ଆନ୍ଧ୍ର ଭାରିଏଣ୍ଟ ପାଇଁ ବଢିଲା ରାୟଗଡା ପ୍ରଶାସନର ଚିନ୍ତା । ଆନ୍ଧ୍ର ସୀମାନ୍ତରେ ୧୨ ରାସ୍ତା ସିଲ୍ , ଚେକପୋଷ୍ଟରେ ନିୟମ ହେଲା କଡ଼ାକଡ଼ି ।
କନକ ବ୍ୟୁରୋ : ରେଡ଼ ଜୋନରେ ଥିବା ରାୟଗଡ଼ା ଜିଲ୍ଲାରେ କରୋନା ସଂକ୍ରମଣ ଦିନକୁ ଦିନ ବଢିବାରେ ଲାଗିଛି । ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶର ଏ.ପି ଭାରିଏଣ୍ଟ ପ୍ରଶାସନ ପାଇଁ ଚିନ୍ତାର କାରଣ ପାଲଟିଛି । ଜିଲ୍ଲା ପ୍ରଶାସନ ଆନ୍ଧ୍ର-ଓଡ଼ିଶା ସୀମାନ୍ତରେ ରାୟଗଡ଼ାକୁ ସଂଯୋଗ କରୁଥିବା ସମସ୍ତ ୧୨ଟି ରାସ୍ତାକୁ ସିଲ କରିଛି । ରାୟଗଡ଼ା ସହର ଉପରେ ନିର୍ଭର କରୁଥିବା ପଡ଼ୋଶୀ ଆନ୍ଧ୍ରପ୍ରଦେଶର ପାର୍ବତିପୁରମ୍ ଅଂଚଳର ଛୋଟ ବ୍ୟବସାୟୀଙ୍କ ଏବେ ବି ଯିବା ଆସିବା ଲାଗି ରହିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରଶାସନ ପକ୍ଷରୁ ଚେକପୋଷ୍ଟରେ ସରକାରଙ୍କ ଗାଇଡ଼ ଲାଇନ୍ ଅନୁଯାୟୀ ଓଡ଼ିଶାକୁ ପ୍ରବେଶ ନେଇ ରହୁଥିବା ନିୟମକୁ କଡ଼ାକଡ଼ି କରାଯାଇଛି । କିନ୍ତୁ ଏହାସତ୍ତେ୍ୱ ମଧ୍ୟ କିଛି ଛୋଟ ବ୍ୟବସାୟୀ ବେଶ ସହଜରେ ଆନ୍ଧ୍ର ସୀମା ପାର କରି ଓଡ଼ିଶା ଆସୁଥିବାର ଦେଖିବାକୁ ମିଳିଛି । ଯାହାକୁ ରୋକିବା ପ୍ରଶାସନ ପାଇଁ ଚ୍ୟାଲେଞ୍ଜ ପାଲଟିଛି ।
ଏସବୁ ଭିତରେ ଗତ ୨୪ ଘଂଟା ମଧ୍ୟରେ ରାଜ୍ୟରେ କରୋନାର ଆସିଛି ଅଲୋଡା ରେକର୍ଡ । ସର୍ବକାଳୀନ ରେକର୍ଡ ଭାଙ୍ଗିଛି ପଜିଟିଭ ସଂଖ୍ୟା । ମୋଟ ୧୨ ହଜାର ୨୩୮ ପଜିଟିଭ ଚିହ୍ନଟ ହୋଇଛି । ୨୪ ଜିଲ୍ଲାରେ ୩ ଅଙ୍କ ଉପରେ ରହିଛି ସଂକ୍ରମଣ ସୁନ୍ଦରଗଡରେ ସର୍ବାଧିକ ୨ ହଜାର ୭୩ ପଜିଟିଭ ଚିହ୍ନଟ ହୋଇଛନ୍ତି । ଖୋର୍ଦ୍ଧାରେ ୧୮ ଶହ ୨୮ ଓ କଟକରେ ୯୧୬ ସଂକ୍ରମିତ ଚିହ୍ନଟ ହୋଇଛନ୍ତି । ବାଲେଶ୍ୱରରେ ୪୩୭, ବରଗଡରେ ୪୭୫, କଳାହାଣ୍ଡିରେ ୫୮୦, ନବରଙ୍ଗପୁରରେ ୨୮୨, ନୂଆପଡାରେ ୨୯୦ ଓ ସମ୍ବଲପୁରରେ ୫୪୪ ପଜିଟିଭ ଚିହ୍ନଟ ହୋଇଛନ୍ତି । ଗତ ୨୪ ଘଂଟା ମଧ୍ୟରେ ୫୦ ହଜାର ୭୯୯ ନମୁନା ପରୀକ୍ଷା ହୋଇଛି । ସେହିଭଳି ଗତ ୨୪ ଘଂଟାରେ ୧୯ ଜଣ ପ୍ରାଣ ହରାଇଛନ୍ତି ।