ନିର୍ଦ୍ଦିଷ୍ଟ ସମୟସୀମାରେ, ବିନା ଲାଞ୍ଚରେ ଲୋକଙ୍କୁ ସେବା ଯୋଗାଇବୁ । ସମୀକ୍ଷା ପରେ ମନ୍ତ୍ରୀ ସୁରେଶ ପୂଜାରୀଙ୍କ ବଡ ବୟାନ ।
କନକ ବ୍ୟୁରୋ : ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ସୀମକ୍ଷା କରିବା ସହ ବିଭାଗୀୟ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ଏଣିକି ରାଜସ୍ୱ ବିଭାଗରେ ଆଉ ଚଳିବନି ହାତଗୁଞ୍ଜା । ରାଜସ୍ୱ ବିଭାଗରେ ଛୁଟି ଦିନରେ ବି କାମ ଚାଲିଛି। ବର୍ଷକୁ ୩୬୫ ଦିନ, ୨୪ ଘଣ୍ଟା ଓଡ଼ିଶାବାସୀଙ୍କ ସେବାରେ ରହିବ ରାଜସ୍ୱ ବିଭାଗ । ଉଭୟ ବିଭାଗର ସଫଳତା ଓ ବିଭିନ୍ନ ଯୋଜନା ଉପରେ ଆଲୋଚନା ହୋଇଛି। ଆଗକୁ ରୋଡ଼ ମ୍ୟାପ କଣ ହେବ ସେନେଇ ଆଲୋଚନା ହୋଇଛି । ରାଜସ୍ୱ ଆଇନକୁ ସାଧାରଣ ଲୋକ ବୁଝିବା ଭଳି ସରଳୀକରଣ କରାଯିବ ତାହା ଉପରେ ଗୁରୁତ୍ୱ ଦିଆଯାଇଛି । ଜମିଜମା ଯାହା ସମସ୍ୟା ଅଛି ତାହା ମଧ୍ୟ ସମାଧାନ ହେବ। ରେକର୍ଡ ଅଫ୍ ରାଇଟକୁ କମ୍ପ୍ୟୁଟରୀକରଣ କରି ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସେବା ଯୋଗାଇ ଦେବୁ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଭୂମିହୀନ ଲୋକ କିଭଳି ବିଭିନ୍ନ ଯୋଜନାରେ ସୁବିଧା ପାଇବେ ତାହା ଉପରେ ଖସଡ଼ା ପ୍ରସ୍ତୁତ ହୋଇଛି। ଓଡ଼ିଶାରେ ଯେପରି କେହି ଭୂମିହୀନ ରହିବେନି ତାହା ଉପରେ ଆଲୋଚନା ହୋଇଛି । ପ୍ରଧାନମନ୍ତ୍ରୀ ଆବାସ ଯୋଜନା କାହିଁକି ଗତିରୋଧ ହୋଇଥିଲା ତାହା ଉପରେ ଆଲୋକପାତ କରାଯାଇଛି। ଜମି କମ ଥାଇ ହିତାଧିକାରୀ ଅଧିକ ଥିଲେ ଫ୍ଲାଟ ବ୍ୟବସ୍ଥା କରାଯିବ । ସାଧାରଣ ଲୋକଙ୍କୁ ସାର୍ଟିଫିକଟ ପାଇଁ ଲମ୍ବା ଲାଇନରେ ଛିଡା ହେବାକୁ ପଡ଼ିବନି । ରାଜସ୍ୱ କେସ ଯାହା ଫଇସଲା ହୋଇନାହିଁ, ତାହା ଅତିଶୀଘ୍ର ସମାଧାନ ହେବ।
ବିପର୍ଯ୍ୟୟ ପରିଚାଳନାରେ ଓଡ଼ିଶାକୁ ଭାରତ ବର୍ଷରେ ଉଦାହରଣ କରି ରଖିବାକୁ କାମ କରିବୁ । ଅତ୍ୟାଧୁନିକ ଜ୍ଞାନକୌଶଳର ବ୍ୟବହାର ମାଧ୍ୟମରେ ଆହୁରି ଆଗକୁ ଯିବୁ। ୨୪ ଘଂଟା ବିଭାଗ ପ୍ରସ୍ତୁତ ରହିବ। ବିପର୍ଯ୍ୟୟକୁ ରୋକିବା ଓ ଏହାର ମାତ୍ରାକୁ କମାଇବା ପାଇଁ ପ୍ରସ୍ତୁତ ଅଛୁ। ବିପର୍ଯ୍ୟୟରେ ଯେଉଁମାନଙ୍କର ମୃତ୍ୟୁ ହେଉଛି, ସେମାନଙ୍କୁ କେନ୍ଦ୍ରୀୟ ଯୋଜନାରେ ଆର୍ଥିକ ସହାୟତା ପାଇବେ ତାହା ଉପରେ ମଧ୍ୟ କାମ ହେବ। ରାଜସ୍ୱ ବିଭାଗ ପ୍ରତି ବିଭାଗ ଯୋଡି ହୋଇରହିଥାଏ । ଏହି ବିଭାଗକୁ କିଭଳି ଲୋକଙ୍କ ସେବାରେ ଅଧିକରୁ ଅଧିକ ନିୟୋଜିତ କରାଯିବ ସେଦିଗରେ କାର୍ଯ୍ୟ କରିବୁ ।
ରାଜସ୍ୱ ବିଭାଗରେ ହାତଗୁଞ୍ଜାର ଅଭିଯୋଗ ଆସିଲେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯିବ । ଶୂନ୍ୟ ସହନଶୀଳ ନୀତିରେ କାର୍ଯ୍ୟ କରାଯିବ । ନା ଖାଉଙ୍ଗା ନା ଖାନେ ଦୁଙ୍ଗା, ମୋଦିଙ୍କ ନାରା ଓଡ଼ିଶାରେ ୧୦୦ ପ୍ରତିଶତ କାମ ହେବ। ଦୁର୍ନୀତିକୁ ଆଦୌ ପ୍ରଶୟ ଦିଆଯିବନି ବୋଲି କହିଛନ୍ତି ବିଭାଗୀୟ ମନ୍ତ୍ରୀ ସୁରେଶ ପୂଜାରୀ ।