ପୁଲବାମା ହମଲାକୁ ନେଇ ପ୍ରଧାନମନ୍ତ୍ରୀଙ୍କ ପାଲଟା ଆକ୍ରମଣ । କହିଲେ, ସହିଦଙ୍କୁ ନେଇ କୁତ୍ସିତ ରାଜନୀତି କରିଥିଲେ ବିରୋଧୀ । ପଡୋଶୀ ଖୋଲିଦେଲା ସେମାନଙ୍କ ମୁଖା । ନାଁ ନନେଇ ଚୀନ ଓ ପାକିସ୍ତାନକୁ ଦେଲେ କଡା ସନ୍ଦେଶ
କନକ ବ୍ୟୁରୋ : ରାଷ୍ଟ୍ରୀୟ ଏକତା ଦିବସ ଅବସରରେ ଗୁଜରାଟ ସ୍ଥିତ ଷ୍ଟାଚ୍ୟୁ ଅଫ ୟୁନିଟି ଠାରେ ଆୟୋଜିତ ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ବିରୋଧୀଙ୍କ ଟାର୍ଗେଟ କରିଛନ୍ତି । ପୁଲବାମା ହମଲାକୁ ପ୍ରସଙ୍ଗ କରି ବିରୋଧୀଙ୍କ ଉପରେ ବର୍ଷିଛନ୍ତି ନରେନ୍ଦ୍ର ମୋଦି ।
Kanak News is now on WhatsApp
Join and get latest news updates delivered to you via WhatsApp
ପୁଲବାମା ଆତଙ୍କବାଦୀ ହମଲା ପ୍ରସଙ୍ଗରେ କଂଗ୍ରେସର ନାମ ନନେଇ ବିରୋଧୀଙ୍କ ଉପରେ ବଡ ଆକ୍ରମଣ କରିଛନ୍ତି ପ୍ରଧାନମନ୍ତ୍ରୀ । କହିଛନ୍ତି ଆତଙ୍କୀ ହମଲା ପରେ ନେତା କଳା କୌଶଳ ଦେଖାଇ ସରକାରଙ୍କ ଉପରେ ଭିନ୍ନ ଭିନ୍ନ ପ୍ରଶ୍ନବାଣ ଛାଡୁଥିଲେ । ହେଲେ ପଡୋଶୀ ଦେଶରୁ ଯେଉଁ ଖବର ଆସିଲା, ତାହା ସେହି ଦଳଗୁଡିକର ମୁଖା ଖୋଲିଦେଲା ।
ସେହିପରି ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଉଦାହରଣ ଦେଇ ରାଜନୈତିକ ଦଳକୁ ଜାତୀୟ ସୁରକ୍ଷାକୁ ନେଇ ରାଜନୀତି ନକରିବାକୁ କହିଛନ୍ତି । ଚୀନ ସହ ଲଦ୍ଦାଖ ସୀମାରେ ମୁହାମୁହିଁ ପ୍ରସଙ୍ଗକୁ ନେଇ ଗୁଜରାଟରୁ ଡ୍ରାଗନକୁ କଡା ଚେତାବନୀ ଦେଇଛନ୍ତି ମୋଦି । କହିଛନ୍ତି ଭାରତକୁ କେହି ନାଲି ଆଖି ଦେଖାଇ ପାରିବ ନାହିଁ ଆଉ ଯିଏ ଦୁଃସାହାସ କରିବ ତାକୁ ମୁହଁତୋଡ ଜବାବ ଦିଆଯିବ ।
ସେହିପରି ପାକିସ୍ତାନର ନାମ ନନେଇ ଫ୍ରାନ୍ସ କାର୍ଟୁନ ବିବାଦକୁ ନେଇ କଡା ଟିପ୍ପଣୀ କରିଛନ୍ତି ପ୍ରଧାନମନ୍ତ୍ରୀ । ପାକିସ୍ତାନ ସଂସଦରେ ମନ୍ତ୍ରୀ ଫୱାଦ ଚୌଧୁରୀ ପୁଲବାମା ହମଲା ଇମ୍ରାନ ସରକାରଙ୍କ କାମ ବୋଲି ଗର୍ବର ସହ କହିଥିଲେ । ପଡୋଶୀର ସ୍ୱୀକାରୋକ୍ତି ପରେ ପଟେଲଙ୍କ ଜନ୍ମଜୟନ୍ତୀରେ ବିରୋଧୀଙ୍କ ଉପରେ ବର୍ଷିଛନ୍ତି ପ୍ରଧାନମନ୍ତ୍ରୀ ।