ଏହି ଲୋକପ୍ରିୟ ଗାୟକଙ୍କ ସହ ଗୀତ ଗାଇବାର ସୁଯୋଗ ପାଇଲେ କୋକିଳକଣ୍ଠୀ ରାନୁ ମଣ୍ଡଲ ! ସୋସିଆଲ୍ ମିଡିଆରେ ଭାଇରାଲ୍ ହେଉଛି ଭିଡିଓ ।
ପଶ୍ଚିମବଙ୍ଗର ରାଣାଘାଟ ରେଲୱେ ଷ୍ଟେସନରେ ବସି ଗୀତ ଗାଇ ଗୁଜୁରାଟ ମେଣ୍ଟାଉଥିବା ଜଣେ ଗରିବ ଗାୟିକାଙ୍କ ଜୀବନର ମୋଡ଼ ଯେ ଏଭଳି ଭାବେ ବଦଳିବ ତାହା କେବେ କେହି ଚିନ୍ତା କରିନଥିବେ । କିଛି ଦିନରୁ ଖୁବ୍ ଚର୍ଚ୍ଚା ସାଉଁଟୁଥିବା ରାନୁ ମଣ୍ଡଳଙ୍କ ଗୋଟିଏ ଭିଡିଓ ତାଙ୍କୁ ରାତାରାତି ଅଜ୍ଞାତରୁ ଚର୍ଚ୍ଚିତ କରିଦେଲା । ଏବେ ସୁପରଷ୍ଟାର ଲିଷ୍ଟରେ ସାମିଲ୍ ହୋଇଥିବା ରାନୁଙ୍କୁ ବଲିଉଡ୍ ରୁ ଗୀତ ଗାଇବା ପାଇଁ ଅଫର୍ ମିଳୁଛି । ଅଭିନେତା ଏବଂ ଗାୟକ ହିମେଶ୍ ରେସମିୟା ତାଙ୍କ ସିନେମା “ହ୍ୟାପି,ହାର୍ଡି ଆଣ୍ଡ୍ ହିର୍” ରେ ତାଙ୍କୁ ଗୀତ ଗାଇବାର ସୁଯୋଗ ମଧ୍ୟ ଦେଇଛନ୍ତି । ରାନୁ ଏବଂ ହିମେଶ୍ ଙ୍କ ଯୁଗଳବନ୍ଦୀ ଭାବେ ଗାଇଥିବା ଗୀତର ରେକର୍ଡିଙ୍ଗ୍ ମଧ୍ୟ ସୋସିଆଲ୍ ମିଡିଆରେ ଖୁବ୍ ଭାଇରାଲ୍ ହୋଇଥିଲା । ତେବେ ଏ ଭିତରେ ହିମେଶଙ୍କ ସହ ରାନୁ ୩ ଟି ଗୀତ ଗାଇ ସାରିଲେଣି । ଏହି ତିନୋଟି ଗୀତର ଝଲକ ହିମେଶ୍ ନିଜ ସୋସିଆଲ୍ ଆକାଉଣ୍ଟରେ ମଧ୍ୟ ସେୟାର୍ କରିଛନ୍ତି ଯାହାକୁ ଲୋକ ଖୁବ୍ ପସନ୍ଦ କରୁଛନ୍ତି । ଏ ଭିତରେ ରାନୁ ଆଉ ପାଦେ ଆଗକୁ ବଢିଛନ୍ତିି । ନିକଟରେ ରାନୁ ପ୍ରସିଦ୍ଧ ଗାୟକ ଉଦିତ୍୍ ନାରାୟଣଙ୍କ ସହ ଏକ ଗୀତ ରେକର୍ଡ କରିବାର ସୁଯୋଗ ପାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ହିମେଶ୍ ରେସମିୟା ନିଜ ଇନଷ୍ଟାଗ୍ରାମ୍ ଆକାଉଣ୍ଟ୍ ରେ ଆଉ ଏକ ଭିଡିଓ ସେୟାର୍ କରିଛନ୍ତି ଯେଉଁଥିରେ ଅଜ୍ଞାତରୁ ପ୍ରସିଦ୍ଧ ପାଲଟିଥିବା କୋକିଳକଣ୍ଠୀ ରାନୁ ମଣ୍ଡଳ ନିଜ ସୁରିଲା କଣ୍ଠରେ ଗୀତ ଗାଉଥିବା ନଜର ଆସୁଛନ୍ତି । “କେହ ରହି ନଜଦିକିୟାଁ” ଗୀତରେ ରାନୁଙ୍କ ସହ ହିମେଶ୍ , ଉଦିତ୍ ନାରାୟଣ ଏବଂ ପାୟଲ୍ ଦେବ୍ ମଧ୍ୟ ଗୀତ ଗାଉଥିବା ନଜର ଆସୁଛନ୍ତି । ତେବେ ରାନୁଙ୍କ ଗାଇଥିବା ପ୍ରଥମ ଗୀତ “ତେରୀ ମେରୀ କାହାନୀ” ରିଲିଜ୍ ହୋଇସାରିଲାଣି । ଏହି ଗୀତକୁ ମଧ୍ୟ ଖୁବ୍ ପ୍ରଶଂସା କରାଯାଇଛି । ବର୍ତ୍ତମାନ ରାନୁ ଏବଂ ଉଦିତ୍ ଙ୍କ ଯୁଗଳବନ୍ଦୀ ସୋସିଆଲ୍ ମିଡିଆରେ ଚହଳ ସୃଷ୍ଟି କରିଛି ।