ପର୍ଯ୍ୟଟକଙ୍କ ପାଇଁ ଖୁସି ଖବର… ରିଲାଏନ୍ସ ଖୋଲିବାକୁ ଯାଉଛି ବିଶ୍ୱର ବୃହତ୍ତମ ଚିଡିଆଖାନା । ଜାଣନ୍ତୁ… ଏହା କେଉଁଠି ଅବସ୍ଥିତ ରହିବ ଏବଂ କେବେ ଖୋଲିବ
ଗୁଜରାଟର ଜାମନଗରରେ ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ ବିଶ୍ୱର ବୃହତ୍ତମ ଚିଡ଼ିଆଖାନା ନିର୍ମାଣ କରିବ ବୋଲି ଶନିବାର ଦିନ କମ୍ପାନିର ଜଣେ ଶୀର୍ଷସ୍ତରୀୟ ଅଧିକାରୀ ସୁନିଶ୍ଚିତ କରି କହିଛନ୍ତି । ଏହି ଚିଡ଼ିଆଖାନାରେ ଭାରତ ଏବଂ ବିଶ୍ୱର ବିବିଧ ପ୍ରଜାତିର ପ୍ରାୟ ୧୦୦ ସଂଖ୍ୟକ ପଶୁ, ପକ୍ଷୀ ଓ ସରୀସୃପଙ୍କୁ ରଖାଯିବ ।
Kanak News is now on WhatsApp
Join and get latest news updates delivered to you via WhatsApp
ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡର ଅଧ୍ୟକ୍ଷ ମୁକେଶ ଅମ୍ବାନୀଙ୍କ ସବା ସାନପୁଅ ଅନନ୍ତ ଅମ୍ବାନୀଙ୍କ ପ୍ରକଳ୍ପିତ ଏହି ଚିଡ଼ିଆଖାନା ୨୮୦ ଏକର ପରିମିତ ଜମିରେ ନିର୍ମାଣ କରାଯିବ । ଏହି ଜମି ଜାମନଗର ନିକଟ ମୋତି ଖାଓ୍ଵଡ଼ିରେ ଥିବା କମ୍ପାନି ତଥା ବିଶ୍ୱର ବୃହତମ ତୈଳ ଶୋଧନ ପରିସର ନିକଟରେ ଅବସ୍ଥିତ ।
କୋଭିଡ୍-୧୯ ଯୋଗୁଁ ସ୍ଥଗିତ ରହିଥିବା ଏହି ପ୍ରକଳ୍ପ ଯଦି ଆଉ ସ୍ଥଗିତ ନ ରହେ, ତେବେ ଆସନ୍ତା ଦୁଇ ବର୍ଷ ମଧ୍ୟରେ ଚିଡ଼ିଆଖାନାଟି ସର୍ବସାଧାରଣଙ୍କ ନିମନ୍ତେ ଉନ୍ମୁକ୍ତ ହୋଇପାରିବ ବୋଲି କମ୍ପାନିର ଅଧିକାରୀଜଣକ କହିଛନ୍ତି ।
ଏହି ଚିଡ଼ିଆଖାନାର ନାଁ ଦିଆଯିବ ‘ଗ୍ରିନ୍ସ ଜୁଲୋଜିକାଲ୍, ରେସ୍କ୍ୟୁ ଆଣ୍ଡ୍ ରିହାବିଲିଟେସନ୍ କିଙ୍ଗ୍ଡମ୍’ । ଚିଡ଼ିଆଖାନା ନିମନ୍ତେ କେନ୍ଦ୍ର ଓ ରାଜ୍ୟ ସରକାରଙ୍କ ଠାରୁ ଆବଶ୍ୟକ ଅନୁମୋଦନ ମିଳିସାରିଛି ବୋଲି ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ କର୍ପୋରେଟ ବ୍ୟାପାରର ନିର୍ଦେଶକ ପରିମଳ ନାଥଓ୍ଵାନି କହିଛନ୍ତି ।
ଏହି ଚିଡ଼ିଆଖାନାରେ ‘ଫରେଷ୍ଟ ଇଣ୍ଡିଆ’, ‘ଫ୍ରଗ୍ ହାଉସ’, ‘ଇନସେକ୍ଟ ଲାଇଫ୍’, ‘ଡ୍ରାଗନସ୍ ଲ୍ୟାଣ୍ଡ’ ‘ଏକ୍ସୋଟିକ୍ ଆଇଲାଣ୍ଡ’, ‘ଓ୍ଵାଇଲ୍ଡ ଟ୍ରେଲ୍ ଅଫ୍ ଗୁଜରାଟ’ ଏବଂ ‘ଆକ୍ୱାଟିକ କିଙ୍ଗଡମ’ ଭଳି ବିଭାଗ ସହ ଅନ୍ୟାନ୍ୟ ବିଭାଗ ରହିବ।