କନକ ବ୍ୟୁରୋ: ପୁଅ ଆଗରେ ଆଖିବୁଜିଲେ ବାପା । ପୁଅକୁ ବାହା କରାଇ ଘରକୁ ଫେରିବା ବେଳେ ସବୁଦିନ ପାଇଁ ବିଦାୟ ନେଇଗଲେ ବାପା । ନା ପୁଅର ବାହାଘରକୁ ଭଲରେ ଦେଖିପାରିଲେ ନା ନୂଆ ବୋହୂର ହାତରନ୍ଧା ଖାଇପାରିଲେ । ବରଯାତ୍ରୀ ଶୋଭାଯାତ୍ରାରେ ଯେତେବେଳେ ଖୁସିର ମାହୋଲ ଖେଳିଯାଇଥିଲା ସେତେବେଳେ ପଛରୁ ମାଡିଗଲା ମୃତ୍ୟୁର ଟ୍ରକ । ଆଉ ଘଟଣାସ୍ଥଳରେ ହିଁ ବାପାଙ୍କ ମୃତ୍ୟୁ ହୋଇଗଲା । ପୁଅର ବାହାଘରରେ ସବୁଠୁ ଅଧିକ ଖୁସିଥିବା ବାପା ପୁଅର ବରବେଶ ଦେଖି ଆଖିବୁଜିଦେଲେ… ଆଉ ଅଧାରେ ରହିଗଲା ବାପାଙ୍କ ଅନେକ ସ୍ୱପ୍ନ ।
Kanak News is now on WhatsApp
Join and get latest news updates delivered to you via WhatsApp
ମାଲାକାନଗିରି ପାଣ୍ଡ୍ରିପାଣିରେ ବରଯାତ୍ରୀଙ୍କ ଉପରେ ଟ୍ରକ ମାଡିଯିବା ଘଟଣାରେ ସବୁଠୁ ହୃଦୟ ବିଦାରୟ କାହାଣୀ ହେଉଛି ପୁଅର ପ୍ରୋସେସନରେ ବାପାଙ୍କ ପରଲୋକ । ବରଯାତ୍ରୀଙ୍କ ଉପରେ ଟ୍ରକ ମାଡିଯିବା ହୁଏତ ବ୍ରେକିଂ ନ୍ୟୁଜ୍ ହୋଇପାରେ ହେଲେ ଏହି ବଡ ଖବର ପଛରେ ଯେ ଗୋଟେ ହୃଦୟବିଦାରକ କାହାଣୀ ରହିଛି ତାହା ସମସ୍ତଙ୍କ ଛାତିକୁ ବତୁରେଇ ଦେଇଛି ।
କନିଆକୁ ନେଇ ବର ଖୁସିରେ ଘରକୁ ଫେରୁଛି । ପୁଅର ବରଯାତ୍ରୀକୁ ବାଟ କଢେଇ ନେଉଛନ୍ତି ବାପା । ବାଜା, ବାଣ, ଗୀତର ତାଳେ ତାଳେ ସମସ୍ତେ ଝୁମୁଛନ୍ତି । ହେଲେ ଏତିକି ବେଳେ ଯେ ମୃତ୍ୟୁ ମାଡି ଆସିବ କିଏ ବା ଜାଣିଥିଲେ । ବରଯାତ୍ରୀଙ୍କ ଉପରେ ଏକ ଟ୍ରକ ହଠାତ ପଛରୁ ଚାପିଦେଇଥିଲା । ଆଉ ଦୁର୍ଘଟଣାରେ ଚାଲିଯାଇଥି ପାଣ୍ଡ୍ରିପାଣି ସରପଞ୍ଚ ତଥା ବରର ବାପା ଶିବ ଖେମୁଡୁଙ୍କ ଜୀବନ । ଦୁର୍ଘଟଣାର ଚିତ୍ର ଏତେ ଭୟଙ୍କର ଯେ ତାହକୁ ଦେଖାଇବା ଅସମ୍ଭବ ।
ତେବେ ଘର ମାତ୍ର ଆଉ ୨୦୦ ମିଟର ଦୂର ଥିଲା । ଶୋଭାଯାତ୍ରା ସରିଥିଲେ ନୂଆ ବୋହୂକୁ ନେଇ ଘରକୁ ଯାଇଥାନ୍ତା ପୁଅ । ଆଉ ବୋହୂର ହାତରନ୍ଧା ସହ ସେବା ପାଇଥାନ୍ତେ ଶ୍ୱଶୁର । ହେଲେ ଭାଗ୍ୟର ବିଡମ୍ବନା, ପୁଅ ବରଯାତ୍ରୀରେ ବାପା ଏ ଦୁନିଆରୁ ଚିର ବିଦାୟ ନେଲେ । ଏ ଦୁଃଖଦ ଘଟଣା ପୂରା ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି କରିଥିବା ବେଳେ କାନ୍ଦ ବୋବାଳିରେ ଫାଟି ପଡୁଛି ପରିବାର ଓ ସମ୍ପର୍କୀୟଙ୍କ ଘର ।