାର ଅଛନ୍ତି।