ଦୁଷ୍କର୍ମକାରୀଙ୍କୁ ଏନକାଉଣ୍ଟର ପରେ ଉଠୁଛି ପଡୁଛି ଦେଶ। ତଥାପି କମୁନି ମହିଳା ଓ ଶିଶୁଙ୍କୁ ଦୁଷ୍କର୍ମ। ଗତ ୨୪ ଘଂଟାରେ ଯୌନ ପିଶାଚଙ୍କ ପଞ୍ଝାରେ ୫ ନାବାଳିକା
ମୁଖ୍ୟ ସଚିବଙ୍କୁ କେନ୍ଦ୍ର ସ୍ୱରଷ୍ଟ୍ର ସଚିବଙ୍କ ଚିଠି
କନକ ବ୍ୟୁରୋ: ହାଇଦ୍ରାବାଦରୁ ଆରମ୍ଭ କରି ଉନ୍ନାଓ ଦୁଷ୍କର୍ମକୁ ନେଇ ସାରାଦେଶରେ ପ୍ରତିକ୍ରିୟା ପ୍ରକାଶ ପାଉଛି । ଦୁଷ୍କର୍ମକାରୀଙ୍କୁ ହାଇଦ୍ରାବାଦରେ ଏନକାଉଂଟର ପରେ ଦେଶ ଉଠୁଛି ପଡ଼ୁଛି । ହେଲେ ମହିଳା ଓ ଶିଶୁଙ୍କ ଉପରେ ଯୌନ ନିର୍ଯାତନା ଓ ଦୁଷ୍କର୍ମ କମିବାର ନାଁ ନେଉ ନାହିଁ । ଗତ ୨୪ ଘଂଟା ମଧ୍ୟରେ ରାଜ୍ୟରେ ୩ ନାବାଳିକା ଦୁଷ୍କର୍ମର ଶୀକାର ହୋଇଥିବା ବେଳେ କଟକ ଓ ବାଲେଶ୍ୱରରେ ୨ ଶିଶୁକନ୍ୟାଙ୍କ ସହିତ ଦୁଷ୍କର୍ମ ଉଦ୍ୟମ ହୋଇଛି । ଗଂଜାମ ଜିଲ୍ଲା ଖଲ୍ଲିକୋଟ ଥାନା ଅଂଚଳରେ ଜଣେ ୬ ବର୍ଷର ନାବାଳିକାକୁ ୧୬ ବର୍ଷର ନାବାଳକ ଦୁଷ୍କର୍ମ କରିଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ମୟୁରଭଂଜ ଜିଲ୍ଲା ବାଦାମପାହାଡ଼ ଥାନା ଅଂଚଳରେ ଜଣେ ୧୬ ବର୍ଷର ନାବାଳିକାକୁ ଅପହରଣ ପରେ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ରାଜଧାନୀ ଭୁବନେଶ୍ୱରରେ ମଧ୍ୟ ଜଣେ ୭ବର୍ଷର ଶିଶୁକନ୍ୟାକୁ ଦୁଷ୍କର୍ମ କରିଥିବା ଅଭିଯୋଗରେ ଚନ୍ଦ୍ରଶେଖରପୁର ଥାନା ପୁଲିସ୍ ଜଣେ ୪୮ ବର୍ଷର ବ୍ୟକ୍ତିକୁ ଅଟକ ରଖିଛି । ବାଲେଶ୍ୱର ସୋର ଥାନା ଅଂଚଳରେ ଷଷ୍ଠ ଶ୍ରେଣୀର ଛାତ୍ରୀଙ୍କ ଦୁଷ୍କର୍ମ ଉଦ୍ୟମ ଅଭିଯୋଗ ହୋଇଥିବାର ଖବର ସାମ୍ନାକୁ ଆସିଛି । କଟକ ସହରର ବାଦାମବାଡ଼ି ଥାନା ଅଂଚଳରେ ୫ ବର୍ଷର ଶିଶୁକନ୍ୟାକୁ ଦୁଷ୍କର୍ମ ଉଦ୍ୟମ ହୋଇଛି ।
ଏପଟେ ସାରା ଦେଶରେ ଦୁଷ୍କର୍ମ ସଂଖ୍ୟା ବଢ଼ୁଥିବାରୁ ଉଦବେଗ ପ୍ରକାଶ କରିଛି କେନ୍ଦ୍ର ଗୃହ ମନ୍ତ୍ରାଳୟ । ଗୃହ ସଚିବ ସବୁ ରାଜ୍ୟର ମୁଖ୍ୟ ଶାସନ ସଚିବଙ୍କୁ ଚିଠି ଲେଖି ଦୁଷ୍କର୍ମ ମାମଲାରେ ତୁରନ୍ତ ତଦନ୍ତ ସହ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କହିଛନ୍ତି । ମହିଳାଙ୍କ ନିରାପତାକୁ ପ୍ରାଥମିକତା ଦେବାକୁ ଚିଠିରେ ଲେଖାଯାଇଛି । ମହିଳା ବିରୋଧୀ ହିଂସା କ୍ଷେତ୍ରରେ ପୁଲିସ୍ ତୁରନ୍ତ ସେଠାରେ ପହଂଚି ତତ୍ପରତା ପ୍ରକାଶ କରିବାକୁ ନିର୍ଦେଶ ଦିଆଯାଇଛି । ପୂର୍ବରୁ ମଧ୍ୟ ଗୃହ ମନ୍ତ୍ରାଳୟ ଦୁଷ୍କର୍ମ ଭଳି ଜଘନ୍ୟ ଅପରାଧ ପାଇଁ ଜିରୋ ଏଫଆଇଆର ନୀତି ଗ୍ରହଣ କରିବାକୁ ନିର୍ଦେଶ ଦେଇଥିଲେ । ଏଥିରେ ଯଦି କୌଣସି ପୁଲିସ୍ ଅଧିକାରୀ ଏଫଆଇଆର ରୁଜୁ କରିବାକୁ ମନା କରନ୍ତି, ତେବେ ତାଂକ ବିରୋଧ ଅତି କଠୋର କାର୍ଯ୍ୟାନୁଷ୍ଠାନ ନିଆଯିବା ସହ ଦଣ୍ଡନୀୟ ଅପରାଧ ଭାବେ ଗ୍ରହଣ କରାଯିବ ବୋଲି ସ୍ପଷ୍ଟ କରିଥିଲେ ।