ବଢିଚାଲିଛି କେନ୍ଦ୍ର-ଆରବିଆଇ ବିବାଦ ! ପଦରୁ ହଟିବେନି ଉର୍ଜିତ ପଟେଲ ।
କନକ ବ୍ୟୁରୋ : ପଦରୁ ହଟିବେନି ଆରବିଆଇ ଗଭର୍ଣ୍ଣର ଉର୍ଜିତ ପଟେଲ । ଆରବିଆଇ ଓ କେନ୍ଦ୍ର ସରକାରଙ୍କ ମଧ୍ୟରେ ଲଗାତର ଭାବେ ମତାନ୍ତର ଚାଲିଥିଲେ ମଧ୍ୟ ଆରବିଆଇ ଗଭର୍ଣ୍ଣର ଉର୍ଜିତ ପଟେଲ ତାଙ୍କ କାର୍ଯ୍ୟକାଳ ସମ୍ପୂର୍ଣ୍ଣ କରିବେ । ତାଙ୍କୁ ପଦରୁ ହଟାଇବା ନେଇ ସରକାର କୌଣସି ଚିନ୍ତା କରୁନାହାନ୍ତି ବୋଲି ସୂଚନା ମିଳିଛି । ତେବେ ଅଗଷ୍ଟ ମାସରେ ଆରବିଆଇ ଗଭର୍ଣ୍ଣର ଉର୍ଜିତ ପଟେଲଙ୍କ କାର୍ଯ୍ୟକାଳ ଶେଷ ହେବ । ସେ ଅଗଷ୍ଟ ମାସ ପର୍ଯ୍ୟନ୍ତ କାର୍ଯ୍ୟରେ ରହିବେ । ଗତ କିଛି ଦିନ ଧରି କେନ୍ଦ୍ର ସରକାର ଓ ଆରବିଆଇ ମଧ୍ୟରେ ବିବାଦ ଲାଗିରହିଛି । ରିଜର୍ଭ ବ୍ୟାଙ୍କ ସମ୍ପୂର୍ଣ୍ଣ ସ୍ୱାଧୀନତା ଚାହୁଁଥିବା ବେଳେ ଏହାକୁ ନେଇ ସରକାରଙ୍କ ସହ ମତଭେଦ ବଢିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ବ୍ୟାଙ୍କ ଗୁଡିକର ଏନପିଏ ସମସ୍ୟା ପାଇଁ ରିଜର୍ଭ ବ୍ୟାଙ୍କ ଉପରେ ଦୋଷ ଲଦିଥିଲେ କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀ । ବ୍ୟାଙ୍କ ଗୁଡିକ ମନଇଚ୍ଛା ଋଣ ଦେଇଥିବାରୁ ଏପରି ପରିସ୍ଥିତି ଉପୁଜିଛି । ରିଜର୍ଭ ବ୍ୟାଙ୍କ ମଧ୍ୟ ଏସବୁକୁ ଅଣଦେଖା କରିଛି ବୋଲି କହିଥିଲେ ଜେଟଲୀ । ଆରବିଆଇ ଡେପୁଟି ଗଭର୍ଣ୍ଣର ବିରଳ ଆଚାର୍ଯ୍ୟଙ୍କ ବୟାନ ପରେ ଏହାର ପ୍ରତିକ୍ରିୟାରେ ଏପରି କହିଥିଲେ ଅର୍ଥମନ୍ତ୍ରୀ । ରିଜର୍ଭ ବ୍ୟାଙ୍କର ସ୍ୱାଧୀନତା ଉପରେ ଆକ୍ରମଣ ଦେଶ ପାଇଁ ବିପଦଜ୍ଜନକ ହୋଇପାରେ ବୋଲି କହିଥିଲେ ବିରଳ । ଏହାକୁ ନେଇ ରିଜର୍ଭ ବ୍ୟାଙ୍କ ଓ ସରକାରଙ୍କ ମଧ୍ୟରେ ସୃଷ୍ଟି ହୋଇଥିବା ଫାଟ କ୍ରମଶଃ ବଢିବାରେ ଲାଗିଛି । ଯେଉଁଥି ପାଇଁ ଆରବିଆଇ ଗଭର୍ଣ୍ଣର ଉର୍ଜିତ ପଟେଲ ଇସ୍ତଫା ଦେବାର ଆଶଙ୍କା ମଧ୍ୟ ସୃଷ୍ଟି ହୋଇଥିଲା ।