ସୁନା ବ୍ୟବସାୟୀଙ୍କ ସଂସାର ଉଜାଡିଦେଲା ସୈତାନ ସଂକ୍ରମଣ । ୨୪ ଘଣ୍ଟା ଭିତରେ କୋଟିପତି ବାପା-ପୁଅଙ୍କୁ ନେଇଗଲା ଭୂତାଣୁ ।
କନକ ବ୍ୟୁରୋ: କରୋନା କୋଟିପତି ଦେଖେନି । ଧନୀ, ଗରିବ କାହାକୁ ଛାଡେନି… ପୁଳା ପୁଳା ଟଙ୍କା, ନାମୀଦାମୀ ଗାଡି, ଭରି ଭରି ସୁନା, ଏକର ଏକର ଜମି ଆଉ ବ୍ୟାଙ୍କ, ବାଲାନ୍ସ, ବଙ୍ଗଲୋ ସହ ଲକଜୁରୀୟସ୍ ଲାଇଫ୍… କରୋନା ଆଗରେ ଏସବୁ କିଛି ନୁହେଁ । ଆପଣ ଯେତେ କୋଟିପତି ହୋଆଥାନ୍ତୁ, ଯେଡେ ବଡ ଧନୀ ହୋଇଥାନ୍ତୁ ନା କାହିଁକି । କରୋନା ଆଗରେ କିଛି କାମ କରେନି । ସଂକ୍ରମଣ ସବୁ ସାରିଦିଏ, ସର୍ବନାଶ କରେ, ସର୍ବହରା ସଜାଏ, ପରିବାର ଉଜାଡି ସମ୍ପର୍କୀୟଙ୍କୁ ଛଡାଇ ନିଏ…
Kanak News is now on WhatsApp
Join and get latest news updates delivered to you via WhatsApp
ଆଜି ଆମେ ଆପଣଙ୍କୁ ଏମିତି ଏକ କାହାଣୀ କହିବୁ ଯେଉଁଠି କୋଟି କୋଟି ଟଙ୍କା ବି କରୋନା ଆଗରେ ଫିକା ପଡିଯାଇଛି । ଏତେ ବଡ ଧନୀ ହୋଇ, ଲକ୍ଷଲକ୍ଷ ଟଙ୍କାର ସମ୍ପତ୍ତି ଥାଇ ବି ସଂକ୍ରମଣ ସହ ଲଢି ପାରିଲେନି । ମହାମାରୀକୁ ମାତ୍ ଦେଇପାରିଲେନି ଆଉ ଭୂତାଣୁ ସହ ଲଢି ଜୀବନ ଛଡାଇ ପାରିଲେନି । କରୋନାର କରାଳ ଆଁରେ ଶେଷରେ ଚାଲିଯାଇଛି ଜୀବନ । ପୁଣି ଗୋଟିଏ ନୁହେଁ ୨୪ ଘଣ୍ଟା ଭିତରେ ଲିଭି ଯାଇଛି ବାପପୁଅଙ୍କ ଜୀବନ ଦୀପ…
ସଂକ୍ରମଣ ଭିତରେ ରାୟଗଡା ସହରରୁ ଆସିଥିବା ଏ ଖବର ସମସ୍ତଙ୍କୁ ସ୍ତବ୍ଧ କରିଛି । ଯେଉଁଠି ୨୪ ଘଂଟା ଭିତରେ ସଂକ୍ରମଣ ନେଇଛି ପ୍ରତିଷ୍ଠିତ ସୁନା ବ୍ୟବସାୟୀ ବାପ ପୁଅଙ୍କ ଜୀବନ । ତେବେ ରାୟଗଡା ସହରର ଜଣାଶୁଣା ସୁନା ବ୍ୟବସାୟୀ ତଥା କୋଟି କୋଟି ଟଙ୍କାର ମାଲିକ ପେଦି ସେଟି କୁମାର ସ୍ୱାମିଙ୍କ କରୋନାରେ ମୃତ୍ୟୁ ହୋଇଛି । ଆଉ ତାଙ୍କ ମୃତ୍ୟୁର ୨୪ ଘଣ୍ଟା ଭିତରେ ବଡ ପୁଅ ପ୍ରାଣ ହରାଇଛନ୍ତି ।
ତେବେ ପ୍ରଥମେ ସୁନା ବାବସାୟୀ କୁମାର ସ୍ୱାମିଙ୍କ ସ୍ତ୍ରୀ ଓ ସାନ ପୁଅ କରୋନାରେ ଆକ୍ରାନ୍ତ ହୋଇ ଦୀର୍ଘ ଦିନ ଚିକିତ୍ସିିତ ହେବା ପରେ ସୁସ୍ଥ ହୋଇ ଘରକୁ ଫେରିଥିଲେ । ସ୍ତ୍ରୀ ଓ ସାନ ପୁଅ ଘରକୁ ଫେରିବାର ୪ ଦିନ ପରେ ନିଜେ କୁମାର ସ୍ୱାମୀ ଏବଂ ତାଙ୍କ ବଡ ପୁଅ ସୁଧିର କୁମାର, ସାନ ବୋହୁ ଆକ୍ରାନ୍ତ ହୋଇ ସଙ୍ଗରୋଧରେ ରହିଥିଲେ । ପରେ ଆକ୍ରାନ୍ତ ୩ ଜଣଙ୍କୁ ବିଶାଖାପାଟନମର ଆପୋଲୋ ହସ୍ପିଟାଲରେ ଚିକିତ୍ସା କରାଯାଉଥିଲା । ମାତ୍ର ସଂକ୍ରମଣରେ ଏ ଯୁଦ୍ଧରେ ଦୀର୍ଘ ୭ ଦିନ ଧରି ସଂଗ୍ରାମ କରିବା ପରେ ସୋମବାର ବାପା କୁମାର ସ୍ୱାମୀଙ୍କ ମୃତ୍ୟୁ ହୋଇଥିଲା ଆଉ ଏହାର ୨୪ ଘଣ୍ଟା ପରେ ବଡ ପୁଅ ସୂଧୀରଙ୍କ ମୃତ୍ୟୁ ହୋଇଛି ।
ସବୁଠାରୁ ବଡ କଥା ହେଉଛି କୋଭିଡର ଦୁଇଟି ଡ଼ୋଜ ନେଇଥିଲେ ମଧ୍ୟ କରୋନାରେ ତାଙ୍କର ମୃତ୍ୟୁ ହୋଇଛି । ଗୋଟିଏ ପଟେ ଟଙ୍କା ଏବଂ ଅନ୍ୟ ପଟେ ଟୀକା- କରୋନା କବଳରୁ ଜୀବନକୁ ବଞ୍ଚାଇ ପାରିବାରେ ସକ୍ଷମ ହୋଇପାରିନି । ସେପେଟ ପରିବାରର ଦୁଇଜଣଙ୍କ ମୃତ୍ୟୁ ଆଉ ସାନବୋହୁ ମେଡିକାଲରେ କରୋନା ସହ ଲଢେଇ କରୁଥିବାରୁ ଭାଙ୍ଗିପଡିଛନ୍ତି ପରିବାର ଲୋକେ । ଏ ଖବର ରୟଗଡା ସହରରେ ଶୋକର ଛାୟା ଖେଳାଇ ଦେଇଛି । ସତରେ ଏ ଘଟଣା ହିଁ ପ୍ରମାଣିତ କରୁଛି କରୋନା ଦେଖେନି ଧନୀ ଗରିବ…