ସ୍କାମ୍ ଧରିଲେ, ଗୁଳି ଖାଇଲେ । ସୂଚନା ଅଧିକାର କର୍ମୀ ଅଭିମନ୍ୟୁ ପଣ୍ଡା ହତ୍ୟାକାଣ୍ଡକୁ ବିତିଗଲାଣି ୩ ଦିନ, ହେଲେ ଅପରାଧୀଙ୍କ ପତା ପାଉନାହିଁ ପୋଲିସ । ହତ୍ୟାକାଣ୍ଡ ପଛରେ ରହିଛି ସାଂଘାତିକ ଷଡଯନ୍ତ୍ର?
କନକ ବ୍ୟୁରୋ : କନ୍ଧମାଳ ବାଲିଗୁଡାରେ ସୂଚନା ଅଧିକାର କର୍ମୀ ଅଭିମନ୍ୟୁ ପଣ୍ଡା ହତ୍ୟାକାଣ୍ଡକୁ ତିନି ଦିନ ବିତିଗଲାଣି, ହେଲେ ଅପରାଧୀଙ୍କ ଟେର୍ ପାଉନାହିଁ ପୋଲିସ । ୧୦ ତାରିଖ ଦିନ ସକାଳେ, ତାଙ୍କୁ ଘରୁ ଡାକି ନେଇ ଗୁଳି କରି ମାରିଥିଲେ ଦୁର୍ବୃତ । ପୋଲିସ ସୂତ୍ରରୁ ଜାଣିବାକୁ ମିଳିଛି, ସୁପାରୀ ଦେଇ ତାଙ୍କୁ ହତ୍ୟା କରାଯାଇଛି । ତେବେ କାହିଁକି ତାଙ୍କୁ ହତ୍ୟା କରାଗଲା, ଏହା ପଛରେ ମାଷ୍ଟର ମାଇଣ୍ଡ କିଏ, ଏ ନେଇ ପୋଲିସ କିଛି ସ୍ପଷ୍ଟ କରିପାରୁନାହିଁ । ତେବେ ଯେଉଁ ସବୁ କାରଣ ସାମନାକୁ ଆସୁଛି, ତାହା ଯଦି ସତ ହୋଇଥାଏ, ତେବେ ଏହି ହତ୍ୟାକାଣ୍ଡ ପଛରେ ସାଂଘାତିକ ଷଡ଼ଯନ୍ତ୍ର ଥିବା ସନ୍ଦେହ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ସାରଙ୍ଗଗଡ଼ ସ୍ଥିତ କନ୍ଧମାଳ କଲେଜ ହଷ୍ଟେଲ ନିର୍ମାଣରେ ଲକ୍ଷ ଲକ୍ଷ ଟଙ୍କା ହରିଲୁଟ, ରାସ୍ତା ଦୁର୍ନୀତି, ମଦ ଦୋକାନ ଲାଇସେନସରେ ଅନିୟମିତତା ଭଳି ଅନେକ ପ୍ରସଙ୍ଗକୁ ସାମ୍ନାକୁ ଆଣିଥିଲେ ଅଭିମନ୍ୟୁ ପଣ୍ଡା । ସ୍ଥାନୀୟ ଜଗନ୍ନାଥ ମନ୍ଦିରରେ ଜବରଦଖଲକାରୀଙ୍କୁ ହଟାଇବାରେ ଥିଲା ତାଙ୍କର ପ୍ରମୁଖ ଭୂମିକା । ଏ ନେଇ ଅନେକ ଯନ୍ତ୍ରୀ, ଠିକାଦାର, ଟ୍ରଷ୍ଟର ସଦସ୍ୟ ତାଙ୍କ ଉପରେ କ୍ଷୁବ୍ଧ ହୋଇଥିଲେ । ତେବେ ସୂଚନା ଆଇନ ଅଧିକାର ଆଇନ ବଳରେ କନ୍ଧମାଳ ଜିଲ୍ଲାରେ ବଡ଼ ଧରଣର ‘ପିଡିଏସ୍ ସ୍କାମ୍’ ଧରିଥିଲେ ଅଭିମନ୍ୟୁ । ଏହି ମାମଲା ପହଁଞ୍ଚିଥିଲା ହାଇକୋର୍ଟରେ । ଅଭିଯୋଗ ହୋଇଛି, ଅସାଧୁ ଯନ୍ତ୍ରୀ, ଠିକାଦାର, ଜମି ମାଫିଆ, ପିଡିଏସ୍ ଏଜେଣ୍ଟଙ୍କ ଟାର୍ଗେଟରେ ରହିଥିଲେ ଅଭିମନ୍ୟୁ ।
ଏବେ ଯେଉଁ ସନ୍ଦେହ ପ୍ରକାଶ ପାଇଛି, ତାହା ଅତି ସାଂଘାତିକ । ସୂଚନା ଅଧିକାର କର୍ମୀ ଅଭିମନ୍ୟୁ ପଣ୍ଡାଙ୍କୁ ରାସ୍ତାରୁ ହଟାଇବା ପାଇଁ ରଚାଯାଇଥିଲା ବଡ଼ ଧରଣର ଷଡ଼ଯନ୍ତ୍ର । ସୁପାରୀ କିଲରଙ୍କୁ ଡକାଇ ଅଭିମନ୍ୟୁଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ସରକାର ତୁରନ୍ତ ତାଙ୍କ ପରିବାରକୁ କ୍ଷତିପୂରଣ ଦେବା ସହ ସୂଚନା ଅଧିକାର କର୍ମୀଙ୍କ ସୁରକ୍ଷା ପାଇଁ ଆଇନ ଆଣନ୍ତୁ ବୋଲି ଓଡ଼ିଶା ସୂଚନା ଅଧିକାର ଅଭିଯାନ ପକ୍ଷରୁ ଦାବି କରାଯାଇଛି ।
ଗତ ମଙ୍ଗଳବାର ସକାଳୁ ଦୁଇଜଣ ଦୁର୍ବୃତ ବାଇକରେ ଆସି ଅଭିମୁନ୍ୟୁ ପଣ୍ଡାଙ୍କୁ ଘରୁ ଡାକିଥିଲେ । ଅଭିମନ୍ୟୁ ଘରୁ ବାହାରକୁ ଆସିବା ପରେ ତାଙ୍କୁ କିଛି କାଗଜ ଦେଖାଇବା ସହ ଗୁଳି କରି ଦୁର୍ବୃତ ଫେରାର ହୋଇଯାଇଥିଲେ । ବାଲିଗୁଡା ମେଡିକାଲରେ ଅଭିମନ୍ୟୁଙ୍କର ମୃତ୍ୟୁ ହୋଇଥିଲା ।