କନକ ବ୍ୟୁରୋ : ଆଇପିଏଲରେ ସର୍ବାଧିକ ଥର ଚାମ୍ପିୟନ ହୋଇଥିବା ମୁମ୍ବାଇ ଇଣ୍ଡିଆନ୍ସ ଚଳିତଥର ଆଇପିଏଲରେ ନୈରାଶ୍ୟଜନକ ପ୍ରଦର୍ଶନ ଜାରି ରଖିଛି । ଲାଗୁଛି ସତେ ଯେପରି ଚଳିତଥର ଜିତିବା ଭୁଲି ଯାଇଛି ମୁମ୍ବାଇ ଇଣ୍ଡିଆନ୍ସ । ଚଳିତ ଆଇପିଏଲର ପ୍ରଥମ ୩ଟି ମ୍ୟାଚରେ ମାତ୍ ଖାଇଛି ମୁମ୍ବାଇ । ଆଉ ଏବେ କମବ୍ୟାକ୍ କରିବାକୁ ଉଦ୍ୟମ ଆରମ୍ଭ କରିଛି । ଆଉ ଏଥିପାଇଁ ଖେଳାଳୀଙ୍କୁ ଗୁରୁମନ୍ତ୍ର ଦେଇଛନ୍ତି କ୍ୟାପଟେନ ରୋହିତ ଶର୍ମା ।

Advertisment

କେକେଆର ବିପକ୍ଷରେ ପରାଜିତ ହେବା ପରେ ଟିମ୍ ବୈଠକରେ ରୋହିତ କହିଛନ୍ତି, ମୁମ୍ବାଇ ଖେଳାଳୀଙ୍କ ମଧ୍ୟରେ ଜିତିବାର ଭୋକ ମରିଗଲାଣି । ଏଥିପାଇଁ କୌଣସି ଜଣେ ଖେଳାଳୀ ଦାୟୀ ନୁହଁନ୍ତି । ଏହି ପରାଜୟ ପାଇଁ ଆମେ ସମସ୍ତେ ଦାୟୀ । କାରଣ ଆମେ ସମସ୍ତେ ଏକା ସାଙ୍ଗରେ ଜିତୁ ଓ ଏକାସାଙ୍ଗରେ ହାରୁ । ତେଣୁ ପ୍ରତି ଖେଳାଳୀଙ୍କ ମନରେ ଏବେ ଜିତିବା ପାଇଁ ଭୋକ ରହିବା ଆବଶ୍ୟକ ।

ଏହାସହ ରୋହିତ କହିଛନ୍ତି, ଯେତେବେଳେ ଆମେ ଖେଳୁ ଖାସକରି ଏହି ଆଇପିଏଲ ଭଳି ଟୁର୍ଣ୍ଣାମେଣ୍ଟରେ । ଏହା ବେଶ ଗୁରୁତ୍ୱପୂର୍ଣ୍ଣ ହୋଇ ଯାଇଥାଏ । କାରଣ ଏଠାରେ ଭିନ୍ନ ଭିନ୍ନ ପ୍ରତିଦ୍ୱନ୍ଦ୍ୱୀ ଟିମ ଥାଏ । ପ୍ରତି ଟିମ୍ ଭିନ୍ନ ଭିନ୍ନ ରଣନୀତି ସହ ମୈଦାନକୁ ଓହ୍ଳାଇଥାନ୍ତି । ତେଣୁ ପ୍ରତି ଟିମ ଠାରୁ ଆମକୁ ଶକ୍ତିଶାଳୀ ହେବାକୁ ପଡିବ । ଉଭୟ ବୋଲିଂ ଓ ବ୍ୟାଟିଂରେ । ତେବେ ମ୍ୟାଚକୁ ନେଇ ଚିନ୍ତିତ ହେବାର ଆବଶ୍ୟକତା ନାହିଁ । ବାସ୍ କେବଳ ଏକାଠି ହୋଇ ଖେଳିବାର ଆବଶ୍ୟକତା ରହିଛି । କାରଣ ଏହା ହିଁ ଫଳାଫଳକୁ ପ୍ରଭାବିତ କରିଥାଏ ।

ଏହି ୩ ମ୍ୟାଚରେ ଆମେ କିଛି ଭଲ ଖେଳ ମଧ୍ୟ ଖେଳିଛୁ । କିନ୍ତୁ ଆଗାମୀ ମ୍ୟାଚରେ ଆମକୁ ଛୋଟ ଛୋଟ ଜିନିଷକୁ ବୁଝିବାକୁ ପଡିବ । ମ୍ୟାଚ୍ ଭିତରେ ହିଁ ପ୍ରତିଟି ଓଭରକୁ ନେଇ ଭାବିବାକୁ ହେବ । ଏହି ଓଭରରେ କଣ କରିହେବ, କେଉଁ ରଣନୀତି ସହ ଖେଳିହେବ ସେ ବାବଦରେ ପଡିଆରେ ହିଁ ଭାବିବାକୁ ପଡିବ । ଆଉ ସମସ୍ତେ ଏକତ୍ରୀତ ହୋଇ ଖେଳିଲେ ଏହାର ପ୍ରଭାବ ଟିମର ଫଳାଫଳ ଉପରେ ନିଶ୍ଚୟ ପଡିବ ।ଚଳିତ ଆଇପିଏଲରେ ମୁମ୍ବାଇ ଏଯାବତ ୩ଟି ମ୍ୟାଚ୍ ଖେଳିଥିବା ବେଳେ ପ୍ରତି ମ୍ୟାଚରେ ପରାଜିତ ହୋଇଛି । ଆସନ୍ତାକାଲି ବାଙ୍ଗାଲୋର ବିପକ୍ଷରେ ଚତୁର୍ଥ ମ୍ୟାଚ୍ ଖେଳିବ ମୁମ୍ବାଇ ।