କନକ ବ୍ୟୁରୋ: ବିଷାକ୍ତ ହୋଇଛି ଦିଲ୍ଲୀର ପାଣି, ପବନ ସବୁକିଛି । ଆଉ ଏହି ବିଷ ପାନ କରୁଛନ୍ତି ଏଠାରେ ରହୁଥିବା ଲୋକେ । ଆଜି ଛଟ୍ ପୂଜା ଅବସରରେ ଯମୁନା ନଦୀର ଏପରି କିଛି ଦୃଶ୍ୟ ଭାରତରେ ବିଶେଷ କରି ଦିଲ୍ଲୀରେ ଜଳ ପ୍ରଦୂଷଣକୁ ସ୍ପଷ୍ଟ କରୁଛି । ଏହାକୁ ନେଇ ବିଭିନ୍ନ ରାଜନୈତିକ ଦଳ ଟ୍ୱିଟ କରୁଥିବାର ମଧ୍ୟ ଦେଖିବାକୁ ମିଳୁଛି ।
Kanak News is now on WhatsApp
Join and get latest news updates delivered to you via WhatsApp
ଆପଣ ଦେଖୁଥିବା ଏହି ଦୃଶ୍ୟ ଯମୁନା ନଦୀରେ ବରଫ ପଡିଥିବାର ଭ୍ରମ ସୃଷ୍ଟି କରୁଛି ।ହେଲେ ଏହା ପ୍ରକୃତରେ ବିଷାକ୍ତ ଆମୋନିଆ ଟକ୍ସିକ୍ ଫେଣ । ଯାହା ଉକ୍ରଟ ଚର୍ମ ରୋଗ ସହ ଅନ୍ୟାନ୍ୟ ଗଭୀର ସମସ୍ୟା ସୃଷ୍ଟି କରିବ । ହେଲେ ଛଟ୍ ପୂଜା ଥିବାରୁ ଏଥିରେ ଗାଧୋଇବାକୁ ବାଧ୍ୟ ହୋଇଛନ୍ତି ଶ୍ରଦ୍ଧାଳୁ । ତେବେ ଯମୁନା ନଦୀର ଏପରି ଅବସ୍ଥା ଆଜିକାର ନୁହେଁ । ଅନେକ ଦିନରୁ ଏହି ସମସ୍ୟା ଦେଖାଦେଇଛି । କିଛି ଦିନ ଅନ୍ତରରେ ଯମୁନାରେ ଏପରି ଫେଣ ଆସି ସମ୍ପୂର୍ଣ୍ଣ ନଦୀକୁ ଆଚ୍ଛାଦିତ କରିଦେଉଥିବାର ନଜିର ରହିଛି । ଏହାକୁ ନେଇ ରାଜନୈତିକ ଦଳ ମଧ୍ୟରେ ପ୍ରଶ୍ନ ମଧ୍ୟ ଉଠିଛି । ହେଲେ ଏହାର ନିରାକରଣ ପାଇଁ କେହି କଠୋର ପଦକ୍ଷେପ ଉଠାଇନଥିବା ମନେହୁଏ ।
କୁହାଯାଉଛି ଯମୁନା ନଦୀର ପାଖାପାଖି ଇଲାକାରେ ରହିଛି ଡିଟରଜେଣ୍ଟ ପ୍ରସ୍ତୁତ କରୁଥିବା କାରଖାନା । ଏହାର ବର୍ଜ୍ୟ ପାଣି ନାଳ ଗୁଡିକ ମାଧ୍ୟମରେ ସିଧାସଳଖ ଆସି ଯମୁନା ନଦୀରେ ପଡୁଛି । ଏହି ବିଷାକ୍ତ ପାଣି ପିଇଲେ ରୋଗ ହେବା ନିଶ୍ଚିତ । ହେଲେ ଏହି ବିଷାକ୍ତ ପାଣି ଯାଉଛି ଦିଲ୍ଲୀର ପ୍ରତିଟି ଘରକୁ । ସେଥିରୁ ଅନୁମେୟ ଦିଲ୍ଲୀରେ ରହୁଥିବା ଲୋକଙ୍କ ସ୍ୱାସ୍ଥ୍ୟ ଉପରେ କିପରି ବିପଦ ଘନଉଛି । ତେବେ ଯେଉଁ ସମୟରେ ନଦୀରେ ପ୍ରବଳ ଫେଣ ଆସୁଛି ସେହି ସମୟରେ ନଦୀରେ ନଗାଧୋଇବାକୁ ଲୋକଙ୍କୁ ସଚେତନ କରାଯାଉଥିଲେ ବି ଛଟ୍ ପୂଜା ଯୋଗୁଁ ଏଠାକୁ ବାଧ୍ୟ ହେଉଛନ୍ତି ଲୋକେ । ଏହି ଦିନ ନଦୀରେ ସ୍ୱାନ କରି ସୂର୍ଯ୍ୟଙ୍କୁ ଉପାସନା କରିବାର ଆସ୍ଥା ଓ ବିଶ୍ୱାସ ରହିଥିବାରୁ ଯମୁନାର ଏହି ବିଷାକ୍ତ ଜଳରେ ବୁଡ ପକାଇବାକୁ ବାଧ୍ୟ ହୋଇଛନ୍ତି ଶ୍ରଦ୍ଧାଳୁ ।
ଏହାକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀଙ୍କୁ କଟାକ୍ଷ କରିଛନ୍ତି ସାଂସଦ ମନୋଜ ତିୱାରୀ । ଯୁମନା ନଦୀର ଏପରି ସ୍ଥିତି ବାସ୍ତବରେ ଉଦବେଗଜନକ । ଏହି ସତ ଲୁଚାଇବାକୁ ନଦୀକୁ ନଯିବାକୁ ଶ୍ରଦ୍ଧାଳୁଙ୍କୁ ମନା କରୁଥିଲେ ମୁଖ୍ୟମନ୍ତ୍ରୀ ଆରବିନ୍ଦ କେଜ୍ରିୱାଲ । ହେଲେ ସତ କ’ଣ ସମସ୍ତଙ୍କୁ ଜଣା । ବାୟୁ ପ୍ରଦୂଷଣ ମଧ୍ୟ ବିପଦ ସ୍ତରକୁ ଟପିଗଲାଣି । ହେଲେ ଏହାକୁ ରୋକିବାକୁ ମୁଖ୍ୟମନ୍ତ୍ରୀ ଆଦୌ ଆଗ୍ରହୀ ନୁହଁନ୍ତି ବୋଲି ମତ ଦେଇଛନ୍ତି ମନୋଜ ତିୱାରୀ ।