ଦେଶରେ ପଡିରହିଛି ନାବାଳିକାଙ୍କୁ ଦୁଷ୍କର୍ମର ୨୦,୦୦୦ ମାମଲା ! ଶୁଣାଣୀ ପାଇଁ ୪୦୦ ଜଜ ରହିଲେ ଲାଗିବ ୧୦ ମାସ ସମୟ ।
ସାରାଦେଶରେ ନାବାଳିକାଙ୍କ ପ୍ରତି ହେଉଥିବା ନିର୍ଯ୍ୟାତନାର ଗୋଟିଏ ପରେ ଗୋଟିଏ ଘଟଣା ସାମ୍ନାକୁ ଆସୁଛି । କଠୁଆ ଦୁଷ୍କର୍ମ ଘଟଣା ଠାରୁ ଆରମ୍ଭ କରି ସୁରଟ ଏବଂ ହିମାଚଳରେ ହୋଇଥିବା ଦୁଷ୍କର୍ମ ମାମଲାକୁ ନେଇ ଦେଶରେ ଆକ୍ରୋଶ ବଢି ବଢି ଚାଲିଛି । ନାବାଳିକା ମାନଙ୍କ ପ୍ରତି ଏଭଳି ଜଘନ୍ୟ ଅପରାଧ ଭିଆଉଥିବା ଅଭିଯୁକ୍ତ ମାନଙ୍କୁ କଠୋର ଦଣ୍ଡବିଧାନ ପାଇଁ ସାଧାରଣରେ ଦାବି ହେଉଛି । କିନ୍ତୁ ଦେଶରେ ପୂର୍ବରୁ ମଧ୍ୟ ଅନେକ ଦୁଷ୍କର୍ମ ମାମଲା ସମାଧାନ ନହୋଇ ପଡିହୋଇରହିଛି । ନ୍ୟାସନାଲ କ୍ରାଇମ ରେକର୍ଡ ବ୍ୟୁରୋ (ଏନସିଆରବି) ପକ୍ଷରୁ ୨୦୧୬ ମସିହାରେ ହୋଇଥିବା ଆକଳନ ଅନୁଯାୟୀ, ଦେଶର ବିଭିନ୍ନ ଅଦାଲତରେ ଦୁଷ୍କର୍ମ ସହ ଯୋଡିହୋଇଥିବା ୩୬,୬୫୭ ମାମଲା ଏପର୍ଯ୍ୟନ୍ତ ସମାଧାନ ନହୋଇ ପଡିହୋଇରହିଛି । ଏକ ରିସର୍ଚ୍ଚ ଅନୁଯାୟୀ, ଦେଶରେ ପ୍ରତିଦିନ ୫୫ ଜଣ ନାବାଳିକାଙ୍କ ସହ ଦୁଷ୍କର୍ମ ହୋଇଥାଏ । ଦେଶରେ ପ୍ରତିବର୍ଷ ୨୦ ହଜାରରୁ ଅଧିକ ନାବାଳିକାଙ୍କୁ ଦୁଷ୍କର୍ମ କରାଯାଇଥିବା ମାମଲା ସାମ୍ନାକୁ ଆସିଥାଏ ।
Kanak News is now on WhatsApp
Join and get latest news updates delivered to you via WhatsApp
ଯଦି ଦୁଷ୍କର୍ମର ଏହି ସମସ୍ତ ମାମଲାକୁ ୧୦ ମାସରେ ସମାଧାନ କରିବାକୁ ହୁଏ, ତେବେ ଏଥି ପାଇଁ କେତେଜଣ ଜଜ୍ ଙ୍କର ଆବଶ୍ୟକତା ପଡିବ ଏବଂ ପ୍ରତିଦିନ ଜଣେ ଜଜଙ୍କୁ କେତୋଟି ମାମଲାର ଶୁଣାଣୀ କରିବାକୁ ପଡିବ ? ଯଦି ଦେଶରେ ଜଜ୍ ପ୍ରତିଦିନ ୫୦ଟି ମାମଲାର ଶୁଣାଣୀ କରନ୍ତି । ଦେଶରେ ଯଦି ୪୦୦ଜଣ ଜଜଙ୍କୁ ପ୍ରତିଦିନ ୫୦ଟି ଲେଖାଏଁ ମାମଲାର ଶୁଣାଣୀ କରନ୍ତି ତେବେ ୧୦ମାସରେ ସେମାନେ ୨୦ହଜାର ମାମଲାକୁ ସମାଧାନ କରିପାରିବେ ।
ଶୁଣାଣୀରେ ଆଇନର ପ୍ରତିବନ୍ଧକ :
ଦିଲ୍ଲୀର ପୂର୍ବତନ ମୁଖ୍ୟ ପବ୍ଲିକ ପ୍ରୋସିକ୍ୟୁଟର ଓକିଲ କେଡି ଭରଦ୍ୱାଜଙ୍କ କହିବା ଅନୁଯାୟୀ, ସରକାର ଦୁଷ୍କର୍ମ ସହ ଯୋଡିହୋଇଥିବା ସମସ୍ତ ମାମଲାକୁ ୧୦ ମାସରେ ସମାଧାନ କରିବାକୁ ଚାହୁଁଥିଲେ ମଧ୍ୟ ଏହା ଅସମ୍ଭବ ଅଟେ । ଏଥି ପାଇଁ ଦେଶରେ ଥିବା ଆଇନ ବ୍ୟବସ୍ଥା ହିଁ ଦାୟୀ ଅଟେ । ଉଦାହରଣ ସ୍ୱରୂପ, ଅଦାଲତରେ କେତେବେଳେ ସାକ୍ଷୀ ଉପସ୍ଥିତ ନଥାନ୍ତି ତ ଆଉ କେତେବେଳେ ଅଭିଯୁକ୍ତଙ୍କୁ ଅଣାଯାଇନଥାଏ । ଏପରିକି ବେଳେବେଳେ ଓକିଲମାନେ ମଧ୍ୟ ଅନୁପସ୍ଥିତ ରହିଥାନ୍ତି ଏବଂ ଜଜଙ୍କ ପାଖରେ ଅଧିକ କମ ରହିଯାଇଥିବାରୁ ଶୁଣାଣୀର ନମ୍ବର ଆସିନଥାଏ ।
ଏହା ଛଡା ଆଇନ କହିଥାଏ ଯେ, ଯଦି ମାମଲାରେ ସାକ୍ଷୀ କୋର୍ଟରେ ଅନୁପସ୍ଥିତ ଅଛି ତେବେ ତାଙ୍କୁ ଦ୍ୱିତୀୟ ଥର ଡକାଯାଉ । ଏବଂ ଯଦି ଦ୍ୱିତୀୟ ଥର ଅନୁପସ୍ଥିତ ରହନ୍ତି ତେବେ ତାଙ୍କୁ ସମନ ପଠାଯାଇ ତୃତୀୟ ଥର ପାଇଁ ଡକାଯାଉ । ଏହା ପରେ ମଧ୍ୟ ଯଦି ଅନୁପସ୍ଥିତ ରହନ୍ତୁ ତେବେ ତାଙ୍କ ବିରୋଧରେ ୱାରେଣ୍ଟ ଜାରି ହୋଇଥାଏ । ଏହି ପ୍ରକ୍ରିୟା ତିନିଥର କରାଯାଇଥାଏ ଏବଂ ଏହା ପରେ ୱାରେଣ୍ଟ ଜାରି କରାଯାଇଥାଏ । ଏବଂ ପ୍ରତିପକ୍ଷ କୋର୍ଟଙ୍କ ନିଷ୍ପତ୍ତିକୁ ହାଇକୋର୍ଟରେ ଚ୍ୟାଲେଞ୍ଜ ଦେଇପାରିବେ ।
ସୁପ୍ରିମକୋର୍ଟର ଓକିଲ ଡି ଭୌମିକଙ୍କ କହିବା ଅନୁଯାୟୀ, ଦେଶରେ ଚୁନିନ୍ଦା ମାମଲା ହିଁ ହୋଇଥାଏ, ଯେଉଁଥିରେ ସ୍ପିଡି ଟ୍ରାଏଲ ଦେଖିବାକୁ ମିଳିଥାଏ । ୨୦୧୨ ମସିହା ଡିସେମ୍ବର ମାସରେ ନିର୍ଭୟା ସାମୂହିକ ଦୁଷ୍କର୍ମ ମାମଲାରେ ତଳ ଅଦାଲତ ତିନି ମାସରେ କେସକୁ ସମାଧାନ କରିବା ସହ ଦୋଷୀମାନଙ୍କୁ ଫାସୀର ଦଣ୍ଡ ଦେଇଥିଲେ । ତେବେ ଏହି ମାମଲା ସମାଧାନ ହେବାର କାରଣ ହେଉଛି ଏହା ଗଣମାଧ୍ୟମରେ ବାରମ୍ବାର ପ୍ରସାରିତ ହେଉଥିଲା । ତେବେ ଦୁଷ୍କର୍ମ ମାମଲା ସମାଧାନ ହେବାରେ ପାଖାପାଖି ୧ ବର୍ଷରୁ ୨ ବର୍ଷ ସମୟ ଲାଗିଥାଏ ।
କେନ୍ଦ୍ର ଆଇନ ମନ୍ତ୍ରୀ ପିପି ଚୌଧୁରୀ ସଂସଦରେ ଏକ ରିପୋର୍ଟ ଦାଖଲ କରିବା ଅବସରରେ କହିଥିଲେ ଯେ, ସମଗ୍ର ଦେଶରେ ମହିଳାମାନଙ୍କ ସହ ହୋଇଥିବା ଅପରାଧର ୨୬,୮୨୦,୧୬ ମାମଲା କୋର୍ଟରେ ପଡିରହିଛି । ଏହି ସଂଖ୍ୟା କ୍ରମାଗତ ଭାବରେ ବଢି ବଢି ଚାଲିଛି । ଏହାର ପ୍ରମୁଖ କାରଣ ହେଉଛି ସମଗ୍ର ଦେଶର ପ୍ରତ୍ୟେକ ଜିଲ୍ଲାର ଅଦାଲତ ଗୁଡିକରେ ୫,୯୮୪ ଜଜ୍ ପଦ ଖାଲି ହୋଇପଡିଛି । ଏପରିକି ହାଇକୋର୍ଟରେ ୩୯୫ ଏବଂ ସୁପ୍ରିମକୋର୍ଟରେ ଜଜ୍ ଙ୍କର ୬ଟି ପଦବୀ ଖାଲି ପଡିଛି ।