ଯୁବ ଖେଳାଳୀ ରାଇଡୁ, ଋଷଭ ଓ ନବଦୀପଙ୍କୁ ବଡ ସୁଯୋଗ । ୨୦୧୯ ବିଶ୍ୱକପ ପାଇଁ ବିକଳ୍ପ ଖେଳାଳୀ ଭାବେ ଦଳରେ ସାମିଲ କଲା ବିସିସିଆଇ ।
କନକ ବ୍ୟୁରୋ : ୨୦୧୯ କ୍ରିକେଟ୍ ବିଶ୍ୱକପ ପାଇଁ ଘୋଷଣା ହୋଇସାରିଛି ଯୋଦ୍ଧାଙ୍କ ନାମ । ଇଂଲଣ୍ଡରେ ଦମ ଦେଖାଇବାକୁ ପ୍ରସ୍ତୁତ ବିରାଟ ବାହିନୀ । ତେବେ ଦଳ ଚୟନ ବେଳେ ଏପରି କିଛି ଖେଳାଳୀ ରହିଥିଲେ, ଯେଉଁମାନଙ୍କ ଚୟନକୁ ନେଇ ଚୟନକର୍ତ୍ତାଙ୍କ ମଧ୍ୟରେ ବେଶ ବିଚାରବିମର୍ଶ ହୋଇଥିଲା । ହେଲେ ଶେଷରେ ସେମାନେ ଦଳରେ ସାମିଲ ହୋଇପାରିନଥିଲେ । କିନ୍ତୁ ଏବେ ସେମାନଙ୍କୁ ଏକ ବଡ ସୁଯୋଗ ପ୍ରଦାନ କରିଛି ବିସିସିଆଇ ।
Kanak News is now on WhatsApp
Join and get latest news updates delivered to you via WhatsApp
ଯୁବ ୱିକେଟକିପର ବ୍ୟାଟ୍ସମ୍ୟାନ ଋଷଭ ପନ୍ଥ, ଅନୁଭବୀ ବ୍ୟାଟ୍ସମ୍ୟାନ ଅମ୍ବାତି ରାଇଡୁ ଏବଂ ଫାଷ୍ଟ ବୋଲର ନବଦୀପ ସାଇନିଙ୍କୁ ମିଳିଛି ବିଶ୍ୱକପ ଟିକେଟ୍ । ଆସନ୍ତା ମେ ମାସ ୩୦ ତାରିଖରୁ ଇଂଲଣ୍ଡରେ ଆରମ୍ଭ ହେବାକୁ ଯାଉଥିବା ୨୦୧୯ କ୍ରିକେଟ ବିଶ୍ୱକପ ପାଇଁ ୧୫ ଜଣିଆ ଦଳ ବାଦ୍ ଏହି ତିନି ଜଣ ଖେଳାଳୀଙ୍କୁ ବିକଳ୍ପ ଖେଳାଳୀ ଭାବେ ଭାରତୀୟ ଦଳରେ ସୁଯୋଗ ମିଳିଛି । ତେବେ ଏହି ତିନିଜଣ ଖେଳାଳୀ ପ୍ରଥମ ଥର ପାଇଁ ବିଶ୍ୱକପ ଦଳରେ ସାମିଲ ହୋଇଛନ୍ତି । ବିସିସିଆଇ ପକ୍ଷରୁ ଏନେଇ ସୂଚନା ଦିଆଯିବା ପରେ ଟ୍ୱିଟ୍ କରି ଖୁସି ବ୍ୟକ୍ତ କରିଛନ୍ତି ଅମ୍ବାତି ରାଇଡୁ ।
ବିସିସିଆଇର ଜଣେ ବରିଷ୍ଠ ଅଧିକାରୀଙ୍କ କହିବା ଅନୁଯାୟୀ, ଆଇସିସି ଚାମ୍ପିୟନ୍ସ ଟ୍ରଫିରେ ଯେଉଁଭଳି ଷ୍ଟାଣ୍ଡ ବାଇ ଖେଳାଳୀ ରହୁଥିଲେ, ଠିକ୍ ସେହିପରି ବିଶ୍ୱକପ ପାଇଁ ଭାରତୀୟ ଦଳରେ ତିନି ଜଣ ବିକଳ୍ପ ଖେଳାଳୀ ରହିବେ । ଯଦି କୌଣସି ଖେଳାଳୀ ଆହତ ହୁଅନ୍ତି, ତେବେ ଏହି ଖେଳାଳୀଙ୍କୁ ଟିମରେ ସାମିଲ କରାଯିବ । ଯୁବ ତାରକା ଋଷଭ ପନ୍ଥ ଓ ଅମ୍ବାତି ରାଇଡୁ କ୍ରମଶଃ ପ୍ରଥମ ଏବଂ ଦ୍ୱିତୀୟ ବିକଳ୍ପ ଖେଳାଳୀ ଭାବେ ରହିଥିବା ବେଳେ ନବଦୀପ ସାଇନିଙ୍କୁ ଦ୍ରୁତ ବୋଲର ରୂପେ ତୃତୀୟ ବିକଳ୍ପ ଖେଳାଳୀ ଭାବେ ସୁଯୋଗ ମିଳିଛି ।