ମୁହଁ ଖୋଲିଲେ ପାଟଣାଗଡ ପାର୍ସଲ ବୋମା ପୀଡିତା ! ପୁରୁଣା ପେପରରୁ ଜାଣିଲେ ସ୍ୱାମୀଙ୍କ ମୃତ୍ୟୁ ଖବର, ହସ୍ପିଟାଲ ବେଡରୁ ମାଗିଲେ ନ୍ୟାୟ
କନକ ବ୍ୟୁରୋ : ସ୍ୱାମୀଙ୍କ ମୃତ୍ୟୁର ଖବର ପାଇବା ପରେ ପ୍ରଥମ ଥର ପାଇଁ ଗଣମାଧ୍ୟମ ସମ୍ମୁଖରେ ମୁହଁ ଖୋଲିଛନ୍ତି ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣାରେ ଆହତ ରୀମା ସାହୁ । ସ୍ୱାମୀ ସୌମ୍ୟଶେଖରଙ୍କ ଗୁଣଙ୍କୁ ପ୍ରଶଂସା କରିବା ସହ ମୃତ୍ୟୁର ଷଡଯନ୍ତ୍ର ରଚିଥିବା ଖଳନାୟକଙ୍କୁ ଧରିବାକୁ ଦାବି କରିଛନ୍ତି । ଏବେ ହସ୍ପିଟାଲ ବେଡରେ ଥାଇ ନ୍ୟାୟ ମାଗୁଛନ୍ତି ରୀମା ସାହୁ ।
Kanak News is now on WhatsApp
Join and get latest news updates delivered to you via WhatsApp
ବୈବାହିକ ଜୀବନ ଜୀଇଁବା ଆଗରୁ ବିଧବା ପାଲଟି ଯାଇଥିବା ରୀମାଙ୍କ ମୁହଁରୁ ଯେମିତି ଉଭାନ୍ ହୋଇଯାଇଛି ସବୁ ହସ-ଖୁସି । ସ୍ୱାମୀ ସୌମ୍ୟଶେଖର ସହ ବିତିଥିବା ସେହି ୫ ଦିନର କଥା ମନକୁ ଆସିଗଲେ, ମନର କୋହ ଓ ଆଖିର ଲୁହକୁ ଯେତେ ଲୁଚାଇଲେ ଚେଷ୍ଟା କଲେ, ବି ଅସମର୍ଥ ହେଉ ନାହାଁନ୍ତି ରୀମା । ଆଉ ହସ୍ପିଟାଲ ବେଡରେ ଥାଇ ନ୍ୟାୟ ମାଗୁଛନ୍ତି-ପାର୍ସଲ ବେମାର ପୀଡ଼ିତା ।ତାଙ୍କ ପରିବାରକୁ ନ୍ୟାୟ ମିଳୁ ବୋଲି ସେ କହିଛନ୍ତି । ବିନା ଦୋଷରେ ତାଙ୍କ ନିରୀହ ସୌମ୍ୟ ଶେଖରଙ୍କ ମୃତ୍ୟୁ ହୋଇଛି । ପାର୍ସଲ କେଉଁଠୁ ଆସିଥିଲା, କିଏ ଦେଇଥିଲା, ତାହାର ସବିଶେଷ ଯାଞ୍ଚ କରାଯାଉ ବୋଲି ରୀମା ଦାବି କରିଛନ୍ତି । ଏହି ଘଟଣାରେ ସୌମ୍ୟ ଶେଖରଙ୍କର କିଛି ବି ଦୋଷ ନଥିଲା । ନ୍ୟାୟ ପାଇଁ ମୁଖ୍ୟମନ୍ତ୍ରୀଙ୍କୁ ନିବେଦନ କରୁଥିବା କହିଛନ୍ତି ।
ସଳଖୀ ଛିଡ଼ା ହେବା ପାଇଁ ରୀମା ସାହୁଙ୍କୁ ଲାଗିଗଲା ୨୫ ଦିନ ସମୟ । ହେଲେ ଏହି ୨୫ ଦିନ ଭିତରେ ସବୁ କିଛି ଓଲଟପାଲଟ ହୋଇଯାଇଥିଲା । ଆଉ ଜଳଖିଆ ଖାଇବା ବେଳେ, ଯେତେବେଳେ ପୁରୁଣା ଖବରକାଗଜ ହାତରେ ଲାଗିଲା, ସେତେବେଳେ ନିଷ୍ଠୁର ସତ୍ୟ ସହ ହେଲା ପରିଚୟ । ଏହି ପୁରୁଣା ପେପର ଯେମିତି, ରୀମାଙ୍କୁ ଦେଉଥିଲା ନୂଆ ଖବର । ଖସି ଯାଇଥିଲା ତାଙ୍କ ପାଦ ତଳରୁ ମାଟି । ସ୍ୱାମୀ ତ ମରି ଯାଇଛନ୍ତି, ତାଙ୍କୁ କାହିଁକି ବଂଚାଇଲ ବୋଲି କାନ୍ଦି କାନ୍ଦି କହୁଥିଲେ ରିମା । ପ୍ରାୟ ୪ -୫ ଘଂଟା ପର୍ୟ୍ୟନ୍ତ ତାଙ୍କୁ ସମ୍ଭାଳିବା ପାଇଁ ଡାକ୍ତର, ନର୍ସ ଓ ପରିବାର ଲୋକ ନୟାନ୍ତ ହୋଇଥିଲେ ।
ଫେବୃୟାରୀ ମାସ ୨୩ ତାରିଖ, ସେତେ ଯେମିତି ମୃତ୍ୟୁର ଦୂତ ହୋଇ ଆସିଥିଲା ପାର୍ସଲ ବୋମା । ପ୍ରାୟ ଗୋଟିଏ ମାସ ସମୟ ବିତି ଯାଇଥିଲେ ବି ମୃତ୍ୟୁର ଷଡଯନ୍ତ୍ର ରଚିଥିବା ବ୍ୟକ୍ତି ମିଳୁନି ଖୋଜ୍ଖବର । ଆଉ ଏସବୁ ଭିତରେ ନ୍ୟାୟ ପାଇଁ ଗୁହାରୀ କରୁଛନ୍ତି ରୀମା ସାହୁ ।