ତାତି କମାଉଛି କାଳବୈଶାଖୀ : ଦୁଇ ଦିନର ବର୍ଷାରେ କମିଲା ତାପମାତ୍ରା, ଏପଟେ ଜଳୁଛି ପଶ୍ଚିମ ଓଡିଶା, ପାରଦ ୪୦ ପାର
କନକ ବ୍ୟୁରୋ : ରାଜ୍ୟର ବିଭିନ୍ନ ସ୍ଥାନରେ କାଳବୈଶାଖୀ ଜନିତ ବର୍ଷା ହେବା ପରେ ଆଜି ଅଧିକାଂଶ ସ୍ଥାନରେ ତାପମାତ୍ରା କମିଯାଇଛି। କିନ୍ତୁ ଟିଟିଲାଗଡ଼, ମାଲକାନଗିରି ଏବଂ ସୋନପୁରରେ ପାରଦ ୪୦ଡିଗ୍ରି ଉପରେ ରହିଛି। ସୋନପୁରରେ ରାଜ୍ୟରେ ସର୍ବାଧିକ ତାପମାତ୍ରା ୪୩ଡିଗ୍ରି ରେକର୍ଡ ହୋଇଛି। ପଶ୍ଚିମ ଓଡ଼ିଶାର କେତେକ ସ୍ଥାନକୁ ଛାଡ଼ିଦେଲେ ଆସନ୍ତା ୪ ତାରିଖ ପର୍ଯ୍ୟନ୍ତ ରାଜ୍ୟର ଅଧିକାଂଶ ସ୍ଥାନରେ ପାରଦ ୪୦ଡିଗ୍ରି ତଳେ ରହିବ ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ପୂର୍ବାନୁମାନ କରିଛି।
Kanak News is now on WhatsApp
Join and get latest news updates delivered to you via WhatsApp
ପାଣିପାଗ କେନ୍ଦ୍ର ନିର୍ଦ୍ଦେଶକ ଶରତ ଚନ୍ଦ୍ର ସାହୁଙ୍କ ସୂଚନା ଅନୁଯାୟୀ, ବଙ୍ଗୋପସାଗରରେ ନିୟମିତ ବ୍ୟବଧାନରେ ଘୂର୍ଣ୍ଣିବଳୟ ସୃଷ୍ଟି ହେଉଥିବାରୁ ଏବଂ ସ୍ଥଳ ଭାଗରେ ପ୍ରବଳ ଖରା ହେଉଥିବାରୁ କାଳବୈଶାଖୀ ଜନିତ ବର୍ଷା ହେଉଛି। ତେଣୁ ଅପରାହ୍ନରେ କାଳବୈଶାଖୀ ଜନିତ ବର୍ଷା ପବନ ହେଉଛି। କିନ୍ତୁ ଆସନ୍ତା ୪ତାରିଖ ପର୍ଯ୍ୟନ୍ତ ବିଳମ୍ବିତ ରାତିରେ କାଳବୈଶାଖୀ ବର୍ଷା ହେବ। ବିଳମ୍ବିତ ରାତିରେ ବର୍ଷା ହେଲେ ପବନ କମ ବହିବ। କିନ୍ତୁ ଜୋରରେ ଘଡ଼ଘଡ଼ି ଓ ବିଜୁଳି ମାରିବ।୫ ତାରିଖରୁ ରାଜ୍ୟରେ ଖରାର ପ୍ରକୋପ ବଢ଼ିବ। ପଶ୍ଚିମ ଓଡ଼ିଶାରୁ ଆରମ୍ଭ କରି ଆଭ୍ୟନ୍ତରୀଣ ଓ ଦକ୍ଷିଣ ଓଡ଼ିଶାରେ ପାରଦ ୪୨ଡିଗ୍ରି ଉପରେ ରହିବ। ଉପକୂଳ ଏବଂ ଉତ୍ତର ଓଡ଼ିଶାର କେତେକ ସ୍ଥାନରେ ପାରଦ ୪୦ଡିଗ୍ରି ପାଖାପାଖି ରହିବ ବୋଲି ଜଣାପଡ଼ିଛି। ଗତକାଲି ରାଜ୍ୟର ପ୍ରାୟ ସମସ୍ତ ସ୍ଥାନରେ କାଳବୈଶାଖୀ ଜନିତ ବର୍ଷା ପବନ ହୋଇଥିବାବେଳେ ଦାରିଙ୍ଗବାଡ଼ିରେ ସର୍ବାଧିକ ୩୦ମିମି ବର୍ଷା ହୋଇଛି। ଗୋପାଳପୁରରେ ୦.୨ମିମି ବର୍ଷା ହୋଇଛି। ସୋମବାର ଅପରାହ୍ନ ସୁଦ୍ଧା ରାଜ୍ୟର ଅଧିକାଂଶ ସ୍ଥାନରେ ବର୍ଷାପବନ ହେବ ବୋଲି ପାଣିପାଗ କେନ୍ଦ୍ରରୁ ସୂଚନା ମିଳିଛି। ଅପରପକ୍ଷେ ଆଜି ସୋନପୁରରେ ରାଜ୍ୟର ସର୍ବାଧିକ ତାପମାତ୍ରା ୪୩ଡିଗ୍ରି ରେକର୍ଡ ହୋଇଥିବାବେଳେ ଟିଟିଲାଗଡ଼ରେ ୪୦.୫, ମାଲକାନଗିରିରେ ୪୦.୪, ବଲାଙ୍ଗୀରରେ ୩୯.୫, ଭବାନିପାଟଣାରେ ୩୯.୩, ତାଳଚେରରେ ୩୮.୧, ସମ୍ବଲପୁରରେ ୩୯.୨, ଭୁବନେଶ୍ୱରରେ ୩୭.୧, କଟକରେ ୩୬.୫ଡିଗ୍ରି ରେକର୍ଡ ହୋଇଛି।