କନକ ବ୍ୟୁରୋ: କେନ୍ଦୁଝର ଘସିପୁରା ଥାନା ବାରିଗାଁ ନିକଟରେ ମହିଳାଙ୍କୁ ଲୁଟ୍ । ୨୦ନମ୍ବର ଜାତୀୟ ରାଜପଥ ନିକଟରେ ଗୁଳି ଫୁଟେଇ ମହିଳାଙ୍କଠାରୁ ଲୁଟିନେଲେ ସୁନାଗହଣା। ଆଜି ପୂର୍ବାହ୍ନ ୧୧ଟାବେଳେ ବାଇକରେ ତିନି ଜଣ ଦୁର୍ବୃତ୍ତ ଏକ ବାଇକରେ ଆସି ବାଇକରେ ଯାଉଥିବା ସ୍ୱାମୀ, ସ୍ତ୍ରୀ ଓ ତାଙ୍କ ଝିଅକୁ ବାରି ଗାଁ ନିକଟରେ ଅଟକାଇ ସେମାନଙ୍କୁ ବନ୍ଧୁକ ଦେଖାଇ ମହିଳାଙ୍କ ବେକରୁ ସୁନା ଗହଣା ଲୁଟ କରିବାକୁ ଉଦ୍ୟମ କରିଥିଲେ। ମହିଳାଙ୍କ ପାଟିଶୁଣି ନିକଟସ୍ଥ ବିଲରେ କାମ କରୁଥିବା ଜଣେ ବ୍ୟକ୍ତି ଦୌଡ଼ି ଆସିବାରୁ ଦୁର୍ବୃତ୍ତମାନେ ତିନି ରାଉଣ୍ଡ ଗୁଳି ଚଳାଇ ପାଖକୁ ନଆସିବାକୁ ଧମକ ଦେଇଥିଲେ। ଏହି ସମୟରେ ଅନ୍ୟ ଲୋକମାନେ ଆସିଯିବାରୁ ଦୁର୍ବୃତ୍ତମାନେ ମହିଳାଙ୍କ କାନରୁ ସୁନା କାନର ଛିଣ୍ଡାଇ ନେଇ ଯାଜପୁର ପଟକୁ ପଳାଇଥଲେ। ଲୁଟର ଶିକାର ହୋଇଥିବା ଦମ୍ପତ୍ତିଙ୍କ ଘର ଯାଜପୁର ଜିଲ୍ଲା ଜଳଙ୍ଗା ଗ୍ରାମର ହୋଇଥିବାବେଳେ ସେମାନେ କେନ୍ଦୁଝର ମଲିପସି ଗ୍ରାମକୁ ସମ୍ପର୍କୀୟଙ୍କ ଘରକୁ ଯାଇ ଫେରୁଥିଲେ।