କୋହଲିଙ୍କ ସହ ଏହି ଖେଳାଳିଙ୍କୁ ରିଟେନ୍ ରଖିପାରେ ବାଙ୍ଗାଲୋର ଟିମ୍ । ଜାଣନ୍ତୁ, କେଉଁ ଖେଳାଳିଙ୍କୁ ନେଇ ବଢୁଛି ଚର୍ଚ୍ଚା…
କନକ ବ୍ୟୁରୋ: ଆଇପିଏଲର ଆଗାମୀ ସିଜିନ ଆରମ୍ଭ ହେବା ପୂୂର୍ବରୁ ଏବେ ଖେଳାଳିମାନଙ୍କର ମହାନିଲାମୀକୁ ନେଇ ଆରମ୍ଭ ହୋଇଛି ଚର୍ଚ୍ଚା । କେଉଁ ଦଳ କେଉଁ ଖେଳାଳିଙ୍କୁ ରିଟେନ୍ ରଖିବ, କେଉଁ ଖେଳାଳିଙ୍କୁ ନିଲାମକୁ ଛାଡିବ ତାକୁ ନେଇ ଆଶା ଆଶଙ୍କା ଲାଗି ରହିଥିବାବେଳେ ରୟାଲ ଚାଲେଞ୍ଜର୍ସ ବାଙ୍ଗାଲୋର ଦଳକୁ ନେଇ ଆସିଛି ବଡ ଖବର ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁସାରେ, ଆରସିବି ବିରାଟ କୋହଲିଙ୍କ ସହିତ ଅନ୍ୟ ଦୁଇ ଜଣ ଭାରତୀୟ ଖେଳାଳି ଓ ଜଣେ ବିଦେଶୀ ଖେଳାଳିଙ୍କୁ ରିଟେନ୍ ରଖିପାରେ । ତେବେ ଏହି ବିଦେଶ ଖେଳାଳି ଜଣକ ଗ୍ଲେନ୍ ମ୍ୟାକ୍ସୱେଲ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ସେହିପରି ବାଙ୍ଗାଲୋର ନିଜର ଦମଦାର ଖେଳାଳି ଦେବଦତ୍ତ ପାଡିକଲ ଓ ସ୍ପିନର ୟୁଜବେନ୍ଦ୍ର ଚହଲଙ୍କୁ ମଧ୍ୟ ରିଟେନ୍ ରଖିପାରେ ବୋଲି ରିପୋର୍ଟ ପ୍ରକାଶ ପାଉଛି । ତେବେ ଦଳର ନୂଆ ଅଧିନାୟକ କିଏ ହେବ ତାକୁ ନେଇ ଏବେ ବି ଦ୍ୱନ୍ଦ୍ୱ ଲାଗି ରହିଛି । କୋହଲିଙ୍କ ପରେ ଦଳ କୌଣସି ନୂଆ ଖେଳାଳିଙ୍କୁ ଅଧିନାୟକ ପଦ ଦେଇପାରେ ବୋଲି କୁହାଯାଉଛି ।
ଆଉ କିଛି ମାସ ପରେ ଆରମ୍ଭ ହେବାକୁ ଯାଉଛି ଆଇପିଏଲ୍, ଏହା ପୂର୍ବରୁ କିନ୍ତୁ ଖେଳାଳିମାନଙ୍କର ହେବ ମହାନିଲାମୀ ପ୍ରକ୍ରିୟା । ପ୍ରତି ଦଳ ନିଜର ୪ ଜଣ ଖେଳାଳିଙ୍କୁ ଛାଡି ଅନ୍ୟ ସମସ୍ତ ଖେଳାଳିଙ୍କୁ ନିଲାମ ପ୍ରକ୍ରିୟାକୁ ଛାଡିବାକୁ ବାଧ୍ୟ ହେବେ । ଏପରି ସ୍ଥିତିରେ କେଉଁ ଦଳ କେଉଁ ଖେଳାଳିଙ୍କୁ ରିଟେନ୍ ରଖୁଛି ଏବଂ କାହାକୁ ନିଲାମ ପ୍ରକ୍ରିୟାକୁ ଛାଡୁଛି, ତାକୁ ନେଇ ଚର୍ଚ୍ଚା ବଢିଛି । ଗଣମାଧ୍ୟମରେ ଏନେଇ ଅନେକ ରିପୋର୍ଟ ପ୍ରକାଶ ପାଉଥିଲେ ମଧ୍ୟ କୌଣସି ଦଳ ପକ୍ଷରୁ ଏନେଇ ବିଧିବଦ୍ଧ ଘୋଷଣା ହୋଇନାହିଁ । ସୂଚନାଯୋଗ୍ୟ ଯେ, ପ୍ରତି ଦଳ ନଭେମ୍ବର ୩୦ ତାରିଖ ସୁଦ୍ଧା ନିଜର ରିଟେନ୍ ଖେଳାଳିଙ୍କ ତାଲିକା ଦାଖଲ କରିବେ ।
ଏହାପୂର୍ବରୁ ଚେନ୍ନାଇ ସୁପର କିଙ୍ଗସ ମଧ୍ୟ ଧୋନୀଙ୍କ ସହ ଋୁତୁରାଜ ଗାଏକ୍ୱାଡ ଓ ରବୀନ୍ଦ୍ର ଜାଡେଜାଙ୍କୁ ରିଟେନ୍ ରଖିପାରେ ବୋଲି ରିପୋର୍ଟ ପ୍ରକାଶ ପାଇଥିଲା । ସେହିପରି ରାଜସ୍ଥାନ ରୟାଲ୍ସ ନିଜର ଅଧିନାୟକ ସଞ୍ଜୁ ସାମସନଙ୍କୁ ଆଗାମୀ ଆଇପିଏଲ ପାଇଁ ରିଟେନ୍ ରଖିଥିବା ଖବର ମିଳିଛି । ଅନ୍ୟପଟେ ପଞ୍ଜାବ କିଙ୍ଗସ ଅଧିନାୟକ କେ ଏଲ ରାହୁଲ ତାଙ୍କ ଦଳକୁ ବାଏ ବାଏ କହିପାରନ୍ତି ବୋଲି କୁହାଯାଉଛି । ତେବେ ନଭେମ୍ବର ୩୦ ପରେ ଏନେଇ ଏକ ସ୍ପଷ୍ଟ ଚିତ୍ର ଆସିପାରିବ । ଆଗାମୀ ଆଇପିଏଲରେ ୮ଟି ଦଳ ବଦଳରେ ୧୦ ଦଳ ଟ୍ରଫି ପାଇଁ ମୁହାଁମୁହିଁ ହେବେ । ନୂଆ କରି ଅହମ୍ମଦାବାଦ ଓ ଲକ୍ଷ୍ନୌ ଟିମ୍ ନିଜର ଆଇପିଏଲ୍ ଅଭିଯାନ ଆରମ୍ଭ କରିବେ । ତେବେ ଏହାପୂର୍ବରୁ ଖେଳାଳିମାନଙ୍କର ମହାନିଲାମୀ ପ୍ରକ୍ରିୟା ହେବାକୁ ବାକି ରହିଛି ।