ମୁହଁ ଖୋଲିଲେ, ରହସ୍ୟ ବଢାଇଲେ ରଞ୍ଜୀବ । କହିଲେ, କଂଗ୍ରେସ ଛାଡିବା ପାଇଁ ମୋତେ ଟଙ୍କା ଯାଚିବା ଘଟଣା ମିଛ, ଭଲ ଲାଗିବା ଯାଏଁ ଦଳରେ ରହିବି ।
କନକ ବ୍ୟୁରୋ : ଦୀର୍ଘ ଦିନ ପରେ ମୁହଁ ଖୋଲିଲେ କଂଗ୍ରେସ ରାଜ୍ୟସଭା ସାଂସଦ ରଞ୍ଜୀବ ବିଶ୍ୱାଳ । କଂଗ୍ରେସର ବିପର୍ଯ୍ୟୟକୁ ନେଇ ବଡ ବୟାନ ଦେଇଛନ୍ତି ରଞ୍ଜୀବ । କଂଗ୍ରେସର ବିପର୍ଯ୍ୟୟ ପାଇଁ ସମସ୍ତ ତୁଙ୍ଗ ନେତାଙ୍କୁ ଦାୟୀ କରିବା ସହ ନିରଞ୍ଜନ ପିସିସି ସଭାପତି ପଦରେ ରହିବା ଆବଶ୍ୟକ ବୋଲି ମତ ଦେଇଛନ୍ତି ରଞ୍ଜୀବ । ରାଜ୍ୟରେ କଂଗ୍ରେସର ଯେଉଁ ଅବସ୍ଥାରେ ରହିଛି ସେଥିରୁ କେବଳ ନିରଞ୍ଜନ ହିଁ ଦଳକୁ ଆଗକୁ ନେଇପାରିବେ । ନିରଞ୍ଜନଙ୍କ ଭଳି ଅନୁଭବୀ ଓ ଅଭିଜ୍ଞତା ଥିବା ନେତା ପିସିସି ସଭାପତି ପଦ ଛାଡିବା ଦଳକୁ ଆହୁରି ପଛକୁ ଠେଲିଦେବ ବୋଲି କହିଛନ୍ତି ରଞ୍ଜୀବ ।
Kanak News is now on WhatsApp
Join and get latest news updates delivered to you via WhatsApp
ଏହାଛଡା ରଞ୍ଜୀବ କହିଛନ୍ତି, କଂଗ୍ରେସକୁ ଆଗକୁ ନେବାକୁ ହେଲେ ସମସ୍ତ ବରିଷ୍ଠ ନେତା ମାନଙ୍କୁ ଏକ ମନ ଏକ ପ୍ରାଣରେ କାମ କରିବାକୁ ପଡିବ । ଦେଶର ସବୁଠୁ ପୁରୁଣା ଦଳ ପୁଣିଥରେ କ୍ଷମତାକୁ ଫେରିବାକୁ ହେଲେ ନିଜର ଷ୍ଟ୍ରାଟେଜି ବଦଳାଇବାକୁ ପଡିବ । ନିରଞ୍ଜନ ନେତୃତ୍ୱରେ ଦଳ ପୁଣିଥରେ ଗ୍ରାଉଣ୍ଡରେ କାମ କରିବା ଆବଶ୍ୟକ ବୋଲି କହିଛନ୍ତି ରଞ୍ଜୀବ । ଏବେ ପିସିସି ସଭାପତି ହେବାକୁ ତାଙ୍କର ଇଚ୍ଛା ନାହିଁ ବୋଲି କହିଛନ୍ତି ରଞ୍ଜୀବ ।
ଏସବୁ ଭିତରେ ଅନ୍ୟ ଦଳକୁ ଯିବା ନେଇ ଚର୍ଚ୍ଚାରେ ମଧ୍ୟ ପୂଣ୍ଣଚ୍ଛେଦ ପକାଇଛନ୍ତି ରଞ୍ଜୀବ । ପୂର୍ବରୁ ଟ୍ରିପଲ ତଲାକ ବିଲ୍ ରାଜ୍ୟସଭାରେ ପାରିତ ହେବା ବେଳେ ରଞ୍ଜୀବ ଗୃହରେ ଅନୁପସ୍ଥିତି ରହିବାକୁ ନେଇ ରାଜନୀତି ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଥିଲା । ଏପରିକି ଅନ୍ୟ ଏକ ଦଳକୁ ଯିବା ନେଇ ରଞ୍ଜୀବଙ୍କ ସହ ୪୦ କୋଟି ଟଙ୍କାର ଡିଲ୍ ହୋଇଥିବା ନେଇ ଚର୍ଚ୍ଚା ହୋଇଥିଲା । ତେବେ ଏନେଇ ରଞ୍ଜୀବ କହିଛନ୍ତି, ତାଙ୍କୁ କୌଣସି ଦଳ ପକ୍ଷରୁ ଟଙ୍କା ଯାଚିବା ଘଟଣା ସମ୍ପୂର୍ଣ୍ଣ ମିଛ । ଏବେ ପର୍ଯ୍ୟନ୍ତ ମୁଁ କଂଗ୍ରେସରେ ଅଛି । ଯେତେବେଳେ ଯାଏଁ ଭଲ ଲାଗିବ ସେତେବେଳେ ଯାଏଁ ଦଳରେ ରହିବି ବୋଲି କହି ରହସ୍ୟ ବଢାଇଥିଲେ ରଞ୍ଜୀବ ।