ହାତରେ ଟୋକନ୍ ଅଛି, ଧାନ ମଣ୍ଡିରୁ ଉଠୁନି । ମାସ ମାସ ଧରି ପ୍ରତିକ୍ଷା ପରେ ବି ମଣ୍ଡିରେ ଧାନ ବିକ୍ରି କରିବାକୁ ହନ୍ତସନ୍ତ ହେଉଛନ୍ତି ଚାଷୀ
କନକ ବ୍ୟୁରୋ : ହାତରେ ଟୋକନ୍ ଅଛି, ଧାନ ମଣ୍ଡିରୁ ଉଠୁନି । ଆଉ କାହାର ମଣ୍ଡିରେ ଧାନ ପଡ଼ିଛି, ଟୋକନର ଅବଧି ଗଡ଼ିଯାଇଛି । ମାସ ମାସ ଧରି ପ୍ରତିକ୍ଷା ପରେ ବି ମଣ୍ଡିରେ ଧାନ ବିକ୍ରି କରିବାକୁ ହନ୍ତସନ୍ତ ହେଉଛନ୍ତି ବରଗଡ଼ ଜିଲ୍ଲା ପଦ୍ମପୁର ମଣ୍ଡିର ଚାଷୀ । ପଦ୍ମପୁର ଅଞ୍ଚଳର ୭୦ଟି ମଣ୍ଡିରେ ପଡ଼ି ରହିଛନ୍ତି ପ୍ରାୟ ୧୩ ଲକ୍ଷ ବସ୍ତା ଧାନ । ଶୀତକାରକରେ ଧାନ ବିକ୍ରି କରିବା ପାଇଁ ମାସ ମାସ ଧରି ମଣ୍ଡିରେ ପଡ଼ି ରହିଛନ୍ତି ଚାଷୀ । କାରଣ, ଧାନ ବିକ୍ରି ହେଲେ ହାତକୁ ଟଙ୍କା ଆସିବ, ଧାନ ବିକ୍ରି ହେଲେ ମଜୁରୀ ଦେବେ ।
Kanak News is now on WhatsApp
Join and get latest news updates delivered to you via WhatsApp
ଚାଷୀର ଅସହାୟତା ଛଡ଼ା ଏହାକୁ ଆଉ କଣ କୁହାଯିବ? ବର୍ଷ ତମାମ୍ ପରିଶ୍ରମ କରିଥିବା ଚାଷୀ, ପରିଶ୍ରମର ଫଳ ଯେତେବେଳେ ସାଉଁଟି ଆଣି ମଣ୍ଡିରେ ଗଦା କରି ରହିଛି, ତାହା ସତେ ଯେମିତି ଅଲୋଡ଼ା ହୋଇଯାଇଛି । ଚାଷୀର ପରିଶ୍ରମକୁ ହୁଏତ ଅଲୋଡ଼ା କରି ଦେଇଛି ଟୋକନ୍ ସମସ୍ୟା । ହାତରେ ଟୋକନ୍ ଅଛି, ଧାନ ମଣ୍ଡିରୁ ଉଠୁନି । ଆଉ କାହାର ମଣ୍ଡିରେ ଧାନ ପଡ଼ିଛି, ଟୋକନର ଅବଧି ଗଡ଼ିଯାଇଛି । ଆଉ ଏହାରି ଭିତରେ ମାସ ମାସ ବିତି ଗଲାଣୀ ସିନା, ଚାଷୀର ଧାନ ମଣ୍ଡିରୁ ଉଠିପାରୁନାହିଁ ।
ପଦ୍ମପୁର ଆରଏମସିର ୭୦ଟି ମଣ୍ଡିରେ ପ୍ରାୟ ୧୩ ଲକ୍ଷ ବସ୍ତା ଧାନ ପଡ଼ିରହିଛି । ବର୍ତ୍ତମାନ କିଛି ଚାଷୀ ପାଖରେ ବୈଧତା ଥିବା ଟୋକନ ରହିଛି ହେଲେ ଚାଷୀ ଧାନ ବିକ୍ରି କରି ପାରୁନାହିଁ । ଆଉ କିଛି ଚାଷୀଙ୍କ ଟୋକନ ବୈଧତା ଆଉ ଅଳ୍ପ କିଛି ଦିନ ପରେ ସରିଯିବ । ହେଲେ ମିଲର ଧାନ ଉଠାଉନଥିବା କାରଣରୁ ଧାନ ବସ୍ତା ମଣ୍ଡିରେ ପଡିରହଛି । ଏସବୁ ଭିତରେ ଖୋଲା ଆକାଶ ତଳେ ପଡି ରହିଥିବା ଧାନବସ୍ତା ସବୁ ଦିନର ଟାଣ ଖରା ଓ ରାତିର ଅସହ୍ୟ ଶୀତ କାକର ଯୋଗୁଁ ପ୍ଲାଷ୍ଟିକ ବସ୍ତା ଗୁଡିକ ଫାଟି ଯାଉଛି । ଏବଂ ଧାନ ଗୁଡିକ ତଳେ ପଡି ନଷ୍ଟ ହେଉଛି ।
ଧାନ ବିକ୍ରି କରିବାକୁ ଚାଷୀ ହସ୍ତସନ୍ତ ହେଉଥିବା ବେଳେ କିନ୍ତୁ ମଣ୍ଡି କର୍ତ୍ତୃପକ୍ଷ କ୍ୟାମେରା ସାମ୍ନାରେ ମୁହଁ ଖୋଲିବାକୁ ମଙ୍ଗୁ ନାହାଁନ୍ତି । ଆଉ ଏସବୁ ଭିତରେ ବରଗଡ଼ ଜିଲ୍ଲାରେ ଧାର୍ଯ୍ୟ ଲକ୍ଷ୍ୟଠାରୁ ଅଧିକ ଧାନ ସଂଗ୍ରହ ହୋଇଥିବା ସରକାରୀ ରିପୋର୍ଟ କହୁଛି ।