ଜଗାର ଯାଜପୁରିଆ ବନ୍ଧୁ…ଭକ୍ତ ପାଇଁ ବ୍ରାହ୍ମଣ ସାଜିଥିଲେ ମହାପ୍ରଭୁ, ରାତିରେ ଆସିଲେ ସୁନାଥାଳିଆରେ ଦେଲେ ମହାପ୍ରସାଦ
ଜଗତର ନାଥ ଜଗନ୍ନାଥ । ଭକତଙ୍କ ଭାବରେ ବନ୍ଧା ସେ । ତାକୁ ଯିଏ ଭକ୍ତିରେ ଥରେ ଡାକି ଦିଏ ସେ ତାର ଗୋଟାପୁଣି ହୋଇଯାଏ । ଆଜିର ଏହି କଳି କାଳରେ ସେ ହେଉଛନ୍ତି ଜୀବନ୍ତ ଠାକୁର । ତା’ର ନତ ବଡ, ଦାଣ୍ଡ ବଡ, ମନ୍ଦିର ବଡ ଆଉ ଭୋଗ ବଡ । ହେଲେ ଏସବୁକୁ ମୁରୁଛୁ ଦେଇ ବରଷକେ ଥରେ ଭକ୍ତଙ୍କୁ ଦର୍ଶନ ଦେବା ଲାଗି ଶ୍ରୀନଅଁର ଛାଡି ବାହାରକୁ ଧାଇଁ ଆସନ୍ତି କାଳିଆ ଠାକୁର । କେବଳ ଟିକିଏ ଭକ୍ତି, ସ୍ନେହ , ଶ୍ରଦ୍ଧା ପାଇବା ପାଇଁ ଭାଇ, ଭଉଣୀଙ୍କୁ ସାଥିରେ ଧରି ଚାଲିଆସନ୍ତି ବଡ ଦାଣ୍ଡର ସେହି ଶରଧାବାଲିକୁ । ତେବେ ମହାପ୍ରଭୁଙ୍କ ଅନେକ ଅଲୌକିକ ମହିମା ରହିଛି । ଯାହା ମଧ୍ୟରୁ ଗୋଟିଏ ହେଲା ବନ୍ଧୁ ମହାନ୍ତିଙ୍କ କାହାଣୀ..
Kanak News is now on WhatsApp
Join and get latest news updates delivered to you via WhatsApp
ବନ୍ଧୁ ମହାନ୍ତି ଜଗନ୍ନାଥଙ୍କର ଜଣେ ପରମ ଭକ୍ତ ଥିଲେ । ସେ ପୁରୀ ଜଗନ୍ନାଥ ମନ୍ଦିରଠାରେ ଅନେକ ଦିନ କାଳ କାଟିଥିଲେ । ଭୁବନେଶ୍ୱରଠାରୁ ୫ନଂ ଜାତୀୟ ରାଜପଥରେ କଟକ ଦେଇ ଯାଜପୁର ଅଭିମୁଖେ ପ୍ରାୟ ୧୦୦ କିମି ଦୂର ଆସିଲେ କୁଆଖିଆ ଛକ ପଡେ । ସେଠାରୁ ଦକ୍ଷିଣକୁ ପ୍ରାୟ ୫ କିମି ଦୂରରେ ଅବସ୍ଥିତ ଯାଜପୁର ଜିଲ୍ଲା ଅନ୍ତର୍ଗତ ଜାହାନପୁର ଗ୍ରାମପଞ୍ଚାୟତର କପିଳେଶ୍ୱର ଗ୍ରାମ । ମାତ୍ର ଏହା କେବଳ ସ୍ଥାନୀୟ ଲୋକଙ୍କଠାରୁ ଶୁଣାଯାଏ; କୌଣସି ସ୍ମୃତିସନ୍ତକ ନାହିଁ ।
ବନ୍ଧୁ ମହାନ୍ତିଙ୍କ ପରିବାରରେ ତାଙ୍କର ପତ୍ନୀ, ଦୁଇ କନ୍ୟା ଓ ପୁତ୍ର । ବିଶେଷ ଜମିବାଡ଼ି ନ ଥିବା ହେତୁ ଭିକ୍ଷା ମାଗି ଚଳନ୍ତି ବନ୍ଧୁ ମହାନ୍ତି । ତାଙ୍କ ପତ୍ନୀ ଶ୍ରୀକ୍ଷେତ୍ରବାସୀ ବନ୍ଧୁଙ୍କଠାରୁ କିଛି ମାଗିବାକୁ ପରାମର୍ଶ ଦେଉଥିଲେ ମଧ୍ୟ ନିହାତି ଆନଶ୍ୟକ ନ ପଡ଼ିଲେ ବନ୍ଧୁ ଘରକୁ ଯିବା ଉଚିତ ହେବ ନାହିଁ ବୋଲି ସେ ଭାବନ୍ତି। ମାତ୍ର ଏକ ସମୟରେ ବର୍ଷା ନ ହେବାରୁ, ବନ୍ଧୁ ମହାନ୍ତିଙ୍କୁ ଭିକ୍ଷା ମିଳୁନଥିଲା । ତେଣୁ ସେ ନିଜ ବନ୍ଧୁ ପୁରୁଷୋତ୍ତମଙ୍କୁ ଦେଖା କରିବା ପାଇଁ ସପରିବାର ଶ୍ରୀକ୍ଷେତ୍ର ଅଭିମୁଖେ ଯାତ୍ରା କଲେ । ମାତ୍ର ଗହଳି ହେତୁ ମନ୍ଦିର ମଧ୍ୟରେ ପ୍ରବେଶ କରିନପାରି ଦକ୍ଷିଣଦ୍ୱାରସ୍ଥ ପେଜନଳା ନିକଟରେ ବସି ରହିଲେ ।
ପ୍ରବଳ ଭୋକ ହେବାରୁ ମହାନ୍ତିଙ୍କ ପରିବାର ପେଜ ପିଇ ଶୋଇ ପଡ଼ିଲେ । ମାତ୍ର ଅର୍ଦ୍ଧ ରାତ୍ରିରେ ଜଣେ ବ୍ରାହ୍ମଣ ଆସି ଡାକ ପକାଇଲେ, ହେ ମୋର ଯାଜପୁରିଆ ବନ୍ଧୁ ଉଠ… ଉଠ । ବ୍ରାହ୍ମଣ ଜଣଙ୍କ ସୁନା ଥାଳିରେ ଦେଇଥିବା ମହାପ୍ରସାଦ ଖାଇସାରି, ଥାଳି ଫେରାଇବାକୁ ଖୋଜିଲେ ମଧ୍ୟ ମହାନ୍ତି ତାଙ୍କୁ ପାଇନଥିଲେ । ସକାଳ ପାହିବାରୁ ଠାକୁରଙ୍କ ସୁନା ଥାଳି ଖୋଜାପଡ଼ିଲା । ଥାଳିକୁ ଏକ ଭିକାରୀ ମୁଣ୍ଡ ତଳେ ଥୋଇ ଶୋଇଥିବା ଖବର ପାଇ ଶ୍ରୀମନ୍ଦିର ସେବକ ପ୍ରହରୀମାନେ କୌଣସି କଥା ନଶୁଣି ବନ୍ଧୁ ମହାନ୍ତିଙ୍କୁ ସପରିବାର ବନ୍ଦୀ କଲେ ଓ ନିର୍ୟ୍ୟାତନା ଦେଲେ । ବନ୍ଧୁଙ୍କ ଦୁଃଖ ଯନ୍ତ୍ରଣା ମହାପ୍ରଭୁ ସହିପାରିଲେ ନାହିଁ ।
ଖୋର୍ଦ୍ଧାର ରଥିପୁର ଗଡ଼ରେ ଥିବା ଗଜପତି ପ୍ରତାପରୁଦ୍ର ଦେବଙ୍କୁ, ବନ୍ଧୁ ମହାନ୍ତିଙ୍କୁ ମୁକ୍ତ କରିବା ଲାଗି ସ୍ୱପ୍ନାଦେଶ ଦେଲେ । ଏବଂ ମହାପ୍ରଭୁଙ୍କ ସ୍ୱାପ୍ନାଦେଶ ପାଇ ବନ୍ଧୁ ମହାନ୍ତିଙ୍କୁ ମୁକ୍ତ କରିଥିଲେ । ସେତେବେଳେ ଭକ୍ତ ବନ୍ଧୁ ମହାନ୍ତିଙ୍କ ମହିମା ସମସ୍ତେ ଜାଣିସାରିଥିଲେ । ଶ୍ରୀମନ୍ଦିର ଦକ୍ଷିଣ ଦ୍ଵାର ପେଜନାଳ ନିକଟରେ ତିଆରି ହେଲା ତାଙ୍କର ଆଶ୍ରମ ଏବେବି ଜରାଜୀର୍ଣ୍ଣ ଅବସ୍ଥାରେ ଥିବା ଏହି ଆଶ୍ରମକୁ ଅନେକ ଲୋକ ଦର୍ଶନ ପାଇଁ ଆସୁଥିବା ଦେଖାଯାଏ ।