ମିଠା ଖାଅ, ମତେ ଭୋଟ ଖଣ୍ଡେ ଦିଅ… ଘର ଘର ବୁଲି ମିଠା ଦେଇ ପ୍ରଚାର କରୁଛନ୍ତି ମାଉସୀ ।
କନକ ବ୍ୟୁରୋ: ମିଠା ଖାଅ, ମତେ ଭୋଟ ଖଣ୍ଡେ ଦିଅ । ମିଠା ଖାଇ ମନେ ରଖିଥିବ, ଭୋଟ ଦେଲା ବେଳେ ମୋ ଚିହ୍ନ ମନେପକେଇବ । ଘରଘର ବୁଲି ଏମିତି ଲୋକଙ୍କ ପାଟିରେ ମିଠାଟିଏ ଦେଇ ନିଜ ପାଇଁ ଭୋଟ ମାଗୁଛନ୍ତି ଜଣେ ବୃଦ୍ଧା । ପ୍ରତିଦିନ ପଞ୍ଚାୟତ ନିର୍ବାଚନକୁ ନେଇ ରାଜନୀତିର ରୋଚକ ଚିତ୍ର ଆସୁଥିବା ବେଳେ କେନ୍ଦ୍ରାପଡାରୁ ଆସିଛି ମାଉସୀଙ୍କ ମିଠା ଦିଆ ନିଆରା ପ୍ରଚାର ।
Kanak News is now on WhatsApp
Join and get latest news updates delivered to you via WhatsApp
କରୋନା ପାଇଁ ପ୍ରଚାର ଉପରେ କଟକଣା ଲାଗିଥିବା ବେଳେ ଘର ଘର ବୁଲି, ଗାଁର ଗଳି ଗଳି ଯାଇ ଲୋକଙ୍କୁ ମିଠା ଖୁଆଇ ଖଣ୍ଡେ ଭୋଟ ମାଗୁଛନ୍ତି ବୃଦ୍ଧା । କେନ୍ଦ୍ରାପଡା ଜିଲ୍ଲା ଅଙ୍ଗୁଲାଇ ପଞ୍ଚାୟତର ୧୪ ନମ୍ବର ୱାର୍ଡର ୱାର୍ଡମେମ୍ବର ପ୍ରାର୍ଥୀ ଭାବେ ଲଢେଇ କରୁଛନ୍ତି ରେବତୀ ମନ୍ତ୍ରୀ । ତାଙ୍କୁ ବୟସ କେତେ ସେ ଜାଣି ନାହାନ୍ତି କିନ୍ତୁ ଭୋଟର ତାଲିକାରେ ୭୨ ବୋଲି ଲେଖା ହୋଇଛି । ବୟସର ଶେଷ ସୋପାନରେ ସେ ରାଜନୀତିରେ ପାଦ ରଖି ନିଜ ଗାଁର ପରିବର୍ତ୍ତନ, ଗାଁର ବିକାଶ କରିବାକୁ ଅଣ୍ଟା ଭିଡିଛନ୍ତି ।
ବୟସର ଅପରାହ୍ନରେ ବି ସେ ହାରି ଯାଇ ନାହାନ୍ତି । ସ୍ୱାମୀ ୱାର୍ଡ ମେମ୍ବର ଥିଲେ ତେଣୁ ତାଙ୍କର ବି ଶେଷ ଇଚ୍ଛା ସେ ବି ନିର୍ବାଚନରେ ଲଢେଇ କରି ଲୋକଙ୍କ ସେବା କରିବେ । ତେଣୁ ମନରେ ପ୍ରବଳ ଇଚ୍ଛାଶକ୍ତି, ଜୋରଦାର ଜୋସ ନେଇ ସବୁଦିନ ସେ ଗାଁକୁ ବାହାରି ଯାଉଛନ୍ତି ଆଉ ଲୋକଙ୍କୁ ଭୋଟ ଖଣ୍ଡେ ଦେବାକୁ କହୁଛନ୍ତି । ଆଉ ମୁହଁରେ ମିଠା ଦେଇ କହୁଛନ୍ତି, ମନେ ରଖିବ । ମତେ ଭୋଟ ଦେବ ।
ବିଜୟ ପରେ କିଏ ମିଠା ବାଣ୍ଟେ । ହେଲେ ରେବତୀ ମାଉସୀ କିନ୍ତୁ ବିଜୟ ପୂର୍ବରୁ ମିଠା ଦେଇ ଲୋକଙ୍କୁ ଭୋଟ ମାଗୁଛନ୍ତି । ଯାହା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।