ମାଟିରେ ମିଶିଲା ରୂପେଶଙ୍କ ରଙ୍ଗଶାଳା । ଧୂଳିସାତ ହେଲା ସ୍ମିତାରାଣୀଙ୍କ ମୃତ୍ୟୁର ମୁକସାକ୍ଷୀ, ଗେଷ୍ଟହାଉସ ଗୁମର ଫିଟିବା ପରେ ତେଜିଥିଲା ‘ରଙ୍ଗଶାଳା’ ରାଜନୀତି । ଗେଷ୍ଟହାଉସ ଭାଙ୍ଗିବା ପରେ ବି ଫିଟି ପାରିଲାନି ସ୍ମିତାରାଣୀଙ୍କ ମୃତ୍ୟୁ ଗୁମର
କନକ ବ୍ୟୁରୋ: ମାଟିରେ ମିଶିଲା ରୂପେଶର ରଙ୍ଗଶାଳା । ଭାଙ୍ଗିଲା ରୂପେଶ ଭଦ୍ରଙ୍କ ଗେଷ୍ଟହାଉସ । ଯାଜପୁର ଧର୍ମଶାଳା ବ୍ଲକ ହରିଦାସପୁରର ସେହି ବିବାଦୀୟ ରଙ୍ଗଶାଳା, ଯାହାକୁ ମାଟିରେ ମିଶାଇ ଦେଇଛି ପ୍ରଶାସନ । ଏ ହେଉଛି ସେହି ରଙ୍ଗଶାଳା, ଯେଉଁଠି ପଂଚାୟତ ସଂପ୍ରସାରଣ ଅଧିକାରୀ ସ୍ମିତାରାଣୀ ବିଶ୍ୱାଳଙ୍କ ମୃତ୍ୟୁ ଅତି ସଂଦେହ ଜନକ ଭାବେ ହୋଇଥିଲା । ଯାହାକୁ ନେଇ ଗତ ଅକ୍ଟୋବର ମାସରୁ ରାଜ୍ୟ ରାଜନୀତି ସରଗରମ ରହିଆସିଛି । ସରକାରୀ ଜମିରେ ବେଆଇନ ଭାବେ ଗଢ଼ାଯାଇଥିବା ରଙ୍ଗଶାଳାକୁ ଭାଙ୍ଗିଦେଇଛି ପ୍ରଶାସନ । ଯାଜପୁର କଲେକ୍ଟର, ଏଡିଏମ, ଧର୍ମଶାଳା ତହସିିଲଦାରଙ୍କ ସମେତ ଯାଜପୁରର ବହୁ ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ଚାଲିଥିଲା ରୂପେଶ ଭଦ୍ରାଙ୍କ ଏହି ଗେଷ୍ଟହାଉସର ଭଙ୍ଗା କାର୍ଯ୍ୟ । ଉତ୍ତେଜନାକୁ ଦୃଷ୍ଟିରେ ରଖି ପୋଲିସ ଛାଉଣୀରେ ପରିଣତ ହୋଇଥିଲା ସମଗ୍ର ଅଂଚଳ ।
Kanak News is now on WhatsApp
Join and get latest news updates delivered to you via WhatsApp
ତେବେ ସ୍ମିତାରାଣୀଙ୍କ ମୃତ୍ୟୁ କିଭଳି ହୋଇଥିଲା, ଏହା ପଛରେ କାହାର ଭୂମିକା ରହିଛି, ସବୁକିଛିର ମୁଖସାକ୍ଷୀ ଥିଲା ରୂପେଶ ଭଦ୍ରଙ୍କ ଏହି ଗେଷ୍ଟହାଉସ । ସ୍ମିତାରାଣୀଙ୍କ ମୃତ୍ୟୁକୁ ନେଇ ବିବାଦ ତେଜିବା ପରେ ଏହି ଗେଷ୍ଟହାଉସର ଗୁମର ଖୋଲିଥିଲା । ତେବେ ରଙ୍ଗଶାଳା ଭାଙ୍ଗିବା ପାଇଁ ଦଳବଳ ନେଇ ପୋଲିସ-ପ୍ରଶାସନ ପହଁଚିବା ପରେ ଏହାକୁ ବିରୋଧ କରିଥିଲେ ରୂପେଶଙ୍କ ପତ୍ନୀ ତଥା ହରିଦାସପୁର ପଂଚାୟତର ସରପଂଚ ମଧୁସ୍ମିତା ଭଦ୍ର ଓ ତାଙ୍କ ସମର୍ଥନ । ବେଶ କିଛି ସମୟ ଧରି ଚାଲିଥିଲା ବିରୋଧ ।
ସ୍ମିତାରାଣୀଙ୍କ ମୃତ୍ୟୁ ପଛରେ ହାତ ଥିବା ଅଭିଯୋଗରେ ରୂପେଶ ଭଦ୍ର ଗିରଫ ହୋଇ ଜେଲକୁ ଯାଇଥିବା ବେଳେ ବେଆଇନ ଭାବେ ନିର୍ମିତ ଗେଷ୍ଟହାଉସକୁ ଭାଙ୍ଗି ଦିଆଯାଇଛି । ଅଭିଯୋଗ ହୋଇଆସୁଛି ଯେ ଗେଷ୍ଟହାଉସ ନାଁରେ ଏହାକୁ ରଙ୍ଗଶାଳା ସଜାଇ ଦେଇଥିଲେ ରୂପେଶ । ଏପରିକି ଅନେକ କଳା କାମର ସାକ୍ଷୀ ପାଲଟିଥିଲା ଏହି ଗେଷ୍ଟହାଉସ । ତେବେ ଏହି ଗେଷ୍ଟହାଉସ ଭଙ୍ଗା ଯିବାକୁ ନେଇ ସ୍ଥାନୀୟ ଅଂଚଳରେ ଉତ୍ତେଜନା ପ୍ରକାଶ ପାଇଛି । ଏବେ ପ୍ରଶ୍ନ ଉଠୁଛି,ବେଆଇନ କୋଠା ଭାଙ୍ଗିବା ବେଳେ କାହିଁକି ଏତେ ବିରୋଧ? ରୂପେଶ ଭଦ୍ରଙ୍କ ପଛରେ ରହିଛି କି ବଡ଼ବଡ଼ିଆଙ୍କ ସମର୍ଥନ?