କନକ ବ୍ୟୁରୋ: ଅଥଳ ଜଳରାଶି ପାଲଟିଲା ବଡ଼ ଦାଣ୍ଡ । ଆଉ ସେହି ବଡ଼ଦାଣ୍ଡରେ ରଥ ପାଲଟିଲା ଡଙ୍ଗା । ଖୋର୍ଦ୍ଧା ଜିଲ୍ଲାର ଖଇରୀର ପ୍ରସିଦ୍ଧ କାଙ୍କଣ ଶିଖରୀ । ଏହା ଜଗତର ନାଥ ପ୍ରଭୁ ଜଗନ୍ନାଥଙ୍କ ଲୀଳାକ୍ଷେତ୍ର ଭାବେ ପରିଚିତ । ସକାଳ ୧୦ଟାରେ ହୋମ ଓ ଯଜ୍ଞ ସହ ତିନି ଠାକୁରଙ୍କ ନୀତିକାନ୍ତି ହୋଇଥିଲା । ୧୨ଟା ୩୦ଟାରେ ପହଣ୍ଡି ବିଜେ କରାଯାଇ ରଥ ଉପରକୁ ମହାପ୍ରଭୁଙ୍କ ନିଆଯାଇଥିଲା । ଏହା ପରେ ତିନି ଠାକୁରଙ୍କୁ ମନ୍ଦିର ଚାରିପଟେ ପରିକ୍ରମା କରାଯାଇଥିଲା । ପରେ ରଥଯାତ୍ରା ପାଇଁ ପ୍ରସ୍ତୁତ ହୋଇଥିବା ସ୍ୱତନ୍ତ୍ର ଡଙ୍ଗାରେ ବିରାଜମାନ ହୋଇ ତିନି ଠାକୁର ରଥରେ ଯାତ୍ରା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
କୁହାଯାଏ, ମୋଗଲ ନାଏବ୍ ତକି ଖାଁ ଯେତେବେଳେ ଜଗନ୍ନାଥଙ୍କ ଉପରେ ଆକ୍ରମଣ କରିଥିଲେ, ସେତେବେଳେ ଦଇତାପତିମାନେ ପ୍ରଭୁ ଜଗନ୍ନାଥଙ୍କୁ ପାରିକୁଦର ଗୁରୁବାଇକୁ ନେଇଥିଲେ । ୨୦୧୩ ମସିହା ଠାରୁ ଏଠାରେ ସ୍ୱତନ୍ତ୍ର ମନ୍ଦିର ନିର୍ମାଣ କରିବା ସହ ରଥଯାତ୍ରା ଆରମ୍ଭ ହୋଇଥିଲା । ସେବେଠାରୁ ଚିଲିକା ଜଳ ରାଶି ମଧ୍ୟରେ ଡଙ୍ଗା ଦ୍ୱାରା ଠାକୁରମାନଙ୍କର ଜଳଯାତ୍ରାରେ ରଥଯାତ୍ରା ଅନୁଷ୍ଠିତ ହେଉଥିବାବେଳେ ଏଠାରେ ହଜାର ହଜାର ଭକ୍ତଙ୍କର ସମାଗମ ହେଉଥିବା ପରିଲକ୍ଷିତ ହେଉଛି । ଭକ୍ତଙ୍କ ପାଇଁ ଏଠାରେ ପ୍ରସାଦ ସେବନ ବ୍ୟବସ୍ଥା କରାଯାଇଥିଲେ । ବିଶେଷକରି ପ୍ରଶାସନିକ ଅଧିକାରୀ ଓ ଆରକ୍ଷୀ ଅଧୀକ୍ଷକଙ୍କ ତତ୍ୱାବଧାନରେ ସମସ୍ତ କାର୍ଯ୍ୟ ସୁଚାରୁରୂପେ ସମ୍ପାଦନ ହୋଇଥିଲା ।
ସେପଟେ ସୁବର୍ଣ୍ଣପୁର ପାତାଳୀ ଶ୍ରୀକ୍ଷେତ୍ରରେ ମଧ୍ୟ ଧୁମଧାମରେ ପାଳିତ ହୋଇଛି ଶ୍ରୀଜଗନ୍ନାଥଙ୍କ ରଥଯାତ୍ରା । କୋଟସମଲାଇର ଛଳିଆ ପାହାଡ଼ର ଶ୍ରୀମନ୍ଦିରରୁ ଘୋଷଯାତ୍ରାରେ ବାହାରିଥିଲେ ଭାଇଭଉଣୀଙ୍କ ସହ ଶ୍ରୀଜଗନ୍ନାଥ । ସବୁଜ ବନାନୀ ପରିବେଷ୍ଟିତ ଛଳିଆ ପାହାଡ଼ର ଉପରୁ ପହଣ୍ଡି ବିଜେ କରିଥିଲେ ତିନି ଠାକୁର ଆଗରେ ବଳଭଦ୍ର, ମଝିରେ ଦେବୀ ସୁଭଦ୍ରା ଓ ପଛରେ କାଳିଆ ଠାକୁର । ଏହାରି ଭିତରେ ହରିବୋଲ, ହୁଳୁହୁଳି, ଘଂଟଘଂଟା ଓ ସଂର୍କୀତନରେ କମ୍ପି ଉଠିଥିଲା ଏହି ପାବନ କ୍ଷେତ୍ର । ତିନି ଠାକୁରଙ୍କ ଦର୍ଶନ ପାଇଁ ଶ୍ରଦ୍ଧାଳୁଙ୍କର ପ୍ରବଳ ଭିଡ଼ ଦେଖିବାକୁ ମିଳିଥିଲା ।
ଏପଟେ କାଙ୍କଣ ଶିଖରୀରୁ ବାହାରି ତିନି ଠାକୁର ଜଳ ଭିତରେ ନୌକାରଥରେ ବିରାଜମାନ ହୋଇ ପୁଣି ସେଠାକୁ ଫେରିଆସିଥିଲେ ।