ମେକ୍ସିକୋର ହିରୋ ଫ୍ରିଡା ! ବଞ୍ଚାଇଲା ୫୪ ଜୀବନ, ପୂରା ଦେଶ କରୁଛି ସଲାମ
ଗତ ବୁଧବାର ମେକ୍ସିକୋରେ ଶକ୍ତିଶାଳୀ ଭୂମିକମ୍ପ ହୋଇ ରାଜଧାନୀ ମେକ୍ସିକୋ ସିଟି ସମେତ ୫ଟି ପ୍ରଦେଶରେ ବିପୁଳ କ୍ଷୟକ୍ଷତି ଘଟିଥିଲା ।
ଏହି ଭୂମିକମ୍ପ ଏତେ ଭୟଙ୍କର ଥିଲା ଯେ ପାଖାପାଖି ୨୭୪ ଲୋକ ମୃତ୍ୟୁ ବରଣ କରିଥିବା ବେଳେ ୨୦୦୦ରୁ ଊର୍ଦ୍ଧ୍ୱ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଏହି ଭୂକମ୍ପର ତୀବ୍ରତା ରିକ୍ଟର ସ୍କେଲରେ ୭.୧ ଥିଲା। ମେକ୍ସିକୋ ସିଟିରେ ୪୪ଟି ସ୍ଥାନରେ ବହୁ କୋଠାଘର ତାସଘର ଭଳି ଭୁଶୁଡ଼ି କଙ୍କ୍ରିଟ ଖଣ୍ଡରେ ପରିଣତ ହୋଇଯାଇଥିଲା । ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ପାଇଁ ୪ ହଜାର ପୁଲିସ, ୧୦ ହଜାର ଯବାନ, ଅଗ୍ନିଶମ ବାହିନୀ ଓ ୧୨୦୦ ସ୍ୱେଚ୍ଛାସେବୀ ନିୟୋଜିତ ହୋଇଥିଲେ । ତେବେ ଉଦ୍ଧାର କାର୍ୟ୍ୟରେ ସାମିଲ ଥିବା ହିରୋଇନ ଫ୍ରିଡାକୁ ନେଇ ଏବେ ଚାରିଆଡେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ହିରୋଇନ ଫ୍ରିଡା । କୌଣସି ହଲିଉଡ ଫିଲ୍ମର ଅଭିନେତ୍ରୀ ନୁହେଁ ବରଂ ମେକ୍ସିକୋ ଡଗ ସ୍କ୍ୱାର୍ଡର ସାହାସୀ କୁକର । ଭୁମିକମ୍ପରେ ପୂରା ସହର ଧୂଳିସାତ ହୋଇଯାଇଥିବା ବେଳେ ଫ୍ରିଡା କିନ୍ତୁ ଦେଖାଇଥିଲା ସାହସିକତାର ପରିଚୟ । ନିଜ ଜୀବନକୁ ପଛ କରି ଭ୍ଙ୍ଗା କୋଠାଘର ତଳୁ ୫୪ ଜଣ ଲୋକଙ୍କ ଜୀବନ ବଞ୍ଚାଇଛି ଫ୍ରିଡା । ତେଣୁ ପୂରା ଦୁନିଆ ଏବେ ଫ୍ରିଡାର ସାହସିକତାକୁ ସଲାମ କରୁଛି । କାରଣ ଫ୍ରିଡା ନଥିଲେ ହୁଏତ ଆଉ କିଛି ସମୟ ମଧ୍ୟରେ ଏହି ୫୪ ଜଣଙ୍କ ଜୀବନ ଦୀପ ଲିଭି ଯାଇଥାନ୍ତା । କୁହାଯାଏ କୁକୁର ହେଉଛି ମଣିଷର ସବୁଠାରୁ ସାହାର୍ଯ୍ୟକାରୀ ଓ ବିଶ୍ୱାସୀ ପ୍ରାଣୀ । ଆଉ ଏହାର ସଠିକ୍ ଉଦାହରଣ ହେଉଛି ହିରୋଇନ ଫ୍ରିଡା । କାରଣ ଉଦ୍ଧାର କାର୍ଯ୍ୟରେ ଫ୍ରିଡାର ଏକ ଗୁରୁତ୍ୱପୂର୍ଣ୍ଣ ରୋଲ ରହିଥିଲା । ଆଉ ଏହାପରେ ପୂରା ମେକ୍ସିକୋରେ ଫ୍ରିଡାକୁ ନେଇ ଜୋରସୋର ଚର୍ଚ୍ଚା ହେଉଛି । ମେକ୍ସିକୋ ନୌସେନା ମଧ୍ୟ ଫ୍ରିଡାକୁ ନେଇ ବେଶ୍ ଗର୍ବିତ ବୋଲି କହିଛି ।
କିଏ ଏହି ଫ୍ରିଡା :
ଫ୍ରିଡା ଏମିତି ସେମିତି ସାଧାରଣ ବୁଲା କୁକୁର ନୁହେଁ । ମେକ୍ସିକୋ ନୌସେନାର ଡଗ୍ ସ୍କ୍ୱାର୍ଡର ସବୁଠାରୁ ଉଚ୍ଚପ୍ରଶିକ୍ଷିତ କୁକୁର । ନୌସେନାର ଏକ ଅଧିକାରୀଙ୍କ କହିବା ଅନୁଯାୟୀ, ମାତ୍ର ଦୁଇ ମାସର ହୋଇଥିବା ବେଳେ କିଛି କୁକୁରଙ୍କୁ ପ୍ରଶିକ୍ଷର ପାଇଁ ଚୟନ କରାଯାଇଥାଏ । ଏହାପରେ ପ୍ରତିଦିନ ତିନିରୁ ଚାରି ଘଣ୍ଟା ଧରି ବିଭିନ୍ନ ଖେଳନା ସହ ପ୍ରଶିକ୍ଷଣ ଦିଆଯାଇଥାଏ । ଏପରିକି ମଣିଷର ଗନ୍ଧ ବାରିବା ପାଇଁ ବିଭିନ୍ନ ପ୍ରକାର ଟ୍ରେନିଂ ଦିଆଯାଇଥାଏ ।
ତେବେ ସ୍ପେଶାଲ ଟ୍ରେନିଂ ସମୟରେ ବିଭିନ୍ନ ଭଙ୍ଗ କୋଠାଘର କିମ୍ବା ମାଟିତଳେ ରହିଯାଇଥିବା ଲୋକଙ୍କୁ ଚିହ୍ନଟ କରିବା ପାଇଁ ପ୍ରଶିକ୍ଷଣ ଦିଆଯାଇଥାଏ । ବିଭିନ୍ନ ମିଶନରେ ଯିବା ପୂର୍ବରୁ ଫ୍ରିଡାକୁ ବିଭିନ୍ନ ଉପକରଣ ସହ ସଜ୍ଜିତ କରାଯାଇଥାଏ । ଯେପରିକି ମିଶନରେ ଦରକାର ହେଉଥିବା ସ୍ୱତନ୍ତ୍ର ଚଷମା ଓ ବିଭିନ୍ନ ସୁରକ୍ଷା ଉପକରଣରେ ସଜ୍ଜିତ କରାଯାଇ ଉଦ୍ଧାର ସ୍ଥଳକୁ ଛଡାଯାଇଥାଏ । ମିଶନ ଅଧାରୁ ଯେପରି କୌଣସି ଅସୁବିଧା ନ ହୁଏ ସେଥିପ୍ରତି ଯଥେଷ୍ଟ ଦୃଷ୍ଟି ଦିଆ ଯାଇଥାଏ ।
ବଡ ବଡ ଅପରେସନ ସମୟରେ ଅବା ଉଦ୍ଧାର କାର୍ଯ୍ୟ ସମୟରେ ଉଦ୍ଧାରକାରୀ ଦଳ ଯେଉଁ ସ୍ଥାନରେ ପହଞ୍ଚି ପାରି ନଥାଏ ସେହି ସ୍ଥାନରେ ବେଶ ଆରାମରେ ପହଞ୍ଚି ଯାଇଥାଏ ଫ୍ରିଡା । ପରେ ଫ୍ରିଡା ଶରୀରରେ ଲାଗିଥିବା କ୍ୟାମେରା ଦ୍ୱାରା ସେହି ସ୍ଥାନର ବାସ୍ତବ ଚିତ୍ର ଦେଖି ପାରନ୍ତି ଉଦ୍ଧାରକାରୀ ଦଳ । ତା ଛଡା ଫ୍ରିଡାର ଘ୍ରାଣ ଶକ୍ତି ମଧ୍ୟ ମଣିଷ ଠାରୁ ବହୁତ ଅଧିକ । ଧ୍ୱଂସ ସ୍ତୁପ ତଳେ ପୋତି ହୋଇ ରହିଥିବା ଲୋକଙ୍କୁ ବେଶ ଆରାମରେ ଶୁଙ୍ଘି ଶୁଙ୍ଘି ଖୋଜି ବାହାର କରିଥାଏ ଫ୍ରିଡା ।
ଫ୍ରିଡା ହେଉଛି ଲାବ୍ରାଡୋର ପ୍ରଜାତିର କୁୁକୁର । ଭାରତରୁ ଆରମ୍ଭ କରି ବିଶ୍ୱର ଅନେକ ଦେଶ ଏହି କୁକୁରକୁ ବେଶ ପସନ୍ଦ କରିଥାନ୍ତି । ଏହି ପ୍ରଜାତିର କୁକୁର ବେଶ ଅନୁଶାସିତ । ଲାବ୍ରାଡୋର ପ୍ରଜାତିର କୁକୁର ବହୁତ ସ୍ମାର୍ଟ ସହ ଚାଲାକ ମଧ୍ୟ । ଏହାଛଡା ଏମାନଙ୍କୁ ଅଧିକାଂଶ ସମୟରେ ସୁରକ୍ଷା ସମୟରେ ନିୟୋଜିତ କରାଯାଇଥାଏ । ଏହି ପ୍ରଜାତିର କୁକୁର ପୋଲିସ ଓ ସେନାର ପ୍ରଥମ ପସନ୍ଦ ।