ମଦ ପିଇଦେଲା ମୂଷା…ମୂଷା ପେଟରେ ୨୪୦୦ ପେଟି ମଦ । ୩୦ ଲକ୍ଷ ଟଙ୍କାର ମଦ ଜବତ କଲା ପୋଲିସ । ଥାନାରେ ମୂଷା ପିଇଦେଲେ ୨୪୦୦ ପେଟି ମଦ । ଆଶ୍ଚର୍ଯ୍ୟ କରିଦେଲା କ୍ରାଇମବ୍ରାଞ୍ଚର ରିପୋର୍ଟ…
କନକ ବ୍ୟୁରୋ : ମୂଷା ପିଇଦେଲା ମଦ । ମୂଷା ପେଟରେ ପଡିଲା ୨୪୦୦ ପେଟି ମଦ । ମଦ ପିଇଦେଲା ମୂଷା । ପେଟି ପେଟି ମଦ ପିଇ ସଫା କରିଦେଲା ମୂଷା । ମଦ ଜବତ ପରେ ଥାନାରେ ଥିବା ୨୪୦୦ ପେଟି ମଦକୁ ଚଳୁ କରିଦେଲା ମୂଷା । କଥାଟା କାନକୁ ଆଶ୍ଚର୍ଯ୍ୟ ଭଳି ଲାଗୁଥିଲେ ବି ୟୁପିରୁ ଆସିଥିବା ଏ ଘଟଣା କିନ୍ତୁ ସମସ୍ତଙ୍କୁ ଚକିତ କରିଦେଇଛି । ଯେଉଁଠି କ୍ରାଇମବ୍ରାଞ୍ଚର ରିପୋର୍ଟରେ ଲେଖାଯାଇଛି ଯେ ଚୋରାମଦ ଥାନାରୁ କୁଆଡେ ଗାଏବ ହୋଇନି ବରଂ ମଦ ମୂଷା ପିଇଦେଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ମାର୍ଚ୍ଚ ୧୧ ତାରିଖରେ ଏଟା ଥାନା ଅଧିନ କୋତବାଲୀ ଅଞ୍ଚଳରେ ରେଡ କରି ପୋଲିସ ବିପୁଳ ମଦ ଜବତ କରିଥିଲା । ପାଖାପାଖି ୨୪୦୦ ପେଟି ମଦ ଜବତ କରିଥିଲା ଯାହାର ଆନୁମାନିକ ମୂଲ୍ୟ ୩୦ ଲକ୍ଷ ଟଙ୍କା ହେବ । କିନ୍ତୁ ଆଶ୍ଚର୍ଯ୍ୟର କଥା ଥାନାରେ ଥିବା ଜବତ ମଦ ପରେ ଗାଏବ ହୋଇଥିବା ଜଣାପଡିଥିଲା । ଘଟଣାରେ ପୋଲିସର ହାତ ଥିବା ଅଭିଯୋଗ ହେବା ପରେ ଜିଲ୍ଲା ଅଧିକାରୀ ସମ୍ପୃକ୍ତ ଥାନାର ଇନସପେକ୍ଟର ଏବଂ ତାଙ୍କ ସହଯୋଗୀଙ୍କୁ ନିଲମ୍ବିତ କରିବା ସହ ସେମାନଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେଇଥିଲେ । ପରେ ଏହି ମଦ ଗାଏବ ମାମଲା ଆଲିଗଡ କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଥିଲା ।
କିନ୍ତୁ ସବୁଠାରୁ ଚକିତ କରିଦେଲା ମଦ ମାମଲାରେ କ୍ରାଇମବ୍ରାଞ୍ଚ ରିପୋର୍ଟ । ତଦନ୍ତ କରି କ୍ରାଇମବ୍ରାଞ୍ଚ ଟିମ ଜେନେରାଲ ଡାଏରୀରେ ଯାହା ଲେଖିଛି ତାହା ଶୁଣିଲେ ଆପଣ ବିଶ୍ୱାସ ବି କରି ପାରିବେନି । କ୍ରାଇମବ୍ରାଞ୍ଚ କହିଛି ମଦ ଥାନାରୁ ଗାଏବ ହୋଇନି ବରଂ ମୂଷା ସବୁ ମଦ ପିଇଦେଇଛି । ଜବତ ହୋଇଥିବା ୨୪୦୦ ପେଟି ମଦ ମୂଷା ପେଟକୁ ଯାଇଛି । ତେବେ କ୍ରାଇମବ୍ରାଞ୍ଚର ଏଭଳି ତଥ୍ୟ ଲୋକହସା ହୋଇଥିବା ବେଳେ ମୂଷା କେମିତି ଏତେ ମଦ ପିଇଦେଲା ବୋଲି ସନ୍ଦେହ ସୃଷ୍ଟି ହୋଇଛି । ଆଉ ପୋଲିସର ହେରଫେର ମନୋଭାବ ଓ ଦୁର୍ନୀତି ନେଇ ଉଠୁଛି ପ୍ରଶ୍ନ ।