କନକ ବ୍ୟୁରୋ: ଇଣ୍ଡିଆନ୍ ପ୍ରିମିୟର ଲିଗରେ ଶନିବାର (ଏପ୍ରିଲ ୨୩) ଭେଟାଭେଟି ହୋଇଥିଲେ ରୟାଲ ଚାଲେଞ୍ଜର୍ସ ବାଙ୍ଗାଲୋର ଓ ସନରାଇଜର୍ସ ହାଇଦ୍ରାବାଦ । ଏହି ମ୍ୟାଚରେ ଆରସିବି ଦଳକୁ ଶୋଚନୀୟ ପରାଜୟ ବରଣ କରିବାକୁ ପଡିଛି । ଦଳ କେବଳ ୬୮ ରନରେ ଅଲଆଉଟ୍ ହୋଇଯିବା ପରେ ହାଇଦ୍ରାବାଦ ନିକଟରୁ ୯ ୱିକେଟରେ ପରାସ୍ତ ହୋଇଛି । ତେବେ ଏହି ଏପ୍ରିଲ ୨୩ ତାରିଖ ରୟାଲ ଚାଲେଞ୍ଜର୍ସ ବାଙ୍ଗାଲୋର ପାଇଁ ଲେଖିଛି ଆଉ ଏକ ରେକର୍ଡ ।
Kanak News is now on WhatsApp
Join and get latest news updates delivered to you via WhatsApp
ଆଇପିଏଲ୍ ଇତିହାସରେ ଏପ୍ରିଲ ୨୩ ତାରିଖ ବାଙ୍ଗାଲୋର ଟିମ୍ ପାଇଁ ଉଭୟ ସମ୍ମାନ ଆଉ ଲଜ୍ଜ୍ୟାର ଦିନ ହେଇଛି । ଏହି ତାରିଖରେ ହିଁ ଦଳ ନିଜର ସବୁଠୁ ବଡ ସ୍କୋର କରିଥିବାବେଳେ, ଏହି ତାରିଖରେ ହିଁ କରିଛି ନିଜର ସର୍ବନିମ୍ନ ସ୍କୋର ।
୨୦୧୩ ତାରିଖ ଏପ୍ରିଲ ୨୩ ତାରିଖରେ ଆରସିବି- ପୁଣେ ୱାରିୟର୍ସ ବିରୋଧରେ ଏକ ମ୍ୟାଚ୍ ଖେଳିଥିଲା । ଏହି ମ୍ୟାଚରେ ବାଙ୍ଗାଲୋର ପକ୍ଷରୁ କ୍ରିସ୍ ଗେଲ କେବଳ ୩୦ ବଲରେ ମାରିଥିଲେ ଶତକ । ମୋଟ ୬୬ଟି ବଲର ସମ୍ମୁଖୀନ ହେଇ ଗେଲ ଏହି ମ୍ୟାଚରେ ମାରିଥିଲେ ୧୭୫ ରନ୍ । ଆଉ ଏହି ଇଂନିସ ଭିତରେ ଥିବା ୧୭ଟି ଛକା ଓ ୧୩ଟି ଚୌକା । ତେବେ ଗେଲଙ୍କ ଏହି ଇଂନିସ ବଳରେ ସେଦିନ ୨୦ ଓଭରରେ ୨୬୩ ରନ୍ କରିଥିଲା ବାଙ୍ଗାଲୋର । ଯାହା ଆଜି ବି ଆଇପିଏଲ ଇତିହାସରେ ସବୁଠୁ ବଡ ସ୍କୋର ହୋଇ ରହିଛି ।
ସେହିପରି ଏପ୍ରିଲ ୨୩ ତାରିଖ ୨୦୧୭ ମସିହାରେ ଆଇପିଏଲ୍ ଇତିହାସରେ ଲଜ୍ଜ୍ୟାଜନକ ଦିନ ଦେଖିଥିଲା ରୟାଲ ଚାଲେଞ୍ଜର୍ସ ବାଙ୍ଗାଲୋର । ଏହି ତାରିଖରେ ହିଁ କୋଲାକାତା ବିରୋଧରେ ଦଳ ନିଜର ବ୍ୟକ୍ତିଗତ ସର୍ବନିମ୍ନ ସ୍କୋର ଦେଖିଥିଲା । ମାତ୍ର ୪୯ ରନରେ ଦଳର ସବୁ ବ୍ୟାଟ୍ସମ୍ୟାନ୍ ପ୍ୟାଭିଲିୟନ୍ ଫେରିଥିଲେ । ଯାହା ଦଳ ପାଇଁ ଆଜି ବି ସବୁଠୁ କମ୍ ସ୍କୋର ହୋଇ ରହିଛି । ତେବେ ଆଜି ଦଳ କେବଳ ୬୮ ରନରେ ଅଲଆଉଟ୍ ହୋଇ ନିଜର ଦ୍ୱିତୀୟ ସର୍ବନିମ୍ନ ସ୍କୋର କରିଛି । ଏହା ଆଇପିଏଲ ଇତିହାସରେ ଷଷ୍ଠ ସର୍ବନିମ୍ନ ସ୍କୋର ମଧ୍ୟ ।