ୟୁକ୍ରେନ ଟ୍ୟାଙ୍କ, କ୍ଷେପଣାସ୍ତ୍ର ଏବଂ ଗୁଳିଗୋଳା କିଣିବ : ଯୁଦ୍ଧ ଆହୁରି ଘମାଘୋଟ ହେବ । ବ୍ରିଟେନ ୩.୨ ବିଲିୟନ ଡଲାର ସହାୟତା ଦେବାକୁ ଘୋଷଣା କରିଛି

ରୁଷ-ୟୁକ୍ରେନ ଯୁଦ୍ଧକୁ ଦୁଇ ବର୍ଷ ପୁରି ଯିବାକୁ ବସିଲାଣି । ଅର୍ଥ ଅଭାବରୁ ୟୁକ୍ରେନ ବହୁ ଅସୁବିଧାରେ ଅଛି । ଗୁଳିଗୋଳାର ଅଭାବ ତାକୁ ଯୁଦ୍ଧକ୍ଷେତ୍ରରେ ଏକପ୍ରକାର ଆଗକୁ ବଢିବାକୁ ଦେଉନାହିଁ ।  ଆମେରିକା ଏବଂ ୟୁରୋପୀୟ ଦେଶମାନଙ୍କରେ ଆଭ୍ୟନ୍ତରୀଣ ରାଜନୈତିକ କନ୍ଦଳ ହେତୁ ୟୁକ୍ରେନ ଆବଶ୍ୟକ ସହାୟତା ପାଇପାରୁ ନାହିଁ । ୟୁକ୍ରେନର ଏପରି ଦୁର୍ଦ୍ଦଶା ସମୟରେ ବ୍ରିଟିଶ ପ୍ରଧାନମନ୍ତ୍ରୀ କଳିଭ ଗସ୍ତ କରି ୟୁକ୍ରେନକୁ ଆର୍ଥିକ ସାହାଯ୍ୟ କରିବାକୁ ଘୋଷଣା କରିଛନ୍ତି । ଆସନ୍ତୁ ଜାଣିବା ଏହି ସହାୟତା ପ୍ୟାକେଜରେ କ’ଣ ଅଛି  ?

ବର୍ତ୍ତମାନ ପୃଥିବୀରେ ଦୁଇଟି ବଡ଼ ଯୁଦ୍ଧ ଚାଲିଛି । ଗୋଟିଏ ହେଲା ଇସ୍ରାଏଲ ଏବଂ ହମାସ ମଧ୍ୟରେ ଏବଂ ଅନ୍ୟଟି ହେଲା ରୁଷ ଓ ୟୁକ୍ରେନ ମଧ୍ୟରେ ଚାଲିଛି । ରୁଷ-ୟୁକ୍ରେନ ଯୁଦ୍ଧକୁ ଦୁଇ ବର୍ଷ ହେବାକୁ ବସିଲାଣି । ଥମିବାର କୌଣସି ଲକ୍ଷଣ ଜଣାପଡୁନାହିଁ । ସମ୍ପ୍ରତି ଗଣମାଧ୍ୟମର ରିପୋର୍ଟରେ କୁହାଯାଉଛି ଯେ ୟୁକ୍ରେନ ଅର୍ଥ ଏବଂ ଅସ୍ତ୍ରଶସ୍ତ୍ରର ଅଭାବର ସମ୍ମୁଖୀନ ହେଉଛି । ଏହି ସମୟରେ ବ୍ରିଟିଶ ପ୍ରଧାନମନ୍ତ୍ରୀଙ୍କ ବିବୃତ୍ତି ୟୁକ୍ରେନର ଚିନ୍ତାକୁ କିଛି ମାତ୍ରାରେ ହ୍ରାସ କରିବାକୁ ଯାଉଛି । ବ୍ରିଟେନ ପ୍ରଧାନମନ୍ତ୍ରୀ ରୁଷି ସୁନକ କହିଛନ୍ତି ଯେ ବ୍ରିଟେନ ସରକାର ୟୁକ୍ରେନକୁ ସହାୟତା ଯୋଗାଇବାରେ ପଛଘୁଞ୍ଚା ଦେବେ ନାହିଁ । ପାଣ୍ଠି ସମ୍ପର୍କରେ ସୁନାକ ଏକ ନୂତନ ଘୋଷଣା ମଧ୍ୟ କରିଛନ୍ତି । ବ୍ରିଟିଶ ପ୍ରଧାନମନ୍ତ୍ରୀ ବର୍ତ୍ତମାନ କଳିଭ ଗସ୍ତରେ ଅଛନ୍ତି ।

ବ୍ରିଟେନର ସହାୟତା ପ୍ଯାକେଜରେ କଣ କଣ ଅଛି ?

ଏକ ସମୟରେ ଯେତେବେଳେ ଆମେରିକା ଏବଂ ୟୁରୋପର ୟୁକ୍ରେନକୁ ଦେବକୁ ଥିବା ଅଧିକାଂଶ ସହାୟତା ରାଜନୈତିକ ତିକ୍ତତା କାରଣରୁ ଅଟକି ରହିଛି ସେହି ସମୟରେ ବ୍ରିଟେନ ପ୍ରଧାନମନ୍ତ୍ରୀ ରିଷି ସୁନକ କହିଛନ୍ତି ଯେ ତାଙ୍କ ଦେଶ ଏହି ଯୁଗରେ ସର୍ବ ବୃହତ ପ୍ରତିରକ୍ଷା ସହାୟତା ପ୍ୟାକେଜ୍ ଦେବ । ସୂଚନା ଅନୁସାରେ ଚୁକ୍ତିନାମା ଅନୁଯାୟୀ ବ୍ରିଟେନ, ୟୁକ୍ରେନକୁ ୨.୫ ବିଲିୟନ ପାଉଣ୍ଡ କିମ୍ବା ୩.୨ ବିଲିୟନ ଡଲାରର ସହାୟତା ପ୍ଯାକେଜ ଦେବକୁ ଯାଉଛି । ଏହି ସାହାଯ୍ୟରେ ଅନେକ ଜିନିଷ ଅନ୍ତର୍ଭୁକ୍ତ । ଯେଉଁଥିରେ, ସାମରିକ ତାଲିମ ବ୍ୟତୀତ ବ୍ରିଟିଶ ସରକାର ୟୁକ୍ରେନକୁ ଦୀର୍ଘ ଦୂରଗାମୀ କ୍ଷେପଣାସ୍ତ୍ର, ଅଧିକ ଗୁଳିଗୋଳା ଏବଂ ଆର୍ଟିଲିରି ଯୋଗାଇ ଦେବେ ।

ଯଦି ପୁଟିନ ଜିତନ୍ତି ତେବେ…

ଶୁକ୍ରବାର ଦିନ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏବଂ ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନକ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିଛନ୍ତି । ଏହି ସମୟ ମଧ୍ୟରେ ଗଣମାଧ୍ୟମ ରିପୋର୍ଟରେ କୁହାଯାଇଥିଲା ଯେ ଦୁଇ ଦେଶ ମଧ୍ୟରେ ଏକ ସୁରକ୍ଷା ଚୁକ୍ତି ସ୍ୱାକ୍ଷରିତ ହୋଇଛି ଯାହାକି ଶହେ ବର୍ଷ କିମ୍ବା ତାଠାରୁ ଅଧିକ ସମୟ ଧରି ଚାଲିବ । ସୁନକ କହିଛନ୍ତି ଯେ ବ୍ରିଟେନ ଏବଂ ଅନ୍ୟ ୟୁରୋପୀୟ ଦେଶମାନେ ୟୁକ୍ରେନକୁ ସମର୍ଥନ କରିବାରେ ପଛଘୁଞ୍ଚା ଦେଇ ପାରିବେ ନାହିଁ କାରଣ ଯଦି ପୁଟିନ ୟୁକ୍ରେନରେ ଜିତନ୍ତି ତେବେ ସେ ସେଠାରେ ଅଟକି ରହିବେ ନାହିଁ ।