ରୋହିତ ପୂଜାରୀ ହେଲେ ସରକାରୀ ଉପ-ମୁଖ୍ୟ ସଚେତକ । ପ୍ରଣବଙ୍କ ବଦଳରେ ରେଢାଖୋଲ ବିଧାୟକଙ୍କୁ ମିଳିଲା ଦାୟିତ୍ୱ ।
ପଂଚମ ପାଳିକୁ କ୍ଷମତାକୁ ଆସିବା ପରେ ଉଭୟେ ରୋହିତ ପୂଜାରୀ ଓ ପ୍ରଣବ ବଳବନ୍ତରାୟ ମନ୍ତ୍ରୀ ପଦ ପାଇଁ ଆଶାୟୀ ଥିଲେ । ପ୍ରଣବଙ୍କୁ ସରକାରୀ ପଦ ପଦବୀ ମିଳିଥିବା ବେଳେ ରୋହିତ ବାଦ ପଡିଥିଲେ ।
କନକ ବ୍ୟୁରୋ: ପ୍ରଣବ ଗଲେ, ରୋହିତ ଆସିଲେ । ବିଧାନସଭାରେ ସରକାରୀ ଦଳର ଉପ – ମୁଖ୍ୟ ସଚେତକ ଭାବେ ଏଣିକି ଦାୟିତ୍ୱ ତୁଲାଇବେ ରେଢାଖୋଲ ବିଧାୟକ ରୋହିତ ପୂଜାରୀ । ଏନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ବିଧିବଦ୍ଧ ଭାବେ ସୂଚନା ଦିଆଯାଇଛି । ରୋହିତଙ୍କ ପୂର୍ବରୁ ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟ ଏହି ଦାୟିତ୍ୱ ତୁଲାଉଥିଲେ ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼ କଥା ହେଲା, ବିଜେଡି ପଞ୍ଚମ ଥର ପାଇଁ ରାଜ୍ୟରେ ସରକାର ଗଢ଼ିବା ପରେ ଗତ ଜୁନ୍ ୭ ତାରିଖରେ ଧର୍ମଶାଳା ବିଧାୟକ ପ୍ରଣବ ବଳବନ୍ତରାୟଙ୍କୁ ବିଧାନସଭାରେ ସରକାରୀ ଦଳର ଉପ-ମୁଖ୍ୟ ସଚେତକ ଦାୟିତ୍ୱ ପ୍ରଦାନ କରିଥିଲେ ବିଜେଡି ସୁପ୍ରିମୋ । ହେଲେ ଠିକ୍ ୨ ମାସପରେ ପୁଣି ପ୍ରଣବଙ୍କ ସ୍ଥାନରେ ରୋହିତଙ୍କୁ ଏହି ଦାୟିତ୍ୱ ନ୍ୟସ୍ତ କରିଛନ୍ତି ନବୀନ । ତେବେ ହଠାତ ଏଭଳି ପରିବର୍ତ୍ତନ ପଛର କାରଣ କଣ, ତାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି ।
ରୋହିତ ପୂଜାରୀ ଗତ ବିଧାନସଭାରେ ମଧ୍ୟ ସରକାରୀ ଦଳ ଉପ-ମୁଖ୍ୟସଚେତକ ଭାବେ ଦାୟିତ୍ୱ ତୁଲାଉଥିଲେ । ଚଳିତ ବିଧାନସଭାରେ ଯାଜପୁର ଜିଲ୍ଲାର ଦୁଇ ନେତାଙ୍କୁ ଉଭୟ ସରକାରୀ ଦଳ ମୁଖ୍ୟ ସଚେତକ ଓ ଉପ-ମୁଖ୍ୟସଚେତକ ଦାୟିତ୍ୱ ମିଳିଥିଲା । ପ୍ରମିଳା ମଲ୍ଲିକ ଓ ପ୍ରଣବ ବଳବନ୍ତରାୟ ଯଥାକ୍ରମେ ଏହି ଦାୟିତ୍ୱ ତୁଲାଉଥିଲେ । ପଂଚମ ପାଳିକୁ କ୍ଷମତାକୁ ଆସିବା ପରେ ରୋହିତ ପୂଜାରୀ ମନ୍ତ୍ରୀ ପଦ ପାଇଁ ଆଶାୟୀ ଥିଲେ । ଅନୁମାନ କରାଯାଉଛି ବିଜେପୁର ନିର୍ବାଚନକୁ ଆଖି ଆଗରେ ରଖି ଏଭଳି ନିଷ୍ପତ୍ତି ନିଆଯାଇଥାଇପାରେ ।
ଏନେଇ ରୋହିତ ପୂଜାରୀ କହିଛନ୍ତି, ମୁଖ୍ୟମନ୍ତ୍ରୀ ମୋ ଉପରେ ପୁଣି ବିଶ୍ୱାସ କରି ଏଭଳି ଗୁରୁଦାୟିତ୍ୱ ଦେଇଥିବାରୁ ମୋର କୃତଜ୍ଞତା ଜଣାଉଛି । ମୋତେ ଯେତେବେଳେ ଯେଉଁ ଦାୟିତ୍ୱ ଦେବେ ମୁଖ୍ୟମନ୍ତ୍ରୀ ତାହାକୁ ନିଷ୍ଠାର ସହ ତୁଲାଇବି । ଏହାସହ ବିଜେପୁର ଉପ-ନିର୍ବାଚନକୁ ନେଇ ମଧ୍ୟ ରୋହିତ୍ କହିଛନ୍ତି କି, ବିଜେପୁର ମୁଖ୍ୟମନ୍ତ୍ରୀଙ୍କ ନିଜ ନିର୍ବାଚନମଣ୍ଡଳୀ , ତେଣୁ ସେଠାରେ ବିଜେଡି ଯଥେଷ୍ଟ ପରିମାଣରେ ବିଜୟ ହାସଲ କରିବ । ପ୍ରାର୍ଥୀ ଚୟନ ଦଳର ସଭାପତି କରିବେ ।