ଗଲୱାନ ଘାଟିରେ ଡ୍ରାଗନ ସେନା ସହ ଲଢି ଦେଶ ପାଇଁ ବଳିଦାନ ଦେଇଥିବା ଓଡିଆ ବୀର ପୁଅଙ୍କୁ ଆଜି ବି ଝୁରୁଛି ମାଟି । ବର୍ଷେ ପରେ କେମିତି ଅଛି ସହିଦଙ୍କ ପରିବାର… ?
କନକ ବ୍ୟୁରୋ: ଦିନ ଯାଇଛି ଚିହ୍ନ ରହିଛି । ବର୍ଷେ ପରେ ବି ବୀର ପୁଅକୁ ଝୁରୁଛି ମାଆ, ଝୁରୁଛି ମାଟି । ଗାଁ ପାଇଁ ଗୌରବ ପାଲଟିଥିବା ପୁଅକୁ ଖୋଜି ହେଉଛନ୍ତି ଗାଁ ଲୋକେ । ଠିକ୍ ବର୍ଷେ ତଳେ ଅର୍ଥାତ ଜୁନ ୧୫ ୨୦୨୦ରେ ଗଲୱାନ ଘାଟିରେ ଡ୍ରାଗନ ସେନା ସହ ମୁହାଁମୁହିଁ ହୋଇଥିଲେ ଭାରତୀୟ ସେନା । ଜୋରଦାର ସଙ୍ଘର୍ଷରେ ୨୦ ଯବାନ ସହିଦ ହୋଇଥିବା ବେଳେ ଓଡିଶା ହରାଇଥିଲା ୨ ବୀର ଓଡିଆ ପୁଅଙ୍କୁ । କନ୍ଧମାଳର ଚନ୍ଦ୍ରକାନ୍ତ ପ୍ରଧାନ ଓ ମୟୂରଭଞ୍ଜର ନନ୍ଦୁରାମ ସୋରେନ ଦେଶ ପାଇଁ ବଳୀଦାନ ଦେଇଥିଲେ । ଆଉ ସେହି ବୀର ଯବାନଙ୍କ ସହିଦକୁ ୟାରି ଭିତରେ ପୂରିଛି ବର୍ଷେ । ବଳିଦାନକୁ ଏକ ବର୍ଷ ପୂରିଥିଲେ ବି ଏବେବି ଝୁରି ହେଉଛି ମାଟି ମାଆ…
Kanak News is now on WhatsApp
Join and get latest news updates delivered to you via WhatsApp
କାନ୍ଥରେ ଟଙ୍ଗା ହୋଇଛି ବୀର ପୁଅର ସ୍ମୃତି, କାନ୍ଥରେ ଝୁଲୁଥି ଗୌରବର ଗାଥା । ପୁଅର ବୀର ବେଶ ଓ ପୁଳା ପୁଳା ପଦକକୁ ଦେଖି ଝୁରିହେଉଛନ୍ତି ପରିବାର ଲୋକେ । ଆଉ ଲୁହ, କୋହର ମଝାମଝିରେ ପୁଅ ପାଇଁ ଗର୍ବ କରୁଛନ୍ତି କନ୍ଧମାଳ ରାଇକିଆ ବିୟରପାଙ୍ଗା ଗାଁର ବୀର ସହିଦ ଚନ୍ଦ୍ରକାନ୍ତଙ୍କ ବାପା । ଭାଇ କଥା ଭାରି ମନେପଡୁଛି । ବର୍ଷେ ହେଲା ଭାଇ ବିନା ବଞ୍ଚିବା କଷ୍ଟ ହେଉଛି । ବୀର ଭାଇର କଥା କହିବା ବେଳେ କାନ୍ଦି ପକାଉଛି ଗେହ୍ଲି ଭଉଣୀ । ସେପଟେ ଚନ୍ଦ୍ରକାନ୍ତ ପରିବାରର ଏକମାତ୍ର ରୋଜଗାରିଆ ପୁଅ ହୋଇଥିବାରୁ ସେ ସହିଦ ହେବା ପରେ ଏ ଦୁଃଖରେ ବି ଦିନ ବିତୁଛି ।
୨୦୧୪ରେ ସେନାରେ ସାମିଲ ହୋଇଥିଲେ ବୀର ଯବାନ ଚନ୍ଦ୍ରକାନ୍ତ । ମାତ୍ର ଗତବର୍ଷ ଭାରତ- ଚୀନ ସୀମାରେ ମୁତୟନ ହୋଇଥିବା ବେଳେ ସଙ୍ଘର୍ଷରେ ପ୍ରାଣ ହରାଇଥିଲେ । ଆଉ ଦେଶ ପାଇଁ ସହିଦ ହୋଇଥିଲେ । ବୀର ପୁଅ ଦେଶ ପାଇଁ ବଳିଦାନ ଦେବା ପରେ ତାଙ୍କ ନାଁରେ ରାଇକିଆ ବସଷ୍ଟାଣ୍ଡ ଏବଂ ଏକ ପ୍ରତିମୂର୍ତ୍ତି ତୋଳିବାକୁ ନେତାଏ ପ୍ରତିଶ୍ରୁତି ଦେଇଥିଲେ ବି ବର୍ଷେ ପରେ ସବୁ ପାଶୋରି ଯାଇଛନ୍ତି ।
ସେପଟେ ଗଲୱାନ ସଙ୍ଘର୍ଷ ଆଉ ଜଣେ ବୀର ଓଡିଆ ପୁଅଙ୍କୁ ଛଡାଇ ନେଇଥିଲା । ମୟୂରଭଞ୍ଜ ଜିଲ୍ଲା ରାଇରାଙ୍ଗପୁର ବଡ ଚମ୍ପାଉଦା ଗାଁର ନନ୍ଦୁରାମ ସୋରେନ ସହିଦ ହୋଇଥିଲେ । ଇତି ମଧ୍ୟରେ ତାଙ୍କ ସହିଦକୁ ବର୍ଷେ ବିତିଥିବା ବେଳେ ବୀର ପୁଅଙ୍କୁ ମନେପକାଇ ଶ୍ରଦ୍ଧାଞ୍ଜଳୀ ଦେଇଛି ମାଟି । ସହିଦ ସ୍ମୃତି ସ୍ଥଳରେ ଶ୍ରଦ୍ଧାଞ୍ଜଳୀ ଦେଇଛି ପୋଲିସ, ପ୍ରଶାସନ ଓ ତାଙ୍କୁ ଭଲପାଉଥିବା ଲୋକେ । ସ୍ୱାମୀଙ୍କ ଶେଷ କଲ ଆଉ ତାଙ୍କ କଥା କହି ଆଖିରେ ଲୁହ ଜକେଇ ଆଣିଛନ୍ତି ସହିଦଙ୍କ ସ୍ତ୍ରୀ ।
ଶତ୍ରୁଙ୍କ ସହ ଲଢି ଦେଶ ପାଇଁ ପ୍ରାଣବଳୀ ଦେଇଥିବା ବାପାଙ୍କ ପାଇଁ ଗର୍ବ କରିଛନ୍ତି ୩ ଝିଅ । ଆଉ ବାପାଙ୍କ ପରି ଯବାନ ହେବାକୁ ଶପଥ ନେଇଛନ୍ତି । ସତରେ ଦେଶ ପାଇଁ ବଳୀଦାନ ଦେଇଥିବା ପ୍ରତିଟି ବୀରଙ୍କ ତ୍ୟାଗକୁ କେବେ ଭୁଲିଛି ନା କେବେ ଭୁଲି ପାରିବ ଦେଶ…